HE CHHUNG ruai deuh hi en teh. Hengte hi Jakoba fapa 12-te an ni. Fanute pawh a nei. A fate hming pakhat tal i hria em? An Zinga thenkhat i hria ang u.

Leaiin Reubena, Simeona, Levia leh Juda a hring a. Rakili chuan fa a neih loh a hriatin a lungngai em em a. Chutichuan a chhiahhlawh Bilhaii chu Jakoba hnenah a pe a, Bilhaii chuan fapa pahnih Dana leh Naphtalia a nei a. Tin Leaii pawhin a chhiahhlawh nula Zilpaii chu Jakoba hnenah a pe a, Zilpaii chuan Gada leh Ashera a hring a. Leaii chuan atawpah fapa pahnih, Issakara leh Zebuluna a nei leh a.

A tawpah Rakili chuan fa a nei thei ta a. Josefa a vuah a. A hnuah Josefa chu mi pawimawh a rawn nih avangin a chanchin tam tak kan hre leh ang. Chungte chu Rakili pa Labana hnena a chen laia Jakoba laka fapa 1I piangte chu an ni.

Jakoba chuan fanute pawh a nei a, mahse Bible-in pakhat hming chauh a sawi a. A hming chu Dinaii a ni. Jakoba chuan Labana kalsana Kanaan-a haw leh a inpuahchah hun a thleng ta a. Tichuan a chhung ruai tak leh a beram ruai leh a ran ruai tam tak chu a hruai khawm a, zin kawng thui tak chu an kal tan ta a.

Kanaan-a Jakoba leh a chhungte rei vak lo an chen hnuin Rakili chuan fapa dang a hring leh a. Khual an zin laiin a hring a. Rakili chuan a vei nasa a, a tawpah a hrin laiin athi ta a. Mahse nausen mipa chu a dam a, Jakoban Benjamina a sa a.

Anmahni atanga Israel hnam pum pui a lo chhuah avangin Jakoba fapa 12-te hming hi hriat reng kan duh a. Dik takin, Israel hnam 12-te chu Jakoba fapa 10-te leh Josefa fapa pahnihte hming chawia sak an ni. Chung naupang zawng zawng pian hnu rei tak thlengin Isaaka chu a dam a. Tupa chu zozai a nei chu a hlimpui ngei ang. Mahse a tunu Dinaii chungah enge thleng i en ang u.