TLANGVAL lungngaihzia leh beidawnzia hi en teh. Hei hi Josefa a ni. A unauten heng Aigupta-a kal mekte hnenah hian an hralh hlim a ni. Chutah chuan Josefa chu bawiha siam a ni ang. Engvanginnge a unaute chuan chu thil tha lo chu an tih? Josefa an thik vang a ni.

An pa Jakoba chuan Josefa chu a duh em em a. A tan kawrfual mawi deuh siamin a duhsakzia a tilang a. Jakoban Josefa a hmangaihzia chu a u 10-ten an hmuhin, Josefa chu thikin an haw ta a ni. An huatna chhan dang a la awm.

Josefan mumang pahnih a nei a. Josefa mumangahte chuan a hmaah a unaute an kun a. Josefan chung a mumangte chu a unaute a hrilhin, amah an huatna a nasa lehzual a.

Ni khat chu Josefa uten an pa beram an ven laiin, engtinnge an awm zel tih ena kal turin Jakoban Josefa a tir a. Josefa unauten a lo kal an hmuh chuan, an zinga thenkhat chuan: ‘I tihlum ang u,’ an ti a. Mahse a upa ber Reubena chuan: ‘Ni lo ve, chu chu ti suh u,’ a ti a. Josefa chu an man ta zawk a. Tuichhunchhuah kang tawhah an thlak a. Engtia tih tur nge tih rel turin an thu ta a.

Chutih lai vel chuan Ishmael-mi thenkhat an lo kal a. Juda chuan a unaute hnenah: ‘Ishmael-mite hnenah hian i hralh ang u,’ ati a. Chutiang chuan an ti ta a. Josefa chu tangkaraw nawi 20-ah an hralh ta a.

A unaute chuan enge an pa an hrilh ang? Kel an talh a, kel thisenah chuan Josefa kawr mawi tak chu an hnim an hniam a. Tichuan kawr chu an pa Jakoba hnenah an hawpui a: ‘Hei hi kan chhar. Han en teh, Josefa kawr alo ni ang e,’ an ti a.

Jakoba chuan a ni tih a hria a. ‘Ram sakawlhin Josefa a tihlum a nih dawn hi,’ tiin a tap ta a. Chu ngei chu Josefa unauten an pain ring se an tih chu a ni. Jakoba chu a lungngai em em a. Ni tam tak a tap a. Mahse Josefa chu a thi lo. An kalpuinaah chuan enge thleng i en ang u.