JOSEFA chuan a u 10-te chu ngilnei lo leh sual an la m reng em tih hriat a duh a. Chuvangin: ‘Enthlatute in ni. Khawilaiah nge kan ram hi a chak loh tih hmuchhuak tura lo kal in ni,’ a ti a.

’Ni lo, kan ni lo. Mi tluangtlam tak tak kan ni. Unau vek kan ni a. 12 kan ni. Mahse unaupa pakhat chu a awm tawh lo va, tin a naupang ber chu kan pa hnenah inah a awm,’ an ti a.

Josefa chuan a awih lo der a. Simeona hmingpu unaupa chu tan inah a khung a. a dangte chu buh a phurh hawtir a. An hnenah: ‘In lo kir hunah, in rualin in naupang ber chu in rawn hruai tur a ni,’ tiin a hrilh a.

Kanaan-a an haw chuan unaute chuan thil lo nih dan zawng zawng chu an pa Jakoba an hrilh a. Jakoba a lungngai em em a. ‘Josefa a awm tawh lo va, tunah Simeona a awm leh tawh lo va, ka fapa naupang ber Benjamina chu in rualin ka kaltir lo vang,’ tiin a tap a. Mahse an chaw a zawh hun chuan, chaw an hmuh belh theih nan Jakoba chuan Aigupta-ah Benjamina a kaltir a ngai a ni.

Josefa chuan a unaute lo kal chu a hmu a. A nau Benjamina a hmu chu a hlim em em a. Amaherawhchu an zinga tumahin he mi pawimawh tak hi Josefa a ni tih an hre lo. Josefa chuan a unau 10-te enchhinna tur thil engemaw a ti ta a.

An ip zawng zawng chu buhin a chhiahhlawhte a thun khahtir a. Mahse anmahni hriattir lovin Benjamina ipah tangkaraw no danglam bik a dah bawk a. An kal vek hnuah, tlema hla deuh an thlen hnuah, an hnungah Josefan a chhiahhlawhte a tir a. An um phak veleh chhiahhlawhte chuan: ‘Engvanginnge kan pu tangkaraw no in ruk?’ an ti a.

Unaute chuan an vaiin: ‘A no kan ru lo. Kan zinga tu hnenah pawh no chu in hmuh chuan, chu mi chu tihhlum ni rawh se,’ an ti a.

Tichuan chhiahhlawhte chuan ip zawng zawng an zawng a, heta i hmuh ang chiah hian no chu Benjamina ipah an hmuchhuak a. Chhiahhlawhte chuan: ‘A dang chu in haw thei e, mahse Benjamina chu kan hnenah a lo kal tur a ni,’ an ti a. Unau 10-te chuan enge an tih tak ang le?

An vaiin Benjamina nen Josefa inah an kir a. Josefa chuan a unaute chu: ‘ln haw vek thei e, mahse Benjamina chu hetah hian kan bawih angin a awm tur a ni,’ tiin a hrilh a.

Juda a tawng chhuak ta a: ‘Naupang tel lova ka haw chuan, amah a hmangaih nasat em avangin ka pa a thi ang. Chuvangin khawngaihtakin hetah i bawih angin mi awmtir rawh, mahse naupang chu haw rawh se,’ a ti a.

Josefa chuan a unaute chu an inthlak tawh tih a hre thei a. Ngilnei lo leh sual an ni tawh lo. Tunah Josefan enge a tih i en ang u.