KANAAN ramah chuan Abrahama hnenah Lota leh a chhungte an cheng ve a. Ni khat chu Abrahaman Lota hnenah: ‘Hetah hian kan ran zawng kham khawp ram a awm lo va. Khawngaitakin i awm hrang ang. Kawng khata i kal leh a dangah ka kal ang e,’ a ti a.

Lotan ram chu a thlir a. A rante tana hnim tha tam tak leh tui awmna ram hmun tha tak a hmu a. Chu chu Jordan phaizawl a ni. Tichuan chutah chuan Lotan a chhungte leh a rante a pem luhpui a. A tawpah Sodom khawpuiah chuan awmhmun a khuar ta a.

Sodom mite chu an tha lo em em a. Lota chu mi tha a nih vangin chu chuan a timangang a. Pathian pawh a mangang ve bawk a. A tawpah an that lohna vangin Sodom leh a kianga khawpui Gomorra chu a tiboral dawn tih Lota vaukhan turin Pathianin vantirhkoh pahnih a tira.

Vantirhkohte chuan Lota chu an hrilh a: ‘Hmnanhmawh rawh! I nupui leh i fanu pahnihte hi hruai la, hetata hi chhuak rawh!’ tiin. Lota leh a chhungte chu tlemin an kal muang deuh va, chuvangin vantirhkohte chuan an kutah an chelh a, khawpui ata an hruai chhuak a. Tin vantirhkoh zinga pakhat chuan: ‘ln nun nan tlan rawh u! Hnung lam hawi suh u. Tlangahte tlan rawh u, tichuan tihhlum in ni lo vang,’ a ti a.

Lota leh a fanute chuan thu an awih a, Sodom ata an tlan chhuak a, chawlh pawh an chawl lo va, hnung lam pawh an hawi lo. Mahse Lota nupui chuan thu a awih lo va. Sodom atanga tlem an kal hnuah a ding a, hnung lam a hawi a. Tichuan Lota nupui chu chi khawn dingah a chang ta a. Milemah amah in hmu thei em?

Hemi atang hian zirtur kan hre thei. Pathianin a thu awihtute chu a chhandam a, mahse a thu awi lotute chuan an nun an hloh ang tih a tilang.