NAUSEN te tak te ṭap, nula kutzungtang chelh hi en teh. Hei hi Mosia a ni. Nula hmel tha tak hi tunge a nih i hria em? Aigupta lai fanu, Pharaoa fanu ngei a ni.

Aigupta-mite tihhlum a nih a duh loh vangin Mosia nu chuan a nausen chu thla thum a nih thlengin a thukru a. Mahse Mosia chu an hmuchhuak leh thei tih a hria a, chuvangin amah chhandam turin heti hian a ti a.

Bawm a la a, tui luh loh nan a tiphui a. Tin a chhungah chuan Mosia a dah a, bawm chu Nile Luipui dunga hnim sang tak karah a dah a. Mosia farnu Miriami chu a kiang hnaia ding a, enge lo thleng tih en tura hrilh a ni a.

Rei loteah Nile Luipuiah chuan inbual turin Pharaoa fanu a lo kal a. Hnim sang kara bawm chu a hmu nghal a. A chhiahhlawh nulate zinga pakhat a ko va: ‘Saw bawm saw mi va lak teh,’ a ti a. Lai fanu chuan bawm chu a han hawn chuan nausen hmel tha deuh a hmu a. Nausen Mosia chu a tap a, lai fanu chuan a lainat a. Tihhlum a nih a duh lo va.

Tin Miriami a lo chhuak a. Milemah hian i hmu thei e. ‘Nausen awm sak tur chein Israel-mi hmeichhia ka va ko ang em?’ tiin Miriami chuan Pharaoa fanu chu a zawt a.

‘Khawngaihtakin va ko rawh,’ lai fanu chuan a ti a.

Tichuan Miriami chu a nu hrilh turin rang takin a kal ta a. Lai fanu hnena Mosia nu a lo thlen chuan, lai fanu chuan: ‘He nausen hi la la, mi awm sak rawh, hlawh ka pe ang che,’ a ti a.

Chutiang chuan Mosia nu chuan ama fa chu a enkawl ta a. A hnuah Mosia a upat tawk hnuah, ama fapa anga lo pawmtu Pharaoa fanu hnenah chuan a hruai a. Chu chu Pharaoa ina Mosia lo than len dan chu a ni.