ISRAEL do turin Philistia-mite an lo kal leh a. Davida u pathumte chu tunah Saula sipai rualah an tel a. Chutichuan ni khat chu Jessaian Davida hnenah buh leh chhang keng la. Engtinnge an awm va hre rawh,’ a ti a.

Davidan sipai riah hmun a thlenin a unaute zawngin indona hmunah a kal a. Philistia mihrawl Goliatha chu Israel-mite nuihsan turin a lo chhuak a. Chu chu ni 40 chhung, zing tin leh tlai tin a lo tih tawh thin a ni. ‘Mi do turin in zinga pakhat thlang rawh u. Mi hneh a mi tihhlum chuan, in bawite kan ni ang a. Mahse keiin ka hneh a, amah ka tihhlum chuan kan bawite in ni ang. Mi do turin tuemaw ka thlantir ngam a che u,’ tiin a au va.

Davidan sipai thenkhat a zawt a: ‘He Philistia mi hi tihlum a, he hmingchhiatna atanga Israel tifihlimtuin enge a hlawh ang?’ tiin.

Sipai chuan: ‘Chu mi chu Saulan a hausakna tam tak a pe ang a. Tin a nupui atan a fanu a pe bawk ang,’ a ti a.

Mahse a len em vangin Israel-mite zawng zawng chuan Goliatha chu an hlau va. Ft 9 (meter 3) vel aia sang a ni a, a phaw ken saktu sipai dang a nei a.

Sipai thenkhat an kal a, Davidan Goliatha do a duh tih Lalber Saula an hrilh a. Mahse Saula chuan Davida hnenah: ‘He Philistia hi i do thei lo vang. Naupang mai i ni a, ani chu a chhung zawng sipai a ni tawh,’ a ti a. Davida chuan: ‘Ka pa beram latu sakeibaknei leh savawm ka tihlum tawh. He Philistia pawh hi an zinga pakhat ang chu a ni mai ang. Jehovan mi tanpui ang,’ a ti a. Chuvangin Saula chuan: ‘Kal rawh le, i hnenah Jehova awm rawh se,’ a ti ta a.

Davida chu luiah a chhuk a, lung te mam panga a chhar a, a ipah a dah a. Tin a virvawm a la a, mihrawl pui tawk tur chuan a kal ta a. Goliathan amah a hmuhin a awih thei lo va. Davida tihhlum chu awlsam deuh niin a ring a.

‘Ka hnenah lo kal la, i taksa chu savate leh ramsate hnenah ei turin ka pe ang e,’ Goliathan a ti a. Mahse Davida chuan: ‘Ka hnenah khandaih leh fei leh fei zang chi nen i lo kal a, kei chu i hnenah Jehova hmingin ka lo kal a ni. Vawiinah hian Jehovan ka kutah a pe ang chia, ka vawm hlum dawn che a ni,’ a ti a.

Chu veleh Davida chu Goliatha lamah a tlan a. A ipa lung chu a la a, a virvawmah a dah a, theih tawpin a vawm a. Lung chuan Goliatha lu ngeiah a fuh a, a tlu hlum ta der a! Philistia-miten an mi chak a tlu ta tih an hmuhin, an tlan kir ta vek a. Israelmiten an um a, an hneh ta a.