HEl HI Pathianin a zawlnei Isaia a hmuhtir ni awm Paradis lem a ni. Isaia chu Jona hnu rei loteah a awm a.

Paradis chu “huan’’ tihna a ni. He lehkhabua kan hmuh tawh thil engemaw a hriat chhuahtir che em? Pathian Jehovan Adama leh Evi tana huan mawi tak a siam nen a inang hle mai lawm ni? Mahse leilung pumpui hi paradis a ni ngai ang em?

Jehovan a zawlnei Isaia chu Pathian mite tana paradis thar lo awm tur chanchin ziak turin a hrilh a. ‘Chinghniate leh beramte inremin an cheng za ang a. Bawng notete leh sakeibaknei notete an tla za ang a, tin naupang te tak tein anmahni a enkawl ang.Nausen pawh rul tur nei kianga a infiam pawhin tihnat a ni lo vang,’ a ti.

Tam tak chuan: ‘Chu chu a lo ni thei ngai lo vang. Leilungah buaina a awm reng thin a, a la awm leh zel ang,’ an ti ang. Mahse ngaihtuah teh: Pathianin Adama leh Evi kha in eng ang nge a pek?

Pathianin Adama leh Evi chu paradis-ah a dah a. Pathian thu an awih loh vang chauhvin a ni an in mawi tak an hloh va, an tar a, an thih ni. Pathian chuan amah hmangaihtu mite hnenah Adama leh Evi hloh tawh hnu ngei chu a pe ang tih a tiam a ni.

Paradis thar lo awm turah chuan engmahin an tina emaw an tiboral lo vang. Remna tha famkim a awm ang a. Mipui zawng zawng an hriselin an hlim ang. A tira Pathianin ni se a tih ang chiah chu a ni ang. Pathianin chu chu a thlentir dan tur chu a hnu lamah kan hria ang.