TUI chunga mipa hi en teh. A huai nasa ngei mai, a ni lawm ni? Kha sangha khan amah a dawlh dawn! He mipa hi tunge ni i hria em? A hming chu Jona a ni. Chuti taka buaina a tawh dan i en ang u.

Jona chu Jehova zawlnei a ni a. Zawlnei Elisha thih hnu rei loteah Jehovan Jona hnenah: ‘Ninevi khawpui ropui takah kal la. Chuta mite that lohna chu a nasa em em a, chumi chungchang chu an hnena i sawi ka duh e,’ tiin a hrilh a.

Mahse Jonan kal a duh lo va. Chuvangin Ninevi pan lohna lama kal lawngah a chuang a. A tlan bo vangin Jona chungah Jehova a lawm lo va. Chuvangin thlipui nasa deuh A tlehtir a. A nasa khawp a, lawng chu a pil a hlauhawm hial a. Lawngpute chuan an hlau em em a, tanpui turin an pathiante an au va.

A tawpah Jonan: ‘Van leh leilung siamtu Pathian, Jehova ka bia a. Tin Jehovan ti tura min hrilh chu ka tlan bo san a ni,’ tiin a hrilh a. Tichuan lawngpute chuan: ‘Thlipui tireh turin i chungah enge kan tih ang? tiin an zawt a.

‘Tuipuiah mi paih thla ula, tuipui fawn chu a reh mai ang,’ Jona chuan a ti a. Lawngpute chuan paih an duh lo va, mahse thlipui a nasa zual vangin a tawpah chuan Jona chu an paih thla ta a. Thlipui a reh nghal a, tuipui fawn a reh nghal a.

Jona chu tuia a pilin sangha lian puiin amah a dawlh a. Mahse a thi lo. Ni thum leh zan thum chhung chu sangha pum chhungah chuan a awm a. Jehova thu awih a Ninevi-a a kal lo chu pawi a ti em em a. Chuvangin enge a tih tak i hria em?

Tanpuina dilin Jehova hnenah Jona a tawngtai a. Tin Jehovan sangha chu khawmualah Jona a luak chhuahtir a. Chumi hnuah chuan Jona chu Ninevi-ah a kal ta a. Hei hian Jehova sawi apiang kan tih a pawimawhzia min zirtir lawm ni?