SOLOMONA chu tleirawl te a nih laiin lalber a lo ni a. Jehova a hmangaih a, a pa Davida thu rawn tha a zawm a. Solomona chungah Jehova a lawm a, tichuan zan khat chu a mumangah a hnenah: ‘Solomon, enge pe che ila i duh ang?’ a ti a.

Solomona chuan: ‘Jehova ka Pathian, ka naupang em a, rorel dan pawh ka thiam lo va. Chuvangin kawng dika i mipuite rorel sak turin finna min pe rawh,’ tiin a chhang a.

Solomona dil chu Jehovan a lawm a. Chuvangin: ‘Dam reina emaw hausakna emaw ni lo va finna i dil avangin, nung tawh ngai tupawh aia finna tam zawk ka pe ang che. Mahse i dil loh, hausakna leh ropuina pawh ka pe ang che,’ a ti a.

A hnu rei loteah buaina khirh tak nen Solomona hnenah hmeichhe pahnih an lo kal a. Pakhat chuan: ‘He hmeichhia nen hian in khatah kan cheng a. Mipa ka hring a, ni hnih hnuah mipa a hring ve a. Tin zan khat chu a fapa chu a thi a. Mahse ka muthilh hlanin ka sirah a fa thi tawh chu a dah a, ka nausen a la a. Ka harh a, nausen thi chu ka han en chuan, ka fa a ni lo tih ka hria a,’ a ti a.

Chu veleh hmeichhe dang chuan: ‘Ni lo! Naute la dama hi ka ta a ni a, a thi hi a ta a ni, a dam hi ka ta a ni,’ a ti a. Chu chu hmeichhiate inhnial dan chu a ni. Solomonan enge a tih ang?

Khandaih a laktir a, an rawn lak chuan: ‘Nausen nung kha bung hnihah bung ula, hmeichhiate hnenah a chanve ve vein pe rawh u,’ a ti a.

Nu tak chuan: ‘Ni lo ve! Khawngaih takin nausen tihlum suh u. A hnenah pe rawh u!’ a ti a. Mahse hmeichhe dang chuan: ‘A tua mah min pe suh u; bung hnihah bung rawh u,’ a ti a.

A tawpah Solomona a tawng a: ‘Naute chu tihlum suh u. Hmeichhe hmasa hnenah pe rawh u. Nu tak a ni e,’ a ti a. Nu tak chuan nausen chu a hmangaih em em a, tihlum lo va hmeichhe dang hnena pek pawh a duh avangin Solomonan chu chu a hria a ni. Mipuiin Solomona thubuai tihfel dan an hriatin, chutiang lalber fing an nei chu an lawm a.

Solomona lal chhungin, Pathianin mipui chu, buhpui leh buh sanghar, grep leh theipui leh chaw dangte leia tam tak totirin mal a sawm a. Mipuiin silhfen tha an inbel a, in thaah an cheng a. Mi tin tan thil tha tinreng a tawk aia tam a awm a ni.