HE HMEICHHE naupang te tak te hian enge a sawi i hria em? Jehova zawlnei Elisha leh, Jehovan thilmak tak ti tura amah a tanpui thu nu hi a hrilh a ni. Nu hi Israel-mi a nih loh avangin Jehova chanchin a hre lo. A nih leh, engvanginnge hmeichhe naupang hi nu ina a awm, i en ang u.

Nu hi Suria mi a ni. A pasal chu Suria sipai rual hotu Naamana a ni. Suria-miten he Israel hmeichhe naupang te tak te hi an man a, Naamana nupui hnenah a chhiahhlawh ni turin an rawn hruai a ni.

Naamana chuan natna tha lo, phar an tih chu a vei a. Chu natna chuan mi tisa thenkhat a titla thei a. Chuvangin hei hi hmeichhe naupang chuan Naamana nupui chu a hrilh a ni: ‘Ka pu hi lsraela Jehova zawlnei hnenah kal thei se ka ti em mai. A phar hi a tihdam ang,’ tiin. A hnuah hei hi nu pasal chu hrilh a ni a.

Naamana chuan tihdam nih a duh em em a; chuvangin Israel-a kal zai a rel ta a. Chuta a va thlen chuan, Elisha inah a kal a. Elisha chuan Naamana chu Jordan Luia kal a, vawi sarih inbual tura hrilh turin a chhiahhlawh a kal chhuahtir a. Chu chuan Naamana a tithinur em em a: ‘Kan rama luite chu Israel-a eng lui ai pawhin an tha zawk vek,’ a ti a. Chu chu a sawi zawhin Naamana chu a kal chhuak a.

Mahse a chhiahhlawhte zinga pakhatin a hnenah: ‘Ka pu, Elisha chuan thil harsa engemaw ti turin hrilh che sela chuan i ti ang a. Tunah engvanginnge a sawi anga i inbual mai loh?’ tiin a hrilh a. Naamanan a chhiahhlawh sawi a ngaithla a, a kal a, Jordan Luiah vawi sarih a inchiah a. A tih zawh chuan a tisa chu a lo dam fel ta a.

Naamana chu a hlim em em a. Elisha hnenah a kir a: ‘Tunah chuan Israela Pathian chu leilung zawng zawnga Pathian dik awmchhun chu a ni tih ka hre chiang ta. Chuvangin, khawngaih takin he thilpek hi la rawh,’ tiin a hrilh a. Mahse Elisha chuan: ‘Ni lo ve, ka la lo vang,’ a ti a. Elisha chuan Naamana tidamtu chu Jehova a nih vangin a tan thilpek lak chu a dik lo tih a hria a. Mahse Elisha chhiahhlawh Gehazia chuan thilpek chu ama tan a duh a.

Chuvangin Gehazia chuan heti hian a ti ta a: Naaman kal chhuah hnuah, amah umpha turin Gehazia a tlan a. ‘Elishan a thian lo thleng tharte tan i thilpek a then a zar a duh ang tih hrilh tur chein mi tir a ni,’ Gehazia chuan a ti a. Chu chu dawt thu a ni. Mahse Naaman chuan dawt a nih a hre lo va, chuvangin thil thenkhat chu Gehazia a pe a.

Gehazia a lo haw chuan Elishan a thiltih chu a hria a. Jehovan amah a hrilh a. Chuvangin: ‘He thil tha lo hi i tih avangin, Naamana phar chu i chungah a thleng ang,’ a ti a. A thleng ta nghal a.

Heng zawng zawng atang hian enge kan hriat theih? Pakhatnaah: hmeichhe naupang ang chu kan niin Jehova chanchin kan sawi tur a ni, tih hi a ni a. Pahnihnaah chuan, a tira Naaman anga chapo kan ni tur a ni lo va, Pathian chhiahhlawh thu kan awih tura ni a. Tin pathumnaah chuan Gehazia angin dawt kan sawi tur a ni lo. Bible-a mi chhiarin tam tak kan hre thei lawm ni?