I THIH a, tihnun leh i nih chuan i nuin engtinnge a ngaih ang? A hlim em em ang! Mahse mi thi tawh chu a nung leh thei em ni? Tun hmain a lo awm tawh ngai em?

Heta mipa leh hmeichhia leh naupang tetakte hi en teh. Mipa hi Zawlnei Elija a ni a. Hmeichhia hi Zerephat khawpuia hmeithai a ni a, naupang hi a fapa a ni. Ni khat chu naupang hi a dam lo va. A zual deuh deuh va. A tawpah a thi ta a. Elijan hmeichhe hnenah: ‘Naupang chu mi han pe rawh,’ a ti a.

Elijan naupang thi tawh chu inchhawngah a lawnpui a, khumah a muttir a. Tin a tawngtai a: ‘Aw Jehova, naupang hi tinung leh rawh,’ tiin. Naupang chu a thaw tan ta a! Chu veleh Elijan a chhukpui leh a, hmeichhe hnenah: ‘En teh, i fapa a nung e!’ a ti a. Chu chu heti taka hmeichhia a hlimna chhan hi a ni.

Zawlnei pawimawh dang hming chu Elisha a ni. Elija tanpuituah a tang a. Mahse a hunah Jehovan Elisha pawh thilmak ti turin a hmang a. Ni khat chu Elisha chu, a chunga hmeichhe pakhat a ngilneih em emna hmun Shunem -ah a kal a. A hnuah chu hmeichhia chuan nausen mipa a nei a.

Naupang than len deuh hnuah, tuk khat chu thlawhhmaa a pa hna thawk pui turin a kal chhuak a. Thawkkhatah naupang chuan: ‘Ka lu a na,’ tiin a au chhuak a. lna an hawpui hnuah naupang chu a thi ta a. A nu a va lungngai em! A kal nghal a, Elisha a va ko va.

Elisha a lo thlen chuan naupang thi tawh chu pindanah a pawm lut a. Jehova hnenah a tawngtai a, a taksa chungah a bawk a. Naupang taksa chu a lo lum thuai a, vawi sarih a hahchhiau va. A nu chu a lo lut a, a nau nung leh a hmu chu a va hlim em!

Mi tam tak an thi tawh a. Chu chuan an chhungte leh thiante a tilungngai em em thin. Mitthi kaihthawh theihna kan nei lo. Mahse Jehovan a nei a. A hnuah mi maktaduai tam tak a tihnun dan tur kan hria ang.