HE TLANGVAL, miten an nuihsana hi en teh. Tunge a nih hi hria em? Hei hi Jeremia a ni. Pathian zawlnei pawimawh em em a ni.

Lalber Josian chu ram ata milemte a tihboral hnu lawkah, Jehovan a zawlnei ni turin Jeremia hi a hrilh a. Amaherawhchu Jeremian zawlnei ni tur chuan la naupang lutukah a inngai a. Mahse Jehovan amah a tanpui ang tih a hrilh a.

Jeremian Israel-mite chu thil tha lo tih bansan turin a hrilh a: ‘Hnamtea mite biak pathiante chu a dik lo an ni,’ a ti a. Mahse Israel-mi tam takin Pathian dik Jehova biak aiin milemte an be zawk dawn si a. Jeremian mipui hnenah an that lohna vangin Pathianin anmahni a hrem ang tih a hrilh lai chuan amah an nuihsan lek a.

Kumte a lo rai a. Josia a thi a, thla thum hnuah a fapa Jehoiakima lalber a lo ni a. Jeremian mipui a hrilh zel a: ‘ln kawng tha lote in thlak loh chuan Jerusalem hi tihchhiat a ni ang,’ tiin. Puithiamten Jeremia an man a: ‘Heng thilte hi i sawi vangin tihhlum tur i ni,’ tiin an au khum a. Tin Israel-a mi liante an hrilh a: ‘Kan khawpui nek zawnga thu a sawi vangin Jeremia hi tihhlum tur a ni,’ tiin.

Tunah Jeremian enge a tih ang? A hlau lo. An vaia hnenah: ‘Heng thilte hi in hnena sawi turin Jehovan mi tir a ni. In nun kawng tha lote hi thlak loh chuan, Jehovan Jerusalem a tichhia ang. Mahse hei hi hre ngei ngei rawh u: Mi tihhlum chuan, thil dik lo tih nei lo mi in tihlum a ni ang,’ tiin a hrilh a.

Miliante chuan Jeremia an tihlum lo va, mahse Israel-mite chuan an kawng tha lo chu an thlak chuang lo va. A hnuah Babulon lai Nebukadnezara a lo kal a, Jerusalem a do va. Babulon-ah sang tam tak a hruai a. Hriat ngai loh miten hriat ngai loh ramah i in ata kal bopui che sela eng ang nge ni ang tih ngaihtuah teh!