HE NAUSEN te tak te hi tunge ni i hria em? Aw, Isua a ni. Bawng inah a piang hlim a ni. Bawng in chu ran dahna hmun a ni a. Marin Isua chu ran thlengah a muttir a, chu chu sabengtungte leh ran dangte ei tur chaw dahna hmun chu a ni. Mahse engvanginnge Mari leh Josefa chu hetah rante nen an awm? Hei hi nausen pianna tur hmun a ni lo lawm ni?

Ni lo, A ni lo. Mahse heta an awmna chhan chu hei hi a ni: Rom awptu, Kaisara Augustan mi tin an hming lehkhabua ziak turin an pianna khawpuiah an kir vek tur a ni tih dan a siam a.Josefa chu heta Bethlehem-ah hian a piang a. Mahse amah leh Josefa an lo thlen chuan, an tan khawiah mah hmun a awm tawh lo va. Chuvangin hetah ran kianga an lo kal a tul a. Tin chu mi ni ngei chuan Marin Isua a hring a! Mahse i hmuh ang hian, a tha vek e.

Isua hmu tura berampute lo kal i hmu em? Zanah an beram vengin phulah an awm a, tin eng eng tak an velin a lo eng a. Vantirhkoh a ni! Berampute chuan an hlau em em a. Mahse vantirhkoh chuan: Hlau suh u! In tan chanchin tha ka nei e. Vawiinah, Bethlehem-ah, Lalpa Krista chu a piang ta. Mipuite a chhandam ang! Puana tuama ran thlenga mu in hmu ang,’ a ti a. Thawk leh khatah vantirhkoh tam tak an lo kal a, Pathian an fak a. Tichuan chung berampute chu Isua zawng turin an kal nghal a, an va hmu ta a.

Engvanginnge Isua chu chuti taka a danglam bik i hria em? Tunge a nih taktak i hria em? He lehkhabua thawnthu hmasa berah khan Pathian Fapa hmasa ber chanchin kan sawi kha hrereng la. He Fapa hi vante leh leilung leh thil tinreng siamin J ehova hnenah a thawk a. A, chu chu Isua a ni!

A ni, Jehovan a Fapa nunna chu van atangin a la a, Mari kaw chhungah a dah a.Nausen dangte an nute kawchhunga an thang ang bawkin a thang nghal a. Mahse chu nausen chu Pathian Fapa a ni. A tawpah Isua chu Bethlehemah-ah heta bawng inah hian a piang ta a. Isua a piang tawh tih mipui hrilh thei khawpa vantirhkohte an hlim em emna chhan i hria em?