INCHHAWNG pindan an chhuahsan hnuah, Isua leh a tirhkohte chu Gethsemane huanah an kal a. Hetah hian a hmain vawi tam tak an lo kal tawh thin a. Isuan anni chu harh leh tawngtai turin a hrilh a. Tin tlema hla deuhvah a kal a, tawngtai turin a hmaiin lei a si a.

A hnuah Isua chu a tirhkohte awmna hmunah a lo kir a. Enge an lo tiha i rin? An hmuhil! Isuan an harh tur a ni tih vawi thum a hrilh a, mahse a lo kir apiangin muhilin a hmu a. A lo kir hnuhnung ber tum chuan Isuan: ‘Hetiang hurrah hian engtinnge in muthilh theih? Ka hmelmate hnena pek ka nihna tur darkar a thleng ta,’ a ti a.

Chumi lai tak chuan mipui tam tak thawm a hriat theih a. En teh u! Mite chu talhtum leh khandaih nen an lo kal! Anmahni en turin meichher an keng a. An hnaih deuh veleh mipui zing atangin tuemaw a lo chhuak a, Isua hnenah a lo kal a. Heta i hmuh ang hian a fawp a. Chu mi chu Juda Iskariota a ni! Engvanginnge Isua a fawh?

Isuan: Juda, fawpin mi mantir maw?’ tiin a zawt a. A ni, fawh chu chhinchhiahna a ni. Chu chuan Juda hnena mite chu, an mi duh Isua chu hei hi a ni tih a hriattir a. Tichuan Isua hmelmate chu amah man turin an pen chhuak a. Mahse Petera chuan bei ve lo chuan Isua a mantir dawn lo. A khandaih rawn ken chu a phawi a, a kianga mi chu a sat a. Khandaih chuan a lu a fuh lo deuh hlek a, a beng dinglam a hlawi a. Mahse Isuan chu mi beng chu a tawk a, a tidam leh ta a.

Isuan Petera hnenah: ‘I khandaih chu a dahnaah dah leh rawh. Mi chhandam turin ka Pa hnenah vantirhkoh sang tam tak ka ngen thei tih i ring lo em ni?’ a ti a. A ni, a thei! Mahse a hmelmaten amah an hruai hun a thleng tawh tih a hriat avangin, Isuan vantirhkohte tir turin Pathian a ngen lo. Chuvangin a inmantir a. Tunah Isua chungah enge thleng i en ang u.