ISUA chu Samaria-a tuichhunchhuah kiangah a chawl a. A zirtirte chu chaw lei turin khawpuiah an kal tawh a. Isuan a biak mek hmeichhia hi tui chawi turin a lo kal a. Isuan a hnenah: ‘In tur mi pe rawh,’ a ti a.

Hmeichhia chuan chu chu mak a ti em em a. A chhan i hria em? Isua chu Juda-mi a ni a, ani chu Samari-mi a nih vang a ni. Juda-mite tam berin Samari-mite an duh lo va. An hnenah tawng pawh an tawng lo va! Mahse Isuan hnam tinrenga mite a hmangaih a. Chuvangin: ‘In tur diltu che hi chu hria la chuan, amah i dil ang a, anin nun-pe thei tui a pe ang che,’ a ti a.

Hmeichhia chuan: ‘Ka pu, tuichhunchhuah a thuk si a, khaina lah i nei si lo va. Chu nun-pe thei tui chu khawia mi nge i hmuh ang?’ a ti a.

‘He tuichhunchhuaha tui hi i in chuan i tuihal leh ang a. Mahse ka pek tur tui chuan chatuanin mi a nuntir thei,’ tiin Isuan a hrilhfiah a.

Hmeichhia chuan: ‘Ka pu, chu tui chu mi pe ta che! Tichuan ka tui a hal leh ngai tawh lo vang a. Tin tui chawi turin hetah hian ka lo kal leh pawh a ngai tawh lo vang,’ a ti a.

Isuan tui taktak chungchang a sawi niin hmeichhia chuan a ring a. Mahse Pathian leh a ram chungchang thutak a sawi a ni. Chu thutak chu nunna pe thei tui a ni. Chatuan nunna mi a pe thei.

Isuan hmeichhia chu: ‘Kal la, i pasal va ko la lo kir leh rawh,’ tiin a hrilh a.

‘Pasal ka nei lo,’ tiin a chhang a.

‘I chhang dik e. Mahse pasal panga i nei tawh a, tuna i chenpui mipa hi i pasal a ni lo,’ Isuan a ti a.

Chung chu a dik vek vangin hmeichhia chuan mak a ti a. Chung chu Isuan engtinnge a hriat? E, Isua chu Pathian tirh, Tiam tawha chu a nih vangin Pathianin chu thu hriatna chu a pe a ni. Chuti lai chuan a zirtirte an lo kir a, Samari hmeichhia a bia chu mak an ti a.

Heng zawng zawng atang hian enge kan hriat? Isua chu hnam zawng zawnga mite chungah ngil a nei tih a tilang a. Keini pawh kan ni ve tur a ni. Eng hnama mi emaw an nih vang ringawtin mi thenkhat chu an tha lovah kan ngai tur a ni lo. Isuan chatuan nunnaa hruaitu thutak hre turin mi zawng zawng a duh a. Keini pawhin thutak hre turin mite puih kan duh tur a ni.