THIL rapthlak tak thleng hi en teh! Isua tihhlum mek a ni. Banah an khengbet ta. A kut leh a keahte kilhna an kheng lut a. Engvanginnge mi tupawhin Isua chungah chu chu an tih duh?

Mi thenkhatten Isua an huat vang a ni. Tute nge an nih i hria em? An zinga pakhat chu vantirhkoh suaksual Ramhuai Setana a ni. Adama leh Evi Jehova thu awih lohtir theitu kha a ni a. Setana chu he pawikhawihna rapthlak tak hi Isua hmelmate khawihtirtu chu a ni.

He bana Isua kilh beh a nih hma pawhin, a hmelmaten a chungah thil sual tak an ti a. Gethsemani huana lo kala amah an hruai bozia kha i hrereng em? Chung hmelmate chu tu te nge ni? A ni, sakhaw hruaitute an ni. A dawtah enge lo thleng leh i en ang u.

Sakhaw hruaituten Isua an man laiin, a tirhkohte an tlan bo va. An hlauh vangin a hmelmate nen chauh Isua chu an kalsan a. Mahse Tirhkoh Petera leh Johana an kal hla lo. Isua chungah enge thleng tih hmu turin an zui zel a.

Puithiamte chuan Isua chu puithiam lai ni thin Anna hnenah an hruai a. Chutah chuan mipui an awm rei lo. Isua chu tuna puithiam lai ni mek Kaiapha inah an kalpui leh a. A inah chuan sakhaw hruaitu tam tak an inkhawm a.

Heta Kaiapha inah hian a thu an rel a. Isua chungchanga dawt sawi turin mipui an rawn hruai lut a. Sakhaw hruaitute chuan an vaiin: ‘Isua chu tihhlum tur a ni,’ an ti a. Tin a hmaiah chi! an chhak a, an kuttumin an hnek a.

Chung zawng zawng chhung chuan, Petera chu pawnah kawt zawlah a awm a. Khaw vawh zan a ni a, chuvangin mipuiin mei an chhem a. Mei an ai lai chuan chhiahhlawh nulain Petera a en a: ‘He mi pawh hi Isua hnena awm thin a ni,’ a ti a.

‘Ni lo, ka awm lo!’ tiin Peteran a chhang a.

Isua hnenah a awm thin tih Petera hnenah miten vawi thum an sawi a. Mahse Petera chuan a dik lo tiin a pha ziah a. Peteran chutia a sawi vawi thumnaah chuan Isuan a lehhawia, amah a en a. Chung dawt thute a sawi avang chuan Peteran pawi a ti ta em em a, a kal hrang a, a tap ta a.

Zirtawpni zing ni chhuah tirhin, puithiamte chuan an inkhawmna hmun zau pui, Sanhedrin Hall-ah Isua an hruai a. Hetah hian a chungah enge an tih dawn tih an sawi a. Judai ram awptu Pontia Pilata hnenah an hruai a.

‘Hei hi mi tha lo a ni. Tihhlum tur a ni,’ tiin puithiamte chuan Pilata an hrilh a. Isua zawhna a zawh hnuah, Pilata chuan: ‘Thil dik lo engmah a tih ka hmu thei lo,’ a ti a. Tin Pilata chuan Isua chu Herod Antipas-a hnenah a kaltir a. Heroda chu Galili ram awptu a ni a, mahse Jerusalem-ah a cham a. Heroda pawh chuan Isua thil tih dik lo engmah a hmu bik lo va, chuvangin Pilata hnenah a kirtir leh a.

Pilata chuan Isua chhuah a duh a. Mahse Isua hmelmaten mi tang dang chhuah an duh zawk a. Chu mi chu suamhmang Baraba a ni. Tunah chhun lai vel a ni tawh a, Pilatan pawnah Isua a rawn hruai a. Mipui hnenah: ‘En teh u! ln lal hi!’ a ti a. Mahse puithiam lalte chuan: ‘Kal bopui rawh! Tihlum rawh! Tihlum rawh!’ tiin an au va. Chutichuan Pilata chuan Baraba a chhuahtir a, Isua chu tihhlum turin an hruai ta a.

Zirtawpni chawhnu hma takah Isua chu banah an khengbet ta a. Milemah hian anmahni i hmu lo va, mahse Isua sir lehlam lehlamah misual an khengbet ve vea. Isua thih hma lawkin, misual pakhat zawk chuan a hnenah: ‘I rama i thlen hunah mi hrereng ang che,’ a ti a. Tin Isuan: ‘Ka hnenah Paradis-ah i la awm ve ang tih ka tiam a che,’ tiin a chhang a.

Chu chu mak tih tham thutiam a ni lawm ni? Isuan eng paradis thu nge a sawi i hria em? A tira Pathian siam paradis kha khawiahnge a awm? A ni, lei chungah. Vana lalber nia Isuan a awp hunah, leilunga Paradis thar nuam chen turin he mi hi a tinung leh ang. Chu chu kan hlimpui thei em?