THIL rapthlak a thleng ta. Baptistu Johana tihhlum hlim a ni a. Lalber nupui Herodin a duh lo va. Lalber chu Johana lu a tantir thei a.

Isuan chu chu a hriatin a lungngai em em a. Amahin hmun fianrialah a kal a. Mahse mipuiin an zui a. Isuan mipuite a hmuhin, a khawngaih a. Chuvangin an hnenah Pathian ram chanchin a sawi a, an dam lote a tidam a.

Chumi tlai chuan a hnenah a zirtirte an lo kal a: ‘A tlai tawh si a, hei lah hi hmun fianrial a ni si a. Mipui hi anmahni tan khaw hnaiah chaw an lei theih nan kal botir ta che,’ an ti a.

‘An kal a ngai lo ve. Nangmahnin ei tur pe rawh u,’ tiin Isuan a chhang a. Philipa lam hawiin Isuan: ‘Heng mipui zawng zawng ei khawp chaw khawiahnge kan lei theih ang? tiin a zawt a.

‘Mi tinin tlem theuhva an ei tur lek pawh lei nan tangka tam tak a ral ang,’ tiin Philipan a chhang a. Andria a tawng chhuak a: ‘He kan chaw kengtu naupang hian chhang tlang panga leh sangha pahnih a nei a. Mahse heng mipui zawng zawng tan hian a tawk teuh lo mai,’ a ti a.

Isuan: ‘Hlobet chunga thu turin mipui hrilh rawh u,’ a ti a. Tin chaw atan Pathian hnenah lawmthu a sawi a, a phel nawi ta a. Zirtirten chhang leh sangha chu mipui zawng zawng hnenah an pe a. Mipa 5,000 leh hmeichhia leh naupang tam tak an awm a. An kham tawkin an ei theuh va. A bang chu zirtirten an khawmin bawm 12 khat a la awm a!

Isuan a zirtirte chu Galili Tuipui kan turin lawngah a luhtir a. Zanah thlipui nasa deuh a tleh a, tuifawnin lawng chu lehlam lehlamah a vawrh lang a. Zirtirte chuan an hlau em em a. Tin zanlaiah, tui chunga an lama tuemaw lo kal an hmu a. An hmuh chu enge ni tih an hriat loh vangin hlauvin an au va.

‘Hlau suh u, keimah ka ni e,’ Isuan a ti a. An la awih thei lo va. Tichuan Peteran: ‘Nangmah i nih tak tak chuan, Lalpa, i hnenah tui chunga kal turin min hrilh rawh,’ a ti a. Isuan: ‘Lo kal rawh!’ a ti a. Petera a chhuak a, tui chungah kein a kal ta a! Tin a hlau va, a pil dawn ta a, mahse Isuan a chhanhim a.

A hnuah Isuan mipui sang tam tak a hrai leh a. Chumi tum chuan chhang tlang pasarih leh sangha tlem te nen a ni. Mi zawng zawng tan tam deuh a awm leh a. Isuan mipui a enkawl dan chu mak tih khawp a ni lawm ni? Pathian ruat Lalber nia a awp hunah chuan engmah reng kan lungkham tawh lo vang.