NAUPANG nena inbia upate hi en teh. Jerusalem-a Pathian biak ina zirtirtute an ni. Tin naupang hi Isua a ni. A thang lian tawh hie. Tunah chuan kum 12-a upa a ni.

Isuan Pathian leh Bible-a ziah thil chanchinte chuti taka a hria chu zirtirtute chuan mak an ti em em a. Mahse engvanginnge Mari leh Josefa hetah an awm ve loh? Khawiahnge an awm? I hmu chhuak ang u.

Kum tin Kalhlen Kut an tih hmanna bik atan Josefan a chhungte Jerusalem-ah a kalpui thin a. Nazaret atanga Jerusalem chu zinna hla deuh a ni. Tumahin mawtawr an nei lo va, rel lah a awm si lo. Chung lai chuan an la nei lo va. Mi tam ber chu kein an kal a, Jerusalem thleng turin ni thum vel a duh a ni.

Tunah chuan Josefa chhungkua chu an ruai tawh a. Chuvangin enkawl tur dang Isua naute an awm a. Chumi kum chuan Nazaret zin kawng hla takah Josefa leh Mari chu an fate nen haw turin an kal chhuak tawh a. Isua chu mi dang zin vete hnenah awmin an ring a. Mahse khua a lo tlaia an chawlhin, Isua an hmu zo ta lo va. An laichinte leh an thiante hnenah an zawng a, mahse an hnenah a awm lo va. Chuvangin amah zawng turin Jerusalem-ah an kir leh a.

A tawpah hetah zirtirtute hnenah Isua an hmu a. An thu a ngaithla a, zawhnate a zawt a. Isua finzia chu mipui zawng zawngin mak an ti a. Mahse Mari chuan: ‘Naupang, engahnge hetia min tih ni? I pa leh keiin thlaphang takin kan zawng che a ni,’ a ti a. Engahnge mi zawn? Ka Pa inah ka awm tur a ni tih in hre lawm ni?’ tiin Isuan a chhang a.

A ni, Pathian chanchin a hriat theihna hmuna awm Isuan a duh a. Chu chu keini ngaihdan pawh a ni tur a ni lawm ni? Nazaret-a a hawin, Isua chu hapta tin Pathian be turin inkhawmnaahte a kal thin a. A ngaihsak reng avangin, Bible-a mi thil tam tak a hria a. Isua i ang ang u khai, entawn tur a siam chu i zui ang u.