HE HMEICHHE hmeltha tak hi Mari a ni. Nazareth khawpuia cheng Israel-nu a ni. Mi tha tak a nih Pathianin a hria a. Chuvangin a hnena thu sawi turin a vantirhkoh Gabriela a tir a. Mari hnenah eng hrilh turin nge Gabriela a lo kal i hria em? I en ang u.

Gabrielan a hnenah: ‘Chibai, nasa taka vohbik! I hnenah Jehova a awm,’ a ti a. He mi hi a hmain Marin a hmu ngai lo. Eng a tihna nge ni tih a hriat loh vangin a lungkham a. Mahse Gabrielan a hlauhna chu a tireh nghal a.

‘Mari, hlau suh. I chungah Jehova a lawm em em a ni. Chuvangin thil mak tak a tih sak dawn che a ni. Naute i nei thuai dawn a. Tin a hmingah Isua i sa tur a ni,’ a ti a.

Gabriela chuan a hrilhfiah zel a: ‘Chu naupang chu mi lian a ni ang a, Pathian Chungnungbera Fapa vuah a ni ang. Jehovan Davida ang khan, lalberah a siam ang. Mahse Isua chu chatuanin lalber a ni ang a, tin a ramin kin ni a nei lo vang,’ tiin.

Engtinnge chung chu a nih vek theih ang? Pasal pawh ka nei hlei nem. Mipa nen ka la cheng ngai lo va, chuvangin engtinnge naute ka neih theih ang?’ tiin Marin a zawt a.

Gabrielan: ‘I chungah Pathian thiltihtheihna a lo thleng ang. Chuvangin naupang chu Pathian Fapa vuah a ni ang,’ tiin a chhang a. Tin, ‘I laichin Elizabeti hrereng la. Mite chuan fate nei turin a upa lutuk tawh an ti a. Mahse tunah fa a nei thuai dawn. Chuvangin Pathian tih theih loh engmah a awm lo tih i hria e,’ tiin Mari a hrilh a.

Mari chuan: ‘Jehova bawinu ka ni! I sawi ang ngei chuan ka chungah thleng rawh se,’ a ti ta nghal a. Vantirhkoh chuan a kalsan ta a.

Mari chu Elizabeti tlawh turin hmanhmawhin a kal a. Elizabetin Mari aw a hriat veleh Elizabeti pum chhunga naute chu lawm avangin a che a. Elizabeti chu Pathian thlarauvin a khat a, Mari hnenah: ‘Hmeichhia azawnga a bika malsawm i ni,’ a ti a. Mari chu Elizabeti hnenah thla thum vel a awm a, Nazaret-ah a haw leh ta a.

Mari chu mi pakhat a hming Josefa nen innei tur a ni a. Mahse Josefan Marin naute a nei dawn tih a hriatin, nupuia neih tur niin a hre ta lo va. Tin Pathian vantirhkohvin a hnenah: ‘Mari hi nupuia neih hlau suh. Fapa petu chu Pathian a ni si a,’ a ti a. Tichuan Mari leh Josefa chu an innei a, Isua pian an nghak ta a.