HMEICHHIA leh mipa pahnihte hi tute nge ni i hria em? Hmeichhia hi Isua thian, Mari Magdalini a ni. Silhfen var inbel mipate hi vantirhkohte an ni. Marin a en he pindan te tak te hi, a thih hnua Isua ruang an dahna hmun a ni. Thlan in tih a ni. Mahse a taksa chu tunah a awm tawh lo! Tunge la? I en ang u.

Isua thih hnuah puithiamten Pilata hnenah: ‘Isua a nun lai khan ni thum hnuah kaihthawh a ni ang tih a sawi a. Chuvangin thlan chu ven ni turin thu pe rawh. Tichuan a zirtirten a taksa ruin mitthi zing ata kaihthawh a ni tih an sawi thei lo vang,’ an ti a. Thlan veng tur sipaite tir turin Pilatan puithiamte a hrilh a.

Mahse Isua thih hnu ni thumna zing deuhvah Jehova vantirhkoh a lo kal thut a. Thlan atangin lung a lum sawn a. Sipaite chuan an hlau khawp a, an che thei lo va. A tawpah, thlan chhung an han en chuan a taksa chu a awm tawh lo va! Sipai thenkhat khawpuiah an kal a, puithiamte an hrilh a. Puithiam tha loten enge an tih i hria em? Dawt sawi turin sipaite chu tangka an pe. Puithiamte chuan sipaite chu: ‘Kan muthilh hlanin zanah a zirtirte an lo kal a, a taksa chu an ru tiin sawi ang che u,’ tiin an hrilh a.

Chutih chhung chuan Isua thian hmeichhe thenkhatin thlan an tlawh a. A ruaka an hmu chu mak an va ti em! Thawkkhatah silhfen eng nen vantirhkoh pahnih an lo lang a. ‘Engvanginnge hetah Isua in zawn? tiin an zawt a. ‘Kaihthawh a ni tawh. Rang takin kal ula, a zirtirte hrilh rawh u,’ an ti a. Hmeichhiate tlan chakzia mai chu! Mahse kawngah mi pakhatin a dintir a. Tunge a nih i hria em? Isua a ni! ‘Ka ula, ka zirtirte hrilh rawh u,’ a ti a.

Hmeichhiaten Isua a nunga amah an hmu tawh tih zirtirte an hrilh chuan, zirtirte chuan awih harsa an ti a. Petera leh Johana chu mahni ngeia en turin thlanah an tlan a, mahse thlan chu a ruak a ni! Petera leh Johanan an kalsan hnuah, Mari Magdalini a awm hnufual a. Chumi lai chu a bih a. Hei hi vantirhkoh pahnih a hmuh lai chu a ni.

Isua taksa chungah enge lo ni i hria em? Pathianin a tibo. Pathianin Isua chu a thihna tisalam taksain nunnaah a kaitho lo. Isua chu, vana vantirhkohte neih ang thlaraulam taksa thar a pe a. Mahse a nung tih a zirtirte hmuhtir turin, kan la hriat tur angin, Isua chuan mite hmuh theih taksa a pu thei.