PAULA kuta khaidiat leh amah vengtu Rom sipai hi en teh! Paula chu Rom-ah mi tang a ni. Rom-mi Kaisaran amah chu engtia tih tur nge tia a relthluk hma chu a nghak a ni. Mi tang a nih chhungin, miten amah an tlawh phal a ni.

Rom-a Paula a thlen hnu ni thumah Juda hruaitute amah hmu tura lo kal turin a chah a. Chumi vang chuan, Rom-a Juda tam tak an lo kal a. Paulan an hnenah Isua leh Pathian ram chanchin a hrilh a. Thenkhatin an ring a, Kristian an lo ni a, mahse a then chuan an ring lo.

Paula chuan amah vengtu sipai dang dangte hnenah thu a hril bawk a. Heta a tan kum hnih chhungin Paulan a theih apiang hnenah thu a hril zel a. Chumi vang chuan, Kaisara chhungkua meuh pawhin Ram chanchin tha an ngaithla a, a then chu Kristian an lo ni ta a.

Mahse heta mikhual, dawhkana lehkha ziaktu hi tunge ni? I ring thei em? Aw, Timothea a ni. Timothea pawh Ram chanchin hril vangin tan inah a awm tawh a, mahse a chhuak leh tawh a. Tunah Paula tanpui turin hetah a lo kal a ni. Timothea hian enge a ziah i hria em? I en ang u.

Thawnthu 110-naa Philippi leh Ephesi khawpuite kha i la hrereng em? Chung khawpuiahte chuan Paulan Kristian kohhrante a dinpui a. Tunah tan ina a awm chhungin, chung Kristiante hnenah chuan Paulan lehkha a thawn a. Lehkhathawnte chu Bible-ah an awm a, Ephesi leh Philippi tihte hi an ni. Tunah Paula chuan Philippi-a Kristian thiante hnenah enge ziak tur tih Timothea a hrilh mek a ni.

Philippi mite chuan Paula chungah ngil an nei em em a. Tan inah a hnenah thilpek an thawn a, chuvangin Paulan lawmthu a hrilh a. Thilpek rawn kengtu chu Epaphrodita a ni. Mahse a dam lo vak a, a thi thelh a. Tunah a dam leh tawh a, haw a peih tawh a. Paula leh Timothea hnena mi he lehkhathawn hi Philippi-a a haw hunah a keng ang. Tan ina a awm chhungin Bible-a kan neih lehkhathawn dang pahnih Paulan a ziak a.

Pakhat chu Kolossa khawpuia Kristiante hnenah a ni a. Enge an vuah i hria em? Kolossa a ni. A dang chu Kolossa-a cheng ve bawk, a thian kawmngeih Philemona hnena mimal lehkhathawn a ni. Lehkhathawn chu Philemona chhiahhlawh Onesima chanchin a ni.

Onesima chu Philemona hnen atangin a tlan bo va, Rom-ah a lo kal a. Eng kawngin emaw Onesima chuan heta tan ina Paula awm chanchin a hria a. Tlawh turin a lo kal a, Paulan Onesima hnenah thu a hril a. Onesima pawh Kristian a ni ta thuai a. Onesiman a tlanbo chu pawi a ti ta a. Chuvangin Paulan Philemona hnena he lehkhathawnah hian enge a ziak i hria em?

Paulan Onesima ngaidam turin Philemona a ngen a. ‘I hnenah ka rawn hawtir a. Mahse tunah chuan i chhiahhlawh mai a ni lo. Kristian unau tha pawh a ni,’ tiin Paulan a ziak a ni. Kolossa-a Onesima a hawin heng lehkhathawn pahnih, Kolossa-mite hnena mi, leh Philemona hnena mi, hi a keng a. Philemonan a chhiahhlawh chu Kristian a ni tawh tih a hriat huna a lawm turzia chu kan ngaihruat thei.

Paulan Philippi-mite hnenah leh Philemona hnena a ziak laiin, chanchin tha tak tak a nei a. ‘ln hnenah Timothea ka rawn tir dawn a, Mahse kei pawhin ka rawn tlawh thuai ang che u,’ tiin Paulan Philippi-mite a hrilh a. Tin Philemona hnenah: ‘Khatah ka awmna tur hmun lo peihsa rawh,’ tiin a ziak a.

Paula chu chhuah a nihin hmun tam taka a Kristian unaute a kan a. Mahse Paula chu Rom-ah tantir a ni leh a. Tun tum chu tihhlum a ni dawn tih a hria a. Chuvangin Timothea lehkha a thawn a, rang taka lo kal turin a ngen a. ‘Pathian lakah ka rinawm tawh a, Pathianin lawmman mi pe ang,’ tiin Paulan a ziak a. Paula tihhlum a nih hnu kum tlem teah Jerusalem tihchhiat a ni leh a. Hemi tum hi chuan Rom-mite tihchhiat a ni.

Mahse Bible-ah tam zawk a la awm. Pathian Jehovan tirhkoh Johana chu a bu hnuhnung ber, Thupuan bu telin a ziaktir a. He Bible bu hian nakin!am chanchin a sawi a. Nakin lamah enge lo awm ang tih tunah i hria ang u.