HETA tirhkoh Paula hnena tlangval i hmuh hi Timothea a ni. Timothea chu a chhungte hnenah Lustra khuaah a cheng a. A nu hming chu Euniki, a pi chu Loisii an ni.

Hei hi Paulan Lustra a tlawh vawi thumna a ni. A hma kum khat emaw velah, thuhrila zinin Paula leh Barnaba hetah hian an lo kal tawh a. Tunah Paula chu a thian Sila nen an lo kir a ni.

Paulan Timothea hnenah enge a sawi i hria em? ‘Kei leh Sila hnena kal ve i duh ang em? Hmun hla taka mite hnena thuhrilnaah i tanpuina kan chhawr thei ang,’ tiin a sawm a ni.

‘Aw, ka kal duh e,’ tiin Timothean a chhang a. Tichuan chumi hnu lawkah chuan Timothean a chhungte a kalsan a, Paula leh Sila hnenah a kal ve a. Mahse an zinna chanchin kan hriat hmain, Paula chungah enge thleng i hmu chhuak ang u. Damaska kawnga a hnena Isua lo Jan chin kum 17 vel a ni tawh a.

Paula chu Isua zirtirte nghaisa tura Damaska-a a lo kal kha hrereng la, tunah chuan amah ngei pawh zirtir a ni tawh! A hnuah Isua chanchin a zirtir an duh loh vangin hmelma thenkhatin Paula tihhlum an tum a. Mahse tlan chhuak turin zirtirten Puala an pui a. Bawmah an khung a,khawpui kulh pawnah an thlak a.

A hnuah Puala chu thuhril turin Antiokei-ah a kal a.Chutah chuan lsua zuitute chu Kristian an vuah hmasa ber a.

Tin Paula leh Barnaba chu ram hla taka thuhrila zin turin Antiokei atangin tirh chhuah an ni ta a. An khawpui tlawh pakhat chu Timothea awmna Lustra chu a ni.

Tunah kum khat vel hnuah, Paula chu a zin vawi hnihnaah Lustra khuaah a lo kir leh a. Paula leh Sila hnena Timothea a kal chhuahin khawiahnge an kal i hria em? Map-ah hian en ula, hmun thenkhat i hria ang u.

A hmasain a kiang hnaia Ikonion-ah a kal a, chumi hnuah khawpui pahnihna a hming Antiokei-ah. Chumi hnuah Troas-ah an chho va, tin Philippi-ah, Thessalonika-ah leh Beroi-ah. Map-ah Atheni in hmu em? Chutah chuan Paulan thu a hril a. Chumi hnuah chuan Korinth-ah thu hril nan kum khat leh a chanve an hmang ral a. A tawpah, Ephesi-ah rei lote an cham a. Tin lawngin Kaisaria-ah an kir a, Antiokei-ah an chho va, chutah chuan Paula a cham a.

Chutiang chuan “chanchin tha” hrilnaah leh Kristian kohhran tam tak dinnaah Paula tanpuiin Timothea chu mel za tam tak a zin a. I than len hunah Timothea angin Pathian chhiahhlawh rinawm i ni ang em?