HETAH hian enge i hmuh? E, sakawr var chunga chuang sipai rual an ni. Mahse an lo kalna chhinchhiah teh. Sakawrte chu van atangin chhum chungah an lo tlan chhuk a. Vanah sakawr taktak an awm em ni?

Awm lo, heng hi sakawr taktak an ni lo. Chhum chungah sakawr an tlan theih loh avangin chu chu kan hria, an tlan thei em ni? Mahse Bible-in vana sakawrte chanchin a sawi si a. Engvanginnge a sawi i hria em?

Thawkkhat laiin sakawrte chu indonaa hman thin an nih vang a ni. Bible-in sakawr chung chuang van atanga lo chhuk a sawi hi, Pathianin lei chunga mite nena indona a nei dawn tih entirna mai a ni. Chu indona hmun chu enge an vuah i hria em? Armageddon a ni. Chu indona chu lei chunga that lohna zawng zawng tiboraltu tur chu a ni.

Isua chu Armageddon-a indona chu do va hma hruaitu tur chu a ni. Isua chu Jehovan A awpnaa lalber ni tura a thlan chu a ni tih hrereng la. Chuvangin Isuan lalber lukhum a khum a ni. Tin khandaihin Pathian hmelma zawng zawng a tihlum ang tih a tilang. Pathianin mi tha lo zawng zawng a tiboral dawn tih chu mak kan ti ang em?

Thawnthu 10-na en kir teh. Chutah chuan enge i hmuh? E, mi tha lo tiboraltu Tuilet ropui a ni. Chu Tuilet chu tunge thlentir? Pathian Jehovan. Tunah Thawnthu 15-na en teh. Chutah chuan enge thleng? Jehova tirh meiin Sodom leh Gomorra chu a tiboral a ni.

Thawnthu 33-na keu la. Aigupta-mite indona tawlailirte leh sakawrte chungah thleng en teh. Tuinnge an chungah tui luantir? Jehova a ni. A mite humhim nan a ti a ni. Thawnthu 76-na en teh. Jehovan ama mipui, Israel-mite pawh an that lohna avangin a tiboral tih chutah chuan i hmu ang.

Chuvangin, Jehovan lei chunga that lohna zawng zawng titawp turin a van lam sipai rual a tir ang tih chu mak kan ti tur a ni lo. Mahse chu chu eng tihna nge ni ang tih han ngaihtuah teh! A phek keu la i en ang u.