NAUPANG te tak te leh a thiante hian enge an chhiar i sawi thei em? Aw, he i chhiar mek lehkhabu hi a ni—Ka Bible Thawnthu Lehkhabu hi. Tin i thawnthu chhiar ngei hi an chhiar—“Chatuana Kan Nun Theih Dan“ tih hi.

Enge an zir i hria em? A hmasa berah chatuana kan nun dawn chuan Jehova leh a Fapa Isua chanchin kan hriat a ngai tih hi. Bible-in: “Hei hi chatuan nunna chu a ni. Pathian dik chauh leh leilunga a tirh a Fapa, Isua Krista chanchin hriat hi,’ a ti.

Pathian Jehova leh a Fapa Isua chanchin engtinnge kan hriat theih? Kawng khat chu, a bul atanga a tawp thlenga Ka Bible Thawnthu Lehkhabu chhiar hi a ni. Jehova leh Isua chanchin tam tak a sawi, a ni lawm ni? Tin thil an tih tawhte leh an la tih turte chanchin tam tak a sawi bawk. Mahse he lehkhabu chhiar mai aia tam kan tih a ngai.

Chhuata lehkhabu dang hi i hmu em? Bible a ni. He lehkhabua thawnthute chhuahna Bible-a mi chu i tan tuemaw chhiartir la. Kawng dika Jehova rawng kan bawl a, chatuan nunna kan neih theihna tura kan mamawh hriatna famkim chu Bible-in min neihtir a. Chuvangin Bible zir fo chu kan tih danah kan neih tur a ni.

Mahse Pathian Jehova leh Isua Krista chanchin hriat mai chu a tawk lo. Anmahni leh an thu zirtir chungchang hriatna tam tak kan nei thei a, chuti chung pawh chuan chatuan nunna kan chang lo thei. Eng dang nge ngai i hria em?

Thil kan hriatte nena inrema kan nun pawh a tul. Juda Iskariota i hria em? Isuan a tirhkoh ni tura a thlan 12 zinga pakhat a ni. Juda chuan Jehova leh Isua chanchin hriatna a ngah a. Mahse a chungah enge thleng? Rei loteah mahni hma a sial a, tangka 30-in a hmelmate hnenah Isua a mantir a. Chuvangin Juda chuan chatuan nunna a chang lo vang.

Thawnthu 69-a kan hriat tawh mi pakhat Gehazia i hre reng em? Ama ta ni lo silhfen leh tangka neih a duh a. Tichuan chung thilte neih nan dawt a sawi a. Mahse amah chu Jehovan a hrem a. Keini pawh a dan kan zawm loh chuan min hrem ve ang.

Mahse rinawm taka Jehova rawng bawl rengtu mi tha tam tak an awm. Anmahni ang nih chu kan duh dawn lawm ni? Naupang Samuela chu entawn tur tha a ni. Thawnthu 55-naa kan hmuh angin, a biak ina Jehova rawng bawl hna a thawh tanin kum li emaw nga emaw chauhva upa a ni tih kha hrereng la. Chuvangin, eng anga naupang pawh ni mah ula, Jehova rawng bawl turin in naupang lutuk lo.

Amaherawhchu, kan vaia zui kan duha chu Isua Krista a ni. Naupang a nih lai pawhin, Thawnthu 87-naa tihlan angin, mi dang hnenah vana a Pa chanchin sawiin biak inah a awm a. Keini pawh a tih ang chu i ti ve ang u. Kan Pathian ropui Jehova leh a Fapa, Isua Krista chanchin chu kan theih ang anga mi tam hnenah i hril ang u. Chung thilte chu kan tih chuan, leilunga Pathian paradis tharah chatuanin kan cheng thei ang.