PAULA chuan Kristiana a inleh hnuah Pathian Ram chanchin ṭha chu phûr takin a hril nghâl a—a hmaa dodâltu ni ṭhîn ngeia khân tûnah chuan dodâlna nasa tak a tâwk ta. He tirhkoh hah pawh hre lo hi mihringte tâna atîra Pathian thiltum thlen famkimtîr tûr Lalram chanchin ṭha chu theh darhin, hmun hla tak takah a zin kual nasa hle a ni.

Paula chuan thu hrila a zin chhuah hmasak ber ṭumin, Lustra khuaah pian tirh ata kebai pakhat a tidam a. Mipuite chu Paula leh a zinpui Barnaba chu pathiante tia kovin an au chhuak a. An hnêna inthâwina hlân lo tûrin mipuite chu an hmin thei hrâm a ni. Amaherawhchu, Paula hmêlmate’n an hmin avângin, a hnuah he mipuite ngei hian Paula chu lunga dêngin, thi tûrin an kalsan a. Paula chu a dam chhuak a, a hnuah chuan chu mi khuaah kîr lehin zirtîrte chu fuihna thu ṭha tak sawiin a tichak a ni.

Juda Kristiante chuan Juda mi ni lo ringtu lo ni tate’n Mosia Dân a ṭhen a zârte chu an zâwm tûr nia sawiin an hnial a. Jerusalem khuaa tirhkohte leh upa-hote hnêna chu harsatna thlen tûr chuan Paula chu a kal a. Pathian Lehkha Thu aṭanga ngun taka ngaihtuah-ho a nih hnuah, Pathian thlarau thianghlim kaihhruainain anni chuan kohhrante hnênah lehkha an thawn ta a; milem biakna te, sa thisen ei te, sa reh hlum ei te, leh inngaih te bânsan tûrin an hrilh a ni. Chûng thupêkte chu “thu pawimawh” a ni a; mahse, chûng thupêkte zâwm tûr chuan Mosia Dân zawm a ngai lo.—Tirhkohte 15:28, 29.

Paula chuan a zin vawi hnihnaah chuan Beroi khua a tlawh a, chu chu tûna Grik ram kan tih tâkah hian a awm a ni. Chu mi hmuna chêng Judate chuan thu chu lâwm takin an pawm a, a zirtîrna chu fiah tûrin nî tin Pathian Lehkha Thu an bih chiang ṭhîn. Dodâltute an rawn thawk leh a, tûn ṭumah erawh chuan Atheni khuaah a insawn a. Atheni mi lehkha thiam tak takte hmaah Paula chuan thusawi thiltithei tak mai a sawi a; chu chu remhriatna, hriatthiamna, leh thusawi thiamna kawnga entawn tûr ṭha tak a ni.

Paula chu thu hrila a zin vawi thumnaah chuan Jerusalem-ah a kal a. Chu mi hmuna biak in a va tlawh chuan, Juda tute emaw chuan buaina an chawk chhuak a, Paula chu thah an duh ta mai a. Rom sipaite chu lo inrawlhin, anni chuan Paula chu thu an zâwt ta a ni. Rom khua leh tui a nih angin, a hnuah chuan Rom Ram Awptu Felika hnênah a thiam thu a sawi a. Judate chuan Paula an puhnate chu a dik ngei a ni tih finfiahna an pe thei lo. Rom Ram Awptu dang Festa’n Juda mite kuta a pêk loh nân Paula chuan: “Kaisara hnênah ka thlen ang,” a ti a. Festa chuan: “Kaisara hnênah i kal mawlh ang,” tiin a chhâng a ni.—Tirhkohte 25:11, 12.

Tichuan, Paula chu a chung thu rêlsaka awm tûrin Itali ramah lawnga hruai a ni a. An zin kawnga an chuanna lawng a kehchhiat avângin, Mileti thliarkârah thlasik a hman phah ta a ni. A tâwp a tâwpa Rom khua a va thlen chuan ama in luah hawhah kum hnih a awm a. Sipaiho vênna hnuaiah awm mah se, he tirhkoh taima tak hian Pathian Ram chanchin chu amah tlawhtu zawng zawngte hnênah a hrilh chhunzawm zêl tho a ni.

—Tirhkohte 11:22–28:31 a ṭanchhan.