ISRAEL mite Kanaan rama an luh hma kum zabi engemaw zâtah, Pathian Jehova chuan chu ram chu Abrahama thlahte hnêna pêk a lo tiam tawh a. Tûnah chuan, Josua kaihhruaina hnuaiah Israelte chu Ram Tiam la tûrin an inpeih ta a ni.

Pathian chuan Kanaan mite chu tihboral tlâk niin an chungthu a rêl tawh a. Anni chuan chu ram chu mipat hmeichhiatna lama nungchang pawlawhna nasa tak leh thisen chhuahna nasa tak nên an chiahpiah hneh hle a. Chuvângin, Israelte’n an lâk Kanaan khawpuite chu tihchimih vek tûr a ni.

Amaherawhchu, chu ram chu an va luh hmain Josua chuan enthlatu pahnih a tîr a, anni chu Jeriko khuaa Rahabi inah an va lût a. Ani chuan enthlatute chu Israel mi an ni tih hre reng chungin, a inah luhtîrin a vênghim a ni. Rahabi chuan A mite chhan chhuah nâna Pathian Jehova thiltihte a lo hriat tawh avângin, Israelte Pathian chu a ring tlat a. Enthlatute chu amah leh a chhûngte tiboral lo tûrin chhia a chhamtîr a ni.

A hnua Israelte’n Kanaan rama Jeriko khua an rawn beih chuan, Pathian Jehova chuan mak tak maiin Jeriko kulh bangte chu a tichim ta rum rum mai a. Josua sipaite chuan hmanhmawh takin khawpui chu an tichhia a; mahse, Rahabi leh a chhûngkua chu an zuah a ni. Tichuan, Josua chuan kum ruk chhûng lekah Ram Tiam chhûnga hmun zau tak chu a la ta zung zung a. A hnuah chuan, ram chu Israel hnamte hnênah a sem a ni.

Josua chuan hun rei tak chhûng Pathian rawng a bâwl a; a thih dâwn hnaih lamah mipuite chu a ko khâwm a. Pathian Jehova’n an pi leh pute a dâwr dân a sawi chhuah hnuah, an zaa Pathian Jehova rawngbâwl tûrin a fuih a ni. Josua leh a ṭhian hnaite an thih hnuah erawh chuan, Israelte chuan pathian dik lote rawngbâwl tûrin Jehova chu an hnuchhawn ta a. Kum 300 vêl chhûng chu, Israelte chuan Pathian Jehova dânte chu an zâwm mumal lo hle. Chutih chhûng chuan, Pathian Jehova chuan a mite chu hmêlma Philistia leh hnam dangte awp beha an awm chu a phal a. Mahse, Israelte’n Pathian Jehova hnêna ṭanpui dîla an auh hunah, ani chuan rorêltu 12-te chu anmahni chhan chhuak tûrin a ruat ta a ni.

Bible-a Rorêltute lehkhabua chhinchhiah Rorêltute hun chu Othniela hunah inṭanin, nungdam tawhte zînga mi chak ber Samsona hunah a tâwp a ni. Chu mi lehkhabua thu chhinchhiah phûrawm taka lang nawn fo ṭhîn thudik chu hei hi a ni: Pathian Jehova thu âwih chu malsâwmna thlentu, âwih loh erawh chu chhiatna nasa tak thlentu a ni, tih hi.

—Josua; Rorêltute; Leviticus 18:24, 25 a ṭanchhan.