ISUA thih hnu a ni thum nîah chuan, a zirtîrte zînga mi hmeichhiate chuan thlân kawngkaa lung chu lum sawn a ni tih an hmu a. Chu bâkah, thlân lah chu a lo ruak bawk si!

Vântirhkoh pahnih an lo lang a. Pakhat zâwk chuan: “Isua, Nazaret mi . . . kha, in zawng a ni âwm a, a tho leh ta,” a ti a. (Marka 16:6) Tawi khawmuang hauh lovin, chûng hmeichhiate chu tirhkohte hnêna Isua thawh leh thu hrilh tûrin an tlân ta nghâl a. Kawngah chuan Isua an tâwk a. Ani chuan: “Hlau suh u, kal ta ula, Galili rama kal tûrin ka unaute va hrilh rawh u; chutah chuan mi hmu ang,” tiin a hrilh a ni.—Matthaia 28:10.

Chu mi nî tlai lamah chuan, zirtîr pahnihte chu Jerusalem aṭanga Emmau thingtlâng khaw lam panin kêin an kal a. Kal paha an ṭawng mawlh mawlh lai chuan hmêlhriat loh mi pakhatin a rawn ûm pha a, an thil sawi chu a zâwt a. Ani chu tho leh Isua ngei a ni a; mahse, tunge a nih an hriat nghâl theih loh tûrzâwngin a inlâr a ni. Lungngai takin Isua chungchâng an sawi thu an hrilh a. An mi hriat lohva chuan Pathian Lehkha Thu zawng zawnga Messia chungchâng ziakte chu a hrilhfiah ta a. Dik takin, Isua chuan Messia chungchânga hrilh lâwknate chu a kip a kawiin a tithleng famkim vek a ni. * Zirtîrte’n chu an hmêl hriat lohva chu Isua, thlarauva kaihthawh leha chu a ni tih an han hriat chuan, ani chu a bo leh ta a ni.

Chu zirtîr pahnihte chu rang takin Jerusalem-ah an kîr leh a. Chutah chuan tirhkohte kawngka inkalh hnan tlat chunga in pakhata an lo inhmu khâwm lai chu an va hmu a ni. Zirtîr pahnihte’n an thiltawn an sawi lai mêk chuan, Isua a lo inlâr a. A hnungzuitute chuan mak an ti ngei mai! Isua chuan: “Engah nge in rilruah rinhlelhna a lo awm?,” tiin a zâwt a. Tichuan, “Hetiangin ziak a ni, ‘Krista chuan hrehawm a tuar ang a, ni thum niin mitthi zîng ata a tho leh ang,’” tiin a sawi a ni.—Luka 24:38, 46.

Isua chu a thawhleh hnu ni 40 chhûngin, a zirtîrte hnênah hun hrang hrangah a inlâr a. Ṭum khat phei chu mi 500 aia tam hnênah a inlâr tlat mai! He mi ṭum hi a ni ngei ang, Isua’n an hnêna: “Kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tih mawhphurhna lian tak a pêk hi. “Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tiin an hnênah a hrilh bawk a ni.—Matthaia 28:19, 20.

Isua chuan a zirtîr rinawm 11-te nêna an inhmuh khâwm hnuhnûn ber ṭumah heti hian thu a tiam a ni: “Thlarau thianghlim chu in chunga a lo thlen hunah thiltihtheihna in la nei ang; tichuan . . . kâwlkil thleng pawhin ka thuhretute in ni ang,” tiin. (Tirhkohte 1:8) Chuti chuan, Isua chu lâk chhoh a ni a, vâna a lâwn chhoh chuan chhûmin a hliah a, an hmu thei ta lo va.

—Matthaia bung 28; Marka bung 16; Luka bung 24; Johana bung 20 leh 21; 1 Korinth 15:5, 6 a ṭanchhan.