ṬHEN 22
Tirhkohte Chuan Huaisen Takin Thu An Hril
Tihduhdahna hnuaiah pawh Kristian kohhran chu a ṭhang chak hle
ISUA vâna a lâwn aṭanga ni sâwm a liam hnuah, a zirtîr 120 vêlte chu C.E. 33-a Judate Pentikost Kût laiin Jerusalem-a in pakhatah an pung khâwm a. Thâwklehkhatah thlipui tleh ri anga ri ring tak chuan in chu a rawn tuam khat ta mup mai a. Zirtîrte chu an ṭawng hriat ngai lohvin mak tak maiin an ṭawng ta a ni. He thilthleng mak tak mai hi engvânga thleng nge ni? Pathianin zirtîrte hnêna thlarau thianghlim a pêk vâng a ni.
Pâwn lamah chuan, kût hmang tûra ram tam tak aṭanga lo kal mipui an pung khâwm a. Isua zirtîrte’n anmahni ṭawng ngei maia nâl taka thu an sawi an han hriat chuan mak an ti hle a ni. Thil awm dân chu sawiin, Petera chuan Pathianin a dawngtute chunga thilpêk mak tak mai petu tûr a thlarau a “leih” tûr chungchâng zâwlnei Joela hrilh lâwkna chu a sawi lang a ni. (Joela 2:28, 29) Thlarau thianghlim an dawnzia finfiahna thiltithei tak he thilthleng hian inthlâkthlengna pawimawh tak: Pathianin Israelte duhsak tawh lovin, Kristian kohhran din thar hlim chu a duhsak tawh zâwk tih a târ lang chiang hle. Pawm tlâka Pathian rawngbâwl duhte chu Krista hnungzuitu an nih a ngai ta a ni.
Chutih lai chuan, dodâlna pawh a zual chho zêl a, hmêlmate chuan zirtîrte chu tân inahte an khung a. Mahse, zânah Pathian Jehova vântirhkoh chuan tân in kawngka a hawng a, zirtîrte chu thu hril zawm zêl tûrin a hrilh a ni. Khawfîng a han chah chuan, chutiang chiah chuan an ti ta a. Biak inah an lût a, Isua chungchâng chanchin ṭha chu an zirtîr ṭan a ni. An sakhaw hruaitute chu an thin a rim hle a, thu hril tawh lo tûrin thu an pe a. Zirtîrte chuan huaisen takin: “Mihring thu aiin Pathian thu kan zâwm zâwk tûr a ni,” tiin an chhâng a ni.—Tirhkohte 5:28, 29.
Tihduhdahna a hluar chho zêl a. Juda mi ṭhenkhat chuan zirtîr Stephana chu Pathian sawichhiaah puhin, lungin an dêng hlum a ni. Tlangvâl pakhat—Tarsa mi Saula—chuan Stephana den hlum chu a remti a, a lo thlîr reng bawk a. A hnuah chuan Krista zuitu apiangte man tûrin Damaska khuaah a kal ta a ni. Kawnga a kal mêk laiin vân aṭanga êng lo chhuak chuan a vêl chu a chhun a; aw chuan: “Saula, Saula, nangin engatinge mi tihduhdah ni?” a ti a. Engin a chhun avânga mitdel Saula chuan: “Tunge i nih?” tiin a zâwt a. Aw chuan: “Isua . . . ka ni e,” tiin a chhâng a ni.—Tirhkohte 9:3-5.
Ni thum hnuah, Isua chuan Anania tih hmingpu zirtîr pakhat chu Saula mit tihmensak tûrin a tîr a. Saula chuan baptisma changin, Isua chanchin huaisen takin a hril ṭan a. Saula chu tirhkoh Paula tia hriat a lo ni ta a, Kristian kohhrana ṭhahnemngai tak a lo ni ta a ni.
Isua zirtîrte chuan Pathian Ram chanchin ṭha chu Juda mite leh Samari mite hnênah chauh an hril ṭhîn kha a ni a. Tûnah chuan, vântirhkoh pakhat chu Pathian ṭih mi Rom sipai mi lian Kornelia hnênah chuan a inlâr a; tirhkoh Petera chah tûrin a hrilh a ni. Petera chu mi dangin an zui a, ani chuan Kornelia leh a chhûngte hnênah chuan thu a hril a. Chutih lai chuan, thlarau thianghlim chu chuta awm Jentail ringtute chungah chuan a rawn thleng a, tirhkoh chuan anni chu Isua hminga baptisma chang tûrin a hrilh a ni. Tûnah chuan hnam tina mite hnênah chatuana nun neih theihna kawng chu a inhawng ta. Kohhrana mite chu hmun tina chanchin ṭha hril tûrin an inpeih ta a ni.
—Tirhkohte 1:1–11:21 a ṭanchhan.