LEIA Isua lo kal chhan ber chu eng nge ni? Amah ngeiin heti hian a sawi a ni: “Pathian ram chanchin ṭha ka hril tûr a ni, chu mi avâng chuan tirh ka ni si a,” tiin. (Luka 4:43) A thu hrilhnaa a thupui ber, Lalram chungchânga Isua zirtîr thil palite chu i lo ngaihtuah ang u.

1. Isua chu Lal atâna ruat a ni. Isua chuan sawi lâwk Messia a nihzia tlang takin a sawi a. (Johana 4:25, 26) Tin, zâwlnei Daniela hmuh inlârnaa Lalber a nihzia a târ lang bawk. Isua chuan a tirhkohte hnênah engtik nîah emaw chuan ‘ropuina lalṭhutphahah’ a ṭhu ang a, anni pawh lalṭhutphahah an la ṭhu dâwn tih a hrilh a ni. (Matthaia 19:28) Ani chuan he rorêltute awmna pâwl hi “pâwl tlêmte” tia a koh bâkah, chu mi pâwla tel lo “berâm dang” a neih thu a sawi bawk.—Luka 12:32; Johana 10:16.

2. Pathian Ram chuan rorêlna dik a awmtîr ang. Isua chuan Lalramin Pathian Jehova hming a tihzahawm, a nih loh leh a tihthianghlim bâkah, Eden huana helna a chhuah aṭanga Setana sawi chhiatna zawng zawng paih bo vekin, rorêl dik lohna nasa ber chu a tibo hlen dâwn tih a târ lang. (Matthaia 6:9, 10) Ani chuan mipa leh hmeichhia, hausa leh retheite hnêna thu hrilin, nî tin hleih neih lohna a lantîr bawk a. A rawn kal chhan ber chu Israelte zirtîr mah ni se, Samari mite leh Jentailte, a nih loh leh Juda mi ni lote a ṭanpui bawk a ni. A hun laia sakhaw hruaitute ang lo takin, hleih neihna emaw, duhsak bîk neihna emaw chhe tê pawh a lantîr lo.

3. Pathian Ram chu he khawvêla mi a ni lo. Isua hun lai chuan politics lamah buaina nasa tak a chhuak a. A pianna ram chu hnam dangte thuneihna hnuaiah a awm a ni. Mahse, mite’n a hun laia politics lam thila inhnamhnawihtîr an tum chuan, a kalsan a ni. (Johana 6:14, 15) Politician pakhat hnênah chuan: “Ka ram chu he khawvêla mi hi a ni lo,” tiin a hrilh a. (Johana 18:36) A hnungzuitute hnênah chuan: “Khawvêla mi in ni si lo,” tiin a sawi bawk. (Johana 15:19) Amah an vênhim nâna hriamhrei an chelek pawh a phal lo.—Matthaia 26:51, 52.

4. Krista chuan hmangaihnain ro a rêl ang. Isua chuan mite chawlhna pêk leh an phurritte tihzânsak a tiam a. (Matthaia 11:28-30) Chu a thutiam chu a hlen a ni. Lungkhamna hmachhawn dân te, inlaichînna tihṭhat dân te, hausak âtchilhna do dân te, leh hlimna zawn hmuh dânte chungchângah fuihna thu duhawm tak leh ṭangkai takte chu a pe a ni. (Matthaia, bung 5-7) Hmangaihna a lantîr avângin, mi chi tinrêngte’n pan nuam an ti a. Mite’n an hneh chhiah ber berte pawhin zahngai tak leh zahawm taka cheibâwl an ni dâwn tih inhriain, amah chu an pan a ni. Isua chu Rorêltu ṭha a va ni dâwn êm!

Mite hnêna Pathian Ram chungchâng Isua zirtîr dân thiltithei tak dang pawh a la awm a. Chu chu thilmak a tihte hi a ni. Engvângin nge Isua’n thilmak a tih? I lo en ang u.

Matthaia; Marka; Luka; Johana a ṭanchhan.