RORELTU ber leh a ram pum mai chuan Jehova chu an Lalchungnungber atâna pawmin A dânte zâwm ta se, nun chu eng ang nge a nih dâwn? A chhânna chu Lal Solomona’n kum 40 ro a rêl chhûng khân târ lan a ni.

Davida chuan a thih hmain a fapa Solomona chu amah thlâktu lalber atân a ruat a. Mumang lamah Pathian chuan Solomona chu a duhzâwng dîl tûrin a hrilh a. Solomona chuan dik tak leh fing taka mite ro a rêlsak theih nân finna leh hriatna a dîl a ni. A thil dîl chuan Pathian Jehova a tilâwm hle a, Ani chuan Solomona hnênah finna leh hriatthiamna thinlung a pe ta a. Chu bâkah, thu a âwih phawt chuan hausakna te, ropuina te, dam reina te thlenga pêk a tiam bawk a ni.

Solomona chu a rorêlna fing takte avângin a lo hmingthang ta hle a. Thu buai pakhatah chuan, nu pahnih chu mipa nausên pakhat nu nih an inchuh a. Solomona chuan nautê chu bung hniha bunga hmeichhe pahnihte hnêna sem tûrin thu a pe a ni. Nu pakhat chuan a remti a; mahse, a nu dik tak chuan nautê chu tihlum lova a chuhpuitu hnêna pe mai tûrin a ngên a. Solomona chuan a khawngaihtu hmeichhia zâwk chu a nu a ni tih a hre chiang ta a; chu nu hnênah chuan nautê chu a pe ta a ni. Israel zawng zawngte chuan lalber rorêl dân an han hriat chuan, Solomona hnênah Pathian finna a awm tih an hre ta a ni.

Solomona thiltih ropui ber pakhat chu, Pathian Jehova biak in—Jerusalem khuaa in ropui tak, Israel rama Pathian biakna hmunpui ber tûr—sak chu a ni a. Chu biak in hawnnaah chuan Solomona chu heti hian a ṭawngṭai a ni: “Ngai teh, vân leh vânte vânah pawh i leng lo a ni a; he ka insakah hian i va leng lo nasa lehzual âwm êm!” tiin.—1 Lalte 8:27.

Solomona hming chu Arabia hmuna Seba ram thlengin a thang ta a. Seba lalnu chu Solomona ropuina leh hausakna hmu tûrin leh a finna fiah tûrin a va zin vang vang a ni. Solomona finna leh Israel ram hausaknain lalnu thinlung a hneh êm avângin, chutianga mi fing tak lala ṭhuttîrtu Pathian Jehova chu a fak hial a. Pathian Jehova malsâwmna zârah, Solomona rorêl hun chhûng chu hmân lai Israelte chanchina an hausak lai ber leh an râl muan lai ber a ni tak meuh meuh a ni.

Mahse, lungchhiatthlâk takin Solomona chuan Pathian Jehova finna milin thil a ti chhunzawm zêl ta lo va. Pathian thupêk chu ngaihthahin, nupui a za têlin a nei a, chûng zîngah chuan hnam dang pathian betute pawh an tel a ni. A nupuite chuan a thinlung chu Pathian Jehova biakna ata milem biakna lamah zawi zawiin an hruai pêng ta a. Pathian Jehova chuan Solomona hnênah a ram chu a hnên ata lâk bo a nih tûr thu a hrilh a. Ṭhen khat chauh chu a pa Davida hnêna a thu lo tiam tawh avângin a thlahte’n an la chang chhunzawm ang. Solomona chuan biakna dik hnuchhawn mah se, Pathian Jehova chu Davida hnêna a Lalram thuthlung chungah chuan a rinawm reng tho a ni.

—1 Lalte 1-11; 2 Chronicles 1-9; Deuteronomy 17:17 a ṭanchhan.