JERUSALEM leh a biak in ropui tak hmuh theihna Oliv tlângah, Isua zirtîr palite chuan a thu lo sawi tawh chungchângah anmahni chauhvin Isua hnênah zawhna an zâwt a. Ani chuan Jerusalema biak in tihchhiat a nih tûr thu a sawi zo chiah a ni. Tin, chu mi hma pawh chuan, ‘khawvêl tâwpna’ chungchâng a lo sawi tawh bawk. (Matthaia 13:40, 49) Tûnah chuan tirhkohte chuan: “I lo kal lehna [“i lo awmna,” NW] leh khawvêl tâwpna chhinchhiahna chu eng nge ni ang?” tiin an zâwt a ni.—Matthaia 24:3.

Isua chuan a chhânnaah, Jerusalem tihchhiat a nih hmaa thil lo thleng tûrte chu a sawi a. Mahse, a thusawite chuan chu mi piah lam pawh a huam tel a ni. A thu hrilh lâwk chuan khawvêl pum puiah thlen famkimna nasa zâwk a nei ang. Isua chuan chhinchhiahna pakhat siamtu tûr thilthlengte leh khawvêl dinhmunte chu a sawi lâwk a. Chu chhinchhiahna chuan leia awmte hnênah chuan Isua’n vânah Lalna a chang tawh tih a hriattîr ang. Kawng danga sawi chuan, Pathian Jehova chuan Isua chu hun rei tak ata a lo tiam tawh Messia Lalrama Lal ni tûrin a siam tih chu chhinchhiahna chuan a târ lang ang. Tin, chu chhinchhiahna chu Lalramin suahsualna ti tâwpin, mihringte hnênah remna a lo thlen dâwn tawh tihna a ni bawk ang. Chuvângin, Isua sawi lâwk thilte chuan kal hmang hlui—tûna awm mêk sakhuana te, politics te, leh khawtlâng nun te—a tâwp ṭêp tawh a, a thara thlâk a ni ṭêp tawh bawk tih a hril dâwn a ni.

Isua chuan vân Lalber anga a ṭhut chhûnga thil lo thleng tûrte chu hrilhfiahin, leiah hian khawvêl puma indona te, ṭâm te, lîrnghîng nasa tak te, leh hrilêng te a awm dâwn tih a sawi a. Dân bawhchhiatna pawh a pung ang tih a sawi bawk. Isua zirtîr dik takte chuan leilung zawng zawngah Pathian Ram chanchin ṭha an hril dâwn bawk a ni. Hêng zawng zawngte hi tûn hmaa la thleng ngai rêng rêng lo ‘hrehawm nasa takah’ a tâwp ang.—Matthaia 24:21.

Engtin nge Isua hnungzuitute chuan chu hrehawm nasa tak chu a lo thleng dâwn tawh tih an hriat theih ang? Isua chuan ‘Theipui kûngah hian . . . zir rawh u,’ a ti a. (Matthaia 24:32) Theipui ṭang a lo no va, a hnah a lo chawr chuan, chu chu nipui a hnai tawh tih târ langtu mita hmuh theih chhinchhiahna a ni. Chutiang bawkin, Isua sawi lâwk zawng zawngte hun khat chhûnga a lo thleng hmuh chu, tâwpna a hnai tawh tih chhinchhiahna hai rual loh a ni ang. Pa Pathian tih chauh loh chu hrehawm nasa tak a lo thlenna tûr a nî leh a dârkâr hria tumah an awm lo. Chuvângin, Isua chuan a zirtîrte chu: “Inring renga awmin ṭawngṭai rawh u; a hun chu in hre si lo,” tiin a fuih a ni.—Marka 13:33.

—Matthaia bung 24 leh 25; Marka bung 13; Luka bung 21 a ṭanchhan.