ṬHEN 3
Tuilêtah Mi An Dam Khawchhuak
Pathianin khawvêl suaksual a tiboral a, Nova leh a chhûngte erawh a zuah
MITE an lo pun zêl chuan, leilungah hian sual leh suahsualna pawh a lo pung chak êm êm a. Chutih laia zâwlnei awmchhun a nih rinawm tak, Enoka chuan Pathianin amah ngaihsak lotute chu a tiboral dâwn tih mite hnênah a hriattîr a ni. Chutichung pawhin, sualna chu a tam êm êm a, dinhmun chu a chhe zual sauh va. Vântirhkoh ṭhenkhat chu vâna an awmna hmun kalsanin leiah mihring angin an rawn awm a, mihring fanute nupuia neiin Pathian Jehova lakah an hel ta a ni. Chûng inneihna pângngai lo tak aṭang chuan thlahpawlh fa—mi lian sual tak, Nephilim, tia vuahte chu an lo piang a, chûng chuan khawvêla tharum thawhna leh thisen chhuahna chu an tipung sauh va. Pathianin lei lama a thil siamte tihchhiat a nih dân a han hmuh chuan nâ a ti tak zet a ni.
Enoka a thih hnu chuan, chu khawvêl suaksual takah chuan mi pakhat, danglam fâl nalh mai a lo awm a. A hming chu Nova a ni. Amah leh a chhûngte chuan Pathian mithmuha thil dik tih an tum tlat a. Pathianin chutih hun lai khawvêla mi suaksualte tihboral a han tihtlûk tâkah chuan, ani chuan Nova leh leia thil nungte zuah chu a duh a. Chuvângin, Nova hnênah thingrem pianhmang ang nei lawng lianpui tuk tûrin a hrilh ta a ni. Chu mi chhûngah chuan lûtin, Nova leh a chhûngte chu thil nung chi hrang hrangte nên lam, lo thleng thuai tûr khawvêl pum huap tuilêtah an dam khawchhuak ang. Nova chuan Pathian thu a âwih a. Lawng a tuk chhûng kum 40 emaw, 50 emaw lai chu “felna thu hriltu” a ni bawk. (2 Petera 2:5) Tuilêt lo thleng tûr chungchângah mite a vaukhân a, mahse an âwih duh lo va. Nova leh a chhûngte chu thil nungte ruala lawnga an luh hun a lo thleng ta. A hnuah chuan Pathianin lawng kawngkhâr chu a khâr ta a. Ruah a lo sûr ta a ni.
Ruahpui vân âwn chu ni 40 leh zan 40 chhûng a sûr a, leilung zawng zawng chu tuiin a chîmpil ta vek a. Mi suaksualte chu an thi fai ta vek a ni. Tui a kâm tial tial a, thla tam tak a liam hnuah, lawng chu tlâng pakhat chungah a innghat a. Lawng chhûnga chuangte an han chhuah meuh chuan, a chhûngah kum khat zet hun an lo hmang der tawh a ni. Lâwmthu hrilh nân Nova chuan Pathian Jehova hnênah thil a hlân a. Pathianin leia nunna nei zawng zawngte chu tuilêtin a tiboral leh tawh dâwn lo tih thu tiamin a chhâng lêt a. Pathian Jehova chuan a thutiam thlamuanthlâk tak hriattîrtu atân leh nemnghettu hmuh theih atân chhimbâl a pe a ni.
Tuilêt hnu chuan, Pathianin mihringte hnênah thupêk thar ṭhenkhat a pe bawk a. Chu mi zîngah chuan sa ei phalna pawh a tel a ni. Amaherawhchu, thisen ei erawh a khap tlat a. Nova leh a thlahte chu lei hi luah khat tûrin thu a pe tel bawk a; mahse, ṭhenkhat chuan an âwih duh lo. Nimroda kaihhruaina hnuaiah mite chu inpumkhatin, Babel khawpuiah in sâng lian tak an sa ṭan a, chu khawpui chu a hnuah chuan Babulon tia koh a ni. An thiltum chu lei luah khat tûra Pathian thupêk do nân a ni a. Mahse, Pathianin chûng hel hmangte ṭawng chu a tihhransak a, ṭawng chi hrang hranga ṭawngtîrin, an thiltum chu a tihsukuksak a. An inbiak pawh theih tâk loh avângin, an thiltum chu kalsanin an darh ta vek a ni.
—Genesis bung 6 aṭanga 11; Juda 14, 15 a ṭanchhan.