ISRAEL leh Judai rama lalte an lal lai chuan, Pathian thu hrilh lâwktu mi ṭhenkhat an awm bîk a, anni chu zâwlnei an ni. Anni chu Pathian rorêlna thute puang chhuaktu rinna leh huaisenna namai lo nei an ni hlawm. Pathian zâwlneite sawi thu pawimawh palite chu lo ngaihtuah ta ila.

1. Jerusalem tihchhiatna. Pathian zâwlneite—a bîk takin Isaia leh Jeremia te—chuan Jerusalem chu tihchhiat leh rauhsan vek a ni ang tih a thlen hma hun rei tak aṭangin an lo vaukhân lâwk tawh a ni. Anni chuan chu khawpuiin Pathian thinurna tawh a phu chhan chu chiang takin an târ lang a. Jerusalema awmte’n Pathian Jehova aiawh anga an inchhâlna a dik lohzia chu an sakhaw dik lo thiltih te, an hlemhlêtna te, leh tharum thawhnate chuan a târ lang chiang hle a ni.—2 Lalte 21:10-15; Isaia 3:1-8, 16-26; Jeremia 2:1–3:13.

2. Biakna dik tun din lehna. Pathian mite chu kum 70 chhûng sala an tân hnuah Babulon lak ata chhuah zalên an ni ang a. An in leh lo rauhsan tâkah chuan kîr lehin, Jerusalema Pathian Jehova biak in chu an sa ṭha leh dâwn a ni. (Jeremia 46:27; Amosa 9:13-15) Isaia chuan chutiang a thlen hma kum 200 vêlah, Babulon mite hneha Pathian mite chu biakna dik tung ding leh tûra chhuah zalêntu tûr chu a hming nên lam a lo sawi lâwk tawh a ni—Lal Kura, tiin. Tin, Kura’n Babulon khawpui a lâk dân tûr dangdai tak pawh a kip a kawiin a sawi lâwk bawk.—Isaia 44:24–45:3.

3. Messia lo lanna leh a thiltawn tûrte. Messia chu Bethlehem khuaah a piang ang a. (Mika 5:2) Inngaitlâwm taka sabengtung chunga chuangin, Jerusalemah a lût dâwn a ni. (Zakaria 9:9) Mi nunnêm tak leh zahngai tak mah ni se, mite chuan an duh lo vang a, mi tam tak chuan an hnâwl ang. (Isaia 42:1-3; 53:1, 3) Tin, nunrâwng taka tihhlum a ni bawk ang. Chu chu Messia nun tâwpna a ni mai ang em? Ni mai lo ve, a inthâwina chu mi tam takte tân an sualte ngaihdamna tûr a ni si a. (Isaia 53:4, 5, 9-12) A thawhleh chauhvin chutiang chu a ni thei dâwn a ni.

4. Lei chunga Messia rorêlna. Mihring ṭha famkim lote chu remnain ro an inrêlsak thei lo va, mahse Messia Lal chu Remna Lal tia koh a ni ang. (Isaia 9:6, 7; Jeremia 10:23) A rorêlna hnuaiah chuan, mihring zawng zawngte inkârah leh thil siam nunna nei tinrêngte nêna an inkârah pawh remna a awm ang a. (Isaia 11:3-7) Dam lohna a awm tawh rêng rêng lo vang. (Isaia 33:24) Thihna pawh hi chatuana lem hlen a ni tawh ang. (Isaia 25:8) Messia rorêl chhûng chuan, mitthi tawhte pawh leiah hian an lo tho leh dâwn a ni.—Daniela 12:13.

—Isaia; Jeremia; Daniela; Amosa; Mika; Zakaria lehkhabute a ṭanchhan.