PATHIAN JEHOVA chuan engtik nîah emaw chuan a Fapa duh ber chu hrehawm tuara a thih a ngai dâwn tih a hria a. Genesis 3:15-a hrilh lâwkna thu chuan chu chu pehhêl deuhvin a târ lang a ni. Pathian chuan chu thihnain amah a tihhrehawm dân tûr chu mihringte hnênah a hriattîr thei em? Bible chuan mi pakhat leh a fapa chunga thilthleng chu min hrilhin, entîrna min pe a. Pathianin Abrahama chu a fapa Isaaka hlân tûrin a ngên a ni.

Abrahama chuan rinna nasa tak a nei a. Pathian chuan a sawi lâwk Chhan Chhuaktu, a nih loh leh Thlah chu Isaaka thlah aṭanga lo piang tûr a nih thu a tiam tih hre reng la. Pathianin a ṭûl chuan Isaaka chu a kaitho vang tih ring tlat chungin, Abrahama chu a fapa ngei hlân tûrin thu âwih takin a kal a. Mahse, Pathian tirh vântirhkoh pakhat chuan Abrahama chu a fapa a tihhlum hma chiahin a rawn dang ta a ni. A thil neih hlu ber phal taka a pêk avângin, Pathianin Abrahama chu a fak a, A thu lo tiam tawh chu a tiam nawn leh a ni.

A hnuah, Isaaka chuan fapa pahnih, Esauva leh Jakoba a nei a. Esauva ang lo takin, Jakoba chuan thlarau lam thil a ngaihlu a. Pathianin Jakoba hming chu Israela tiin a thlâksak a, Israela fapa 12-te chu Israel hnamte thlahtu an lo ni ta a ni. Mahse, engtin nge chu chhûngkua chu hnam ropui taka a lo chan?

Jakoba fapate’n an nau Josefa an han thîk tâkah chuan thil tam tak a lo thleng chho va. Salah an hralh a, Aigupta rama hruai a ni a. Mahse, Pathianin chu mipa naupang rinawm tak leh huaisen tak chu mal a sâwm a. Harsatna namai lo kârah, a tâwpah Aigupta lal Pharaoa chuan Josefa chu thu neihna nasa tak a chelhtîr ta a ni. Ṭâm tlâk avânga Jakoba’n a fapate zînga ṭhenkhat Aigupta rama ei tûr lama a tirh lai chuan, Josefa chu buh dah khâwl zawng zawngte chunga thu neitu ber a lo nih hman chiah avângin a remchâng hle! An thiltiha inchhîrna nei a unaute nêna hnuk ulh ṭeuh chunga an intawn hnu chuan, Josefa chuan anni chu a ngaidam a, an chhûngkuaa Aigupta rama pêm lût tûrin ruahmanna a siam ta a ni. An chhûngkuaa ṭhang chho va, an hausak chhoh theihna tûr ram ṭha tak pêk an ni a. A thiltumte a hlen chhuah theih nân a chunga thilthlengah Pathian a inrawlh tih Josefa chuan a hre thiam a ni.

Tar tawh tak, Jakoba chuan a chhûngkaw hung tak hualvêlin a dam chhûng hun chu Aigupta ramah a hmang ral a. A thih hma lawkah, a fapa Juda thlah aṭanga lo lang tûr thutiam Thlah, a nih loh leh Chhan Chhuaktu chu Rorêltu thiltihthei tak a ni ang tih a sawi lâwk a ni. Tin, Josefa pawhin kum tam tak a liam hnua a thih dâwn hnaihah, Pathianin Jakoba chhûngkua chu Aigupta ram ata a hruai chhuak dâwn tih a hrilh lâwk bawk a ni.

—Genesis bung 20-50; Hebrai 11:17-22 a ṭanchhan.