ISRAEL fate chu kum tam tak chhûng Aigupta ramah an khawsa a, an hausain an pung chak êm êm a ni. Amaherawhchu, Josefa hre lo Pharaoa thar a lo lal a. Chu rorêltu nunrâwng tak chuan Israel pung chak takte chu a hlau va, salah a siam ta a; tin, nausên mipa piang rêng rêng Nile Luipui-a paih vek tûrin thu a pe ta a ni. Mahse, nu huaisen tak pakhat chuan a fapa sên chu a vênghim a, bâwm chhûngah dahin phairuang zîngah a thukru a. Pharaoa fanu chuan chu nausên chu a hmu a, a hming atân Mosia a phuah a; tin, Aigupta lal chhûngkaw zîngah a châwm seilian ta a ni.

Kum 40 mi a han nih chuan, Mosia chuan Aigupta mi salte viltu kut ata Israel mi pakhat a chhan avângin buaina a tâwk a. Mosia chu ram hla takah tlân bovin, chutah chuan râl tlân angin a awm a ni. Kum 80 mi a nih chuan, Pathian Jehova chuan Mosia chu A mite chhuahtîr ngiat tûra Pharaoa hmaa inlan tûrin Aigupta ramah a tîr lêt leh ta a ni.

Pharaoa chuan a lo hnial fithla ṭhak a. Chuvângin, Pathian chuan Aigupta ramah hri sâwm a lêntîr ta a ni. Hri dang lo lêng tûr a pum pelh theihna hun remchâng pe tûra Pharaoa hmaa Mosia a va inlan apiangin, ani chu a luhlul hle a, Mosia leh a Pathian, Jehova thil ngen chu a ngaihthlâksak duh ṭhîn lo. A tâwpah chuan hri sâwmna chuan Pathian Jehova thu âwih a, an kawngka bianga inthâwina berâm thisen tâttu chhûngkuate fa tîr tiam lohvin, chu mi rama fa tîr zawng zawngte chu a tihlum vek a ni. Tiboraltu Pathian vântirhkoh chuan berâm thisen intahna inte chu a kal hlên a. Israelte chuan chu mi nî aṭang chuan he chhan chhuahna mak tak hi kum tina neih Kalhlên Kût-ah an hre reng a ni.

Pharaoa chuan a fapa piang hmasa ber a chân hnuah chuan Mosia leh Israel mi zawng zawngte chu Aigupta ram chhuahsan tûrin thu a pe a. A huhova Aigupta ram chhuahsan dân chu an ruahman ta nghâl a ni. Mahse, Pharaoa chuan a rilru a thlâk leh ta a. Indo mi sipai leh sakawr tawlailîr tam tak nên a ûm zui a ni. Israel mite chu Tuipui Sen kamah chuan dan beh niin an lang a. Pathian Jehova chuan Tuipui Sen chu a ṭhen hrang a, Israel mite chuan kulh bang anga a sîra lo ding tui inkâra lei chârah chuan kalin Tuipui Sen chu an kân ta a nih chu! Aigupta mite’n hmanhmawh taka an han ûm zui chuan Pathianin tui chu a inzawmtîr leh a, Pharaoa leh a sipaite chu an pil ta dial a ni.

A hnua Israel mite Sinai Tlâng bula an han inkulh chuan, Pathian Jehova chuan thu a thlunpui a. Mosia chu palai anga hmangin, Pathian chuan Israel mite hnênah an nun kawng engkim deuhthaw atân kaihruaitu leh vênghimtu dânte a pe ta a ni. Israel mite’n Pathian rorêlna rinawm taka an pawm chhûng chuan, Pathian Jehova chuan a awmpui ang a, chu hnam chu mi dangte tâna malsâwmna a nihtîr dâwn a ni.

Amaherawhchu, Israel mi a tam zâwkte chuan rinna an tlâk chham avângin Pathian an tilungni lo va. Chuvângin, Pathian Jehova chuan chu chhuan chu thlalêrah kum 40 chhûng a vahvaihtîr a ni. Tichuan, Mosia chuan mi dik tak Josua chu a aiawh tûrin a ruat a. A tâwpah chuan, Israel mite chu Pathianin Abrahama hnêna a lo tiam tawh rama lût tûrin an inpeih ta a ni.

—Exodus; Leviticus; Number; Deuteronomy; Sâm 136:10-15; Tirhkohte 7:17-36 a ṭanchhan.