JAKOBA leh Juda chu Isua unaute an ni a. Petera leh Johana chu Isua tirhkoh 12-te zînga mi an ni. Hêng mi palite hian Kristian Grik Pathian Lehkha Thua lehkha thawn pasarih lai an ziak a ni. Chûng lehkha thawn tinte chuan a ziaktu hming an pu vek a. Hêng lehkha thawna thâwk khum fuihna thute hi Kristiante chu Pathian Jehova leh a Lalram chunga rinawm reng tûra ṭanpuitu atâna tih a ni.

Rinna lantîr rawh. Rinna neia inchhâl mai a tâwk lo. Rinna dik tak chu thiltih nên a inkawp tlat a ni. Jakoba chuan: “Thiltihte tel lovin rinna . . . chu thi a ni,” tiin a ziak. (Jakoba 2:26) Fiahna tawh huna rinna lantîrna chuan chhelna a siam a. Chhel tûrin Kristian chuan Pathianin a pe ang tih ring tlat chungin a hnênah finna a dîl a ngai a. Chu chhelna chuan Pathian pawm a nihtîr a ni. (Jakoba 1:2-6, 12) Pathian betuin rinna avânga rinawmna a vawn hian, Pathian Jehova chuan a chhâng lêt ngei ang. Jakoba chuan heti hian a sawi a ni: “Pathian hnaih rawh u, tichuan anin a hnaih ang che u,” tiin.—Jakoba 4:8.

Kristian neih rinna chu thlêmna leh nungchang bawlhhlawh tûra thununna te dotîr thei tûr khawpin a chak tâwk tûr a ni a. Nungchang bawlhhlawhna hluar tak chuan Juda chu a Kristian unaute hnêna ‘rinna . . . lama ṭhahnem ngai’ tûra fuih tûrin a tur a ni.—Juda 3.

Nungchang thianghlim nei rawh. Pathian Jehova chuan amah betute chu kawng engkima thianghlim tûrin a beisei a. Petera chuan heti hian a ziak a ni: “In chêtzia zawng zawngah lo thianghlim zâwk rawh u; ‘Nangni in thianghlim tûr a ni, kei [Jehova] ka thianghlim si a,’ tih ziak a nih kha,” tiin. (1 Petera 1:15, 16) Kristiante chuan entawn tûr ṭha tak an nei a ni. Petera chuan: “Krista pawh khân a tuar sak che u avângin . . . a hniaka in zuina tûrin entawn tûr a hnutchhiah che u kha,” a ti. (1 Petera 2:21) Kristiante chuan Pathian tehnate mila an nun avângin tawrh phah thei mah se, “chhia leh ṭha hriatna thiang tak” an nei thung a ni. (1 Petera 3:16, 17) Petera chuan Kristiante chu Pathian rorêlna nî leh ‘a chhûnga felna awm’ khawvêl thar an nghah laiin, nungchang thianghlim leh Pathian ngaihsak thiltihte ti reng tûrin a fuih a ni.—2 Petera 3:11-13.

Hmangaihna lantîr rawh. “Pathian chu hmangaihna a ni,” tiin tirhkoh Johana chuan a ziak a. Ani chuan Pathianin a hmangaihna nasa tak lantîr nâna “kan sualte thupha chawina” ni tûra Isua a rawn tirh chu entîrna atân a la chhuak a ni. Chu chu Kristiante’n engtin nge an chhân lêt ang? Johana chuan: “Duh takte u, Pathianin chuti kauva min hmangaih chuan keini pawh kan inhmangaih tawn ṭheuh tûr a ni,” tiin min hrilhfiah a ni. (1 Johana 4:8-11) Chutiang hmangaihna lantîr dân kawng khat chu Kristian unau mi khualte chunga ṭhatna lantîr hi a ni.—3 Johana 5-8.

Chuti a nih chuan, Pathian Jehova betute chuan amah an hmangaihna chu engtin nge an lantîr ang? Johana chuan heti hian a chhâng a ni: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin. (1 Johana 5:3; 2 Johana 6) Chutiang chuan, Pathian thu âwihtute chuan ‘chatuan nunna neihtîr khawpin’ Pathianin a hmangaih chhunzawm zêl ang tih an ring tlat a ni.—Juda 21.

—Jakoba, 1 leh 2 Petera; leh 3 Johana; Juda lehkha thawn a ṭanchhan.