1. He lehkhabu i zir chian hnuah eng nge i ngaihtuah mai theih?

HE LEHKHABU i zir chhûng hian Pathian thutiam chatuan nunna te, mitthite dinhmun te, leh thawhleh beiseina te ang chi Bible thutak i zir ṭeuh tawh a. (Thuhriltu 9:5; Luka 23:43; Johana 5:28, 29; Thu Puan 21:3, 4) Jehova Thuhretute inkhâwmnaah i tel ṭan tawhin, biakna dik a ni tih i ring pawh a ni thei a. (Johana 13:35) Jehova nêna inṭhianna ṭha tak nei chhovin, a rawngbâwl tûrin thu tlûkna i siam ṭan tawh pawh a ni thei bawk. Chuvângin, ‘Pathian rawngbâwl tûrin tûnah eng nge ka tih ngai?’ tiin i ngaihtuah mai thei a ni.

2. Engvângin nge Ethiopia mi chuan baptisma chan a duh?

 ² Chu chu Isua hun laia Ethiopia mi ngaihtuahna a ni. Isua thawhleh hnu lamah, zirtîr Philipa’n a hnênah thu a hril a. Isua chu Messia a ni tih a hrilhfiah a ni. A thu zir chuan a rilru a khawih êm avângin: “En teh, heta hi tui a awm, baptisma channa tûr engin nge mi dâl kher?” tiin a sawi nghâl a ni.—Tirhkohte 8:26-36.

3. (a) Isua’n a hnungzuitute hnênah eng thu nge a pêk? (b) Engtin nge mi chuan baptisma a chan ang?

³ Bible chuan Jehova rawngbâwl i duh chuan baptisma i chang tûr a ni tih chiang takin a sawi a. Isua’n a hnungzuitute hnênah: “Hnam tina mi zirtîrahte siam ula, . . . baptis ula,” tiin a hrilh a ni. (Matthaia 28:19) Amah Isua ngei pawhin baptisma changin entawn tûr a siam a. A lûa tui theh mai ni lovin, tuia hnim pil a ni. (Matthaia 3:16) Tûn laiah Kristian pakhatin baptisma a chan hian tuia hnim pil, a nih loh leh hnim phûm tûr a ni.

4. I baptisma channa chuan mi dangte hnênah eng nge a hriattîr?

⁴ Baptisma i channa hian, Pathian ṭhian nih i duhin, a rawngbâwl i duh tak zet tih mi dangte a hriattîr a. (Sâm 40:7, 8) Chuvângin, heti hian i ngaihtuah mai thei, ‘Baptisma chang thei tûrin eng nge ka tih ngai?’ tiin.

5. (a) Baptisma i chan hmain eng nge i tih hmasak ngai? (b) Engvângin nge Kristian inkhâwmte chu a pawimawh?

⁵ Baptisma i chan hmain, Jehova leh Isua i hriat chian a ngai a. Chu chu Bible i zirna aṭangin i lo ti ṭan der tawh a ni. (Johana 17:3 chhiar rawh.) Mahse, chu chu a tâwk mai lo. Bible chuan Jehova duh zâwng ‘hriat famkimnaa kan khah’ a ngai tih a sawi a.  (Kolossa 1:9) Jehova Thuhretute inkhâwmte chuan Jehova nêna inlaichînna ṭha tak nei tûrin a ṭanpui ang che. Chu chu, inkhâwma i tel ziah a pawimawh chhan pakhat a ni.—Hebrai 10:24, 25.

6. Baptisma i chan hmain Bible thu eng zât nge i hriat ngai?

⁶ Jehova chuan baptisma i chan hmain Bible thu zawng zawng hre kim vek tûrin a beisei lo che a. Ethiopia mi pawh kha baptisma a chan hmaa thil engkim hre vek tûrin a beisei lo. (Tirhkohte 8:30, 31) Pathian chungchâng chu chatuana zir zawm zêl tûr a ni si a. (Thuhriltu 3:11) Mahse, baptisma chang thei tûr chuan Bible zirtîrna bulpuite i hriat a, i pawm a ngai a ni.—Hebrai 5:12.

7. Engtin nge Bible i zirna chuan a ṭanpui che?

⁷ Bible chuan: “Rinna lovin [Pathian] lâwmzâwng mi nih rual a ni lo,” tiin a sawi a. (Hebrai 11:6) Chuvângin, baptisma i chan hmain rinna i neih a ngai a ni. Bible chuan hmân lai Korinth khuaa awm mi ṭhenkhatin, Isua hnungzuite zirtîrna thu an hriat chuan, “an ring ve a, baptisma an chang” tih min hrilh bawk. (Tirhkohte 18:8) Chutiang bawkin, Bible i zirna chuan Pathian thutiamte bâkah sual leh thihna ata min chhanchhuak theitu Isua inthawina thiltihtheihna ring tûrin a ṭanpui che a ni.—Josua 23:14; Tirhkohte 4:12; 2 Timothea 3:16, 17.

8. Engin nge i thu zirte mi dangte hnêna hrilh tûrin chêttîr ang che?

⁸ Bible i zir belh a, chu miin a ṭanpui dân che i hmuh hian, i rinna a nghet lehzual ang a. I thu zirte mi dangte hnêna hrilh chu i duh bawk ang. (Jeremia 20:9; 2 Korinth 4:13) Mahse, tu hnênah nge i hrilh ang?

9, 10. (a) Tute hnênah nge i thu zirte chu i hrilh ṭan theih? (b) Kohhranho ruala thu hrilhnaah i tel duh chuan eng nge i tih ang?

 ⁹ I thu zirte chu i chhûng te, ṭhian te, ṭhenawm te, a nih loh leh i school kalpui te hnêna hrilh chu i duh mai thei a. Chu chu thil ṭha tak a ni; mahse, ngilnei tak leh hmangaihna nei takin hrilh ang che. A tâwpah chuan, kohhranho ruala thu hrilhnaah i tel ṭan thei ang. Thu hril tûra inpeih tawh nia i inhriat chuan, Bible zirpuitu che chu bia la, kohhran ruala thu hrilh rawngbâwlnaa tel i duh thu hrilh ang che. Ani chuan i inpeih tawh nia a hriat a, Bible tehnate milin i nung tawh nia a hriat bawk chuan ruahmanna a siam ang a, kohhran upa pahnih chuan in pahnihin an kâwm ang che u.

¹⁰ Chu in inhmuhnaah chuan eng nge thleng dâwn? Upate chuan Bible zirtîrna bulte i hre thiamin i ring a ni tih te, i nî tin nunah Bible sawite i nunpui a ni tih te, leh Jehova Thuhretu nih i duh tak tak a ni tihte hriat tumin an kâwm ang che. Upate chuan nang pawh tiamin, kohhrana awm zawng zawng chu an enkawl a ni tih hre reng la, anmahni biak chu hreh suh ang che. (Tirhkohte 20:28; 1 Petera 5:2, 3) In inkawm zawhah, kohhranho ruala thu hrilhnaa i tel ṭan theih leh theih loh an hriattîr ang che.

11. Engvângin nge kohhranho ruala thu hrilhnaa i tel ṭan hmain inthlâk danglamna neih chu a pawimawh êm êm?

¹¹ Upate chuan kohhranho ruala thu hrilhnaa i tel ṭan theih hmain inthlâk danglamna i neih belh a ngai tih an hrilh mai thei che a. Engvângin nge chutianga inthlâk danglam chu a pawimawh êm êm? Mi dangte hnêna Pathian thu kan hrilh hian Jehova ai kan awh vâng a ni a, amah chawimawi zâwngin kan nung tûr a ni.—1 Korinth 6:9, 10; Galatia 5:19-21.

12. Engvângin nge mi zawng zawng tân sual sim a ngaih?

¹² Baptisma i chan theih hmaa i tih ngai dang a la awm a. Tirhkoh Petera chuan: “In sualte thai bo a nih theih nân sim ula, hawi kîr leh rawh u,” tiin a sawi a ni. (Tirhkohte 3:19) Sim tih awmzia chu eng nge ni? Kan thil sual tihte avânga pawi tih tak zetna a ni a. Entîr nân, nungchang bawlhhlawhnaah i inhnamhnawih tawh ṭhîn a nih chuan, i sim a ngai dâwn a ni. Chu bâkah, thil dik tih i lo tum ṭâng ṭâng ṭhîn a nih pawhin, Pathian ngaihdamna dîl ngai mi sual kan nih vek avângin, i sim a ngai tho tho a ni.—Rom 3:23; 5:12.

13. “Hawi kîr” tih awmzia chu eng nge ni?

¹³ I thil tih sualte avânga pawi tihna neih chu a tâwk mai em? Tâwk mai lo. Petera chuan kan “hawi kîr” a ngai tih a sawi tel a. A awmzia chu tûn hmaa thil dik lo kan tihte bânsan a, thil dik kan tih ṭan a ngai tihna a ni. Chumi hre thiam tûrin, a vawi khatna atâna hmun pakhata zin chhuak angin han inmitthla teh. A hnu rei lovah, kawng dik lo i zawh tih i hre chhuak a. Eng nge i tih ang? Dingin, i hawi kîr ang a, tichuan kawng dikah i kal ang. Chutiang bawkin, Bible i zir hian, i inthlâk danglam ngai nungchang leh thil dangte i hmu chhuak mai thei a. Inhuam takin inthlâk danglam ngaite inthlâk thleng, a nih loh leh “hawi kîr” la, tichuan thil dik ti ṭan ang che.

14. Engtin nge Pathian hnênah i inpumpêk?

¹⁴ Baptisma i chan hmaa i tih ngai thil pawimawh tak dang leh chu mi mala Jehova hnêna inpumpêkna neih hi a ni a. Jehova hnêna i inpumpêk hian, a hnêna  i ṭawngṭainaah amah chauh be tûr leh a duh zâwng tih chu i nuna thil pawimawh ber nihtîr tûrin i tiam a ni.—Matthaia 4:10.

15, 16. Engin nge mi chu Pathian hnêna inpumpêk tûra chêttîr?

¹⁵ Jehova rawng bâwl tûra intiamna chu i hmangaih tak nêna dam chhûng nun hmang dûn tûra intiamna nên a inang a. Inngaizâwng nula leh tlangvâl chu han mittthla teh. Tlangvâl chuan nula chu a hriat chian poh leh a hmangaih zual sauh va, nupuia neih a duh ta a. Hei hi thu tlûkna pawimawh tak mah ni se, a hmangaihna chuan hreh miah lovin a siamtîr a ni.

¹⁶ Jehova chanchin i zir hian ani chu i hmangaihin, a rawngbâwlnaa theih tâwp chhuah chu i duh ta a. Chu chuan a rawngbâwl tûra ṭawngṭaia intiam tûrin a chêttîr che a ni. Isua hnungzui duhtute chuan ‘mahni hrehawm an pawisa tûr a ni lo’ tih Bible-in a sawi a. (Marka 8:34) Chumi awmzia chu eng nge ni? I nunah Jehova thuâwih chu i dah pawimawh ber tihna a ni. I duhnate leh i thiltumte aiin Jehova duh zâwng chu a pawimawh zâwk daih si a.—1 Petera 4:2 chhiar rawh.

17. Engvângin nge mi ṭhenkhat chu Jehova hnêna an inpumpêk loh?

¹⁷ Mi ṭhenkhat chu Jehova rawngbâwl tûra an thutiam hlen theih loh an hlauh avângin a hnênah an inpumpêk ngam lo. Jehova tihlunghnual an duh loh vâng, a nih loh leh a hnêna an inpumpêk loh hian an thiltihah Jehova’n mawh phurhtîr lo tûra an ngaih vâng a ni thei ang.

18. Engin nge Jehova tihlunghnual hlauhna eng pawh ngam tûrin ṭanpui ang che?

¹⁸ Jehova i hmangaihna chuan amah tihlunghnual  hlauhna eng pawh ngam tûrin a ṭanpui ang che. Amah i hmangaih avângin a hnêna i thutiam hlen tûrin theih tâwp i chhuah ang a. (Thuhriltu 5:4; Kolossa 1:10-12) Jehova duh zâwng tih chu harsa lutukah i ngai lo vang. Tirhkoh Johana chuan: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin a ziak si a.—1 Johana 5:3.

19. Engvângin nge Jehova hnêna inpumpêk chu i hlauh loh vang?

¹⁹ Jehova hnêna inpumpêk tûr chuan i ṭhat famkim a ngai lo. Ani chuan kan tih theih aia tam min phût ngai si lo va. (Sâm 103:14) Chu ai chuan, thil dik ti tûrin a ṭanpui zâwk ang che. (Isaia 41:10) I thinlung zawng zawngin Jehova ring la, “i kawngte chu a kawhhmuh zêl ang che.”—Thufingte 3:5, 6.

20. Pathian hnêna inpumpêkna i neih hnuah eng rahbi dang nge i rah ngai?

²⁰ Jehova hnêna inpumpêk tûra inpeih tawh niin i inhria em? Jehova hnêna i inpumpêk hnuah rahbi dang rap chho tûrin i inpeih ta a. Baptisma i chan a ngai tawh a ni.

21, 22. Engtin nge i rinna chu mipui hmaah ‘kaa i ṭan’ theih?

²¹ Jehova hnêna i inpumpêk tawh thu leh baptisma chan i duh tawh thu chu in kohhrana kohhran upate râwn khâwmtu coordinator chu hrilh ang che. Tichuan, ani’n upa ṭhenkhat chu nangmah nêna Bible zirtîrna bul berte ennawn tûrin ruahmanna a siam ang. I inpeih tawha an hriat chuan, lo awm tûr Jehova Thuhretute bial inkhâwmpui emaw,  regional inkhâwmpui emawah baptisma i chang thei tih an hrilh ang che. Chûng inkhâwmpuiah chuan baptisma awmzia hrilhfiahtu thusawi a awm ang a. Thusawitu chuan baptisma chang tûra inpete chu zawhna pahnih a zâwt ang. Chûng zawhnate chhânna hmangin i rinna chu mipui hmaah ‘kain i ṭan’ a lo ni ang.—Rom 10:10.

 ²² Tichuan, baptisma i chang ang a. Tuiah hnim phûm i ni ang. Baptisma channa chuan Jehova hnênah i inpumpêk tawh tih leh Jehova Thuhretu pakhat i ni tawh tih mi tinte chu a hriattîr ang.

23. ‘Pa leh Fapa leh thlarau thianghlim hminga’ baptis tih awmzia chu eng nge ni?

²³ Isua chuan a zirtîrte chu ‘Pa leh Fapa leh thlarau thianghlim hminga’ baptis an ni dâwn tih a sawi a. (Matthaia 28:19 chhiar rawh.) Chumi awmzia chu eng nge ni? Pathianin a duh zâwng hlen chhuah nâna a thlarau thianghlim a hman dân mai bâkah, Jehova thuneihna leh Pathian thiltuma Isua chanvo i pawm tihna a ni.—Sâm 83:18; Matthaia 28:18; Galatia 5:22, 23; 2 Petera 1:21.

24, 25. (a) Baptisma chuan eng nge a entîr? (b) Bung 19-ah eng nge kan sawiho vang?

²⁴ Baptisma chuan thil pawimawh tak a entîr a. Tuia hnim phûm i nihna hian, i tûn hma nun chu i thihsan, a nih loh leh i kalsan tih a entîr a. Tui aṭanga i lo chhuahna hian, Pathian duh zâwng ti tûrin nun thar i hmang ṭan dâwn tih a entîr a ni. Chu bâkah, tûn aṭangin Jehova rawng i bâwl tawh dâwn tih a târ lang bawk. Mihring emaw, pâwl emaw, a nih loh leh hna emaw tân i inpumpêk lo tih hre reng ang che. Jehova hnênah i nun i pumpêk zâwk a ni.

²⁵ I inpumpêkna chuan Pathian nêna inṭhianna ṭha tak nei chho tûrin a ṭanpui ang che. (Sâm 25:14) Hei hi baptisma changtu chu chhandam a ni ngei ngei dâwn tihna erawh a ni lo. Tirhkoh Paula chuan: “Nangmahni chhandamna thawk chhuak rawh u,” tiin a ziak a. (Philippi 2:12) Baptisma chu a ṭanna chauh a ni. Mahse, engtin nge Jehova i hnaih tlat theih ang? He lehkhabu bung hnuhnûng ber, bung 19-na hian chu zawhna chu a chhâng ang.