1, 2. Engvângin nge Bible hi Pathian thilpêk hlu tak kan tih theih?

I ṬHIAN tuemawin i beisei loh taka thilpêk a pêk che hian engtin nge i awm? Hawn hlân i nghâkhlelin, a ngaihtuah che vângin i lâwm a, a hnênah lâwmthu i hrilh ngei dâwn a ni.

² Bible hi Pathian thilpêk a ni a. Chutah chuan, hmun danga kan zawn hmuh theih loh kaihhruainate a chuang a ni. Entîr nân, Pathianin lei leh vân, leh mipa leh hmeichhe hmasa ber a siam thute min hrilh a. Buaina kan tawh huna ṭanpuina min pe thei thu bulte min pe bawk. Chu bâkah, Pathianin lei hi hmun ṭha zâwka siam tûra a thiltum a hlen dân tûrte pawh min hrilh bawk a ni. Bible chu thilpêk hlu a va ni tak êm!

3. Bible i zirna aṭangin eng nge i hmuh chhuah ang?

³ Bible i zirna aṭangin Pathianin a ṭhian ni tûrin a duh che tih i hmu chhuak ang a. A chungchâng i zir tam poh leh in inṭhianna chu a nghet lehzual sauh dâwn a ni.

4. Bible chungchângah engin nge i rilru la ber?

⁴ Bible chu ṭawng 3,200 chuanga lehlin a ni tawh a, bu tlûklehdingâwn tam tak chhut chhuah a ni tawh bawk. Khawvêla mi zâa 90 aia tamin mahni ṭawng ngeiin Bible an chhiar thei tawh a ni. Chawlhkâr tin hian mi maktaduai khat aia tamin Bible an lei a nih chu! Bible tluktu lehkhabu dang a awm lo tih chu a chiang hle.

5. Engvângin nge Bible hi “Pathian thâwk khuma pêk a ni,” kan tih theih?

⁵ Bible chu “Pathian thâwk khuma pêk a ni a.”  (2 Timothea 3:16 chhiar rawh.) Mahse, mi ṭhenkhat chuan, ‘Bible chu mihringte ziah a ni si a, engtin nge Pathian min pêk a nih theih ang?’ tiin an ngaihtuah mai thei. Bible chuan: “Miten thlarau thianghlim tirhin [a nih loh leh, kaihhruaiin] Pathian hnên ata an sawi zawk ṭhîn,” tiin a chhâng a. (2 Petera 1:21) Hei hi company neituin a hnathawktu hnêna a tâna lehkha thawn a ziahtîr ang hi a ni. Lehkha thawnah chuan pu ber ngaihtuahna leh kaihhruaina a tel a. Chuvângin, hnathawktu lehkha thawn ni lovin, pu ber lehkha thawn ngei a ni. Chutiang bawkin, Bible ziak tûra ngaihtuahna leh kaihhruaina petu chu Pathian a nih avângin, Bible chu a ziahtîr mihringte thu ni lovin, “Pathian thu” dik tak a ni.—1 Thessalonika 2:13; Endnote 2-na en rawh.

6, 7. Engvângin nge Bible chu a chhûng thu a inrem vek kan tih theih?

⁶ Bible ziah hun chhûng chu kum 1,600 aia tam a ni a. A ziaktute pawh hun khata dam tlâng an ni lo. A ṭhen chu lehkha thiam an nih rualin a ṭhen erawh an ni lo. Entîr nân, pakhat chu doctor a ni a. Mi dangte chu lo neitute, sangha mantute, berâm vêngtute, zâwlneite, rorêltute, leh lalte an ni. A ziaktute chu mi hran hran ni mah se, a chhûng thu erawh a inkalh lo. A vaiin thupui pakhat hnuaiah a inrem vek zâwk a ni. *

⁷ Bible-a bung hmasa lamte chuan khawvêla buaina a inṭan dân a hrilhfiah a, a bung hnuhnûng berte chuan lei hi paradis-a chantîrna hmangin chûng buaina zawng zawng a chinfel dân tûr min hrilh a ni. Bible-ah chuan kum sâng tam tak chhûnga mihringte chanchin a chuang a, chûngte chuan Pathian thiltum a thleng famkim ziah tih a târ lang a ni.

8. Bible chu science lam thilah a dik tih târ langtu entîrnate sawi rawh.

⁸ Bible chu science lam zirlaibu ni lo mah se, science lam thil a sawite chu a sual ngai lo. Chu chu Pathian min pêk lehkhabu aṭanga kan beisei tûr chu a ni. Entîr nân, Leviticus bu-ah chuan Israel mite hnêna natna inkaichhâwn theihte laka an indan dân tûr chungchânga Pathian kaihhruainate a chuang a. Hei hi mite’n mita hmuh theih loh natna hrik leh virus chi hrang hrangte’n natna a thlen theih dân an hriat hmâ daiha ziak a ni. Chu bâkah, Bible chuan lei chu engmah  lovah khai kân a nih thu min zirtîr bawk a. (Joba 26:7) Chuan, mi tam zâwkte’n leilung chu a phêk anga an ngaih laiin, Bible erawh chuan a mûm thu a lo sawi daih tawh bawk a ni.—Isaia 40:22.

9. Bible ziaktute rinawmna chuan eng nge min hriatthiamtîr?

⁹ Bible-in thilthleng chanchin a sawite chu a dik vek a. Mahse, thilthleng chanchin ziahna lehkhabu tam tak chu a ziaktute an rinawm loh avângin a dik vek lo. Entîr nân, indonaah an ram a tlâwm thute chu an ziak kim ngai lo a ni. Bible ziaktute erawh chuan Israelte an tlâwm thu chu rinawm takin an ziak a. Chu mai a ni lo, anmahni thil tihsualte ngei pawh an ziak bawk. Entîr nân, Mosia chuan Numbers bu-ah thil sual pawi tak a tih avânga Pathianin a zilh thu a ziak a ni. (Numbers 20:2-12) Bible ziaktute rinawmna chuan Bible hi Pathian min pêk a ni tih a târ lang a. Chuvângin, Bible hi ngaihngam takin kan ring thei a ni.

10. Engvângin nge Bible thurâwn chu tûn laiah a ṭangkai?

¹⁰ Bible chu “Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te . . . a sâwt bawk a ni.” (2 Timothea 3:16) Ni e, Bible thurâwn chu tûn lai hun tân a ṭangkai hle a. Jehova chuan siam kan nih dân a hriat avângin, kan ngaihtuahna leh kan rilru vei zâwngte chu a hria a ni. Mahni kan inhriat aiin min hre chiang zâwk a, hlim tûrin min duh bawk. Chu bâkah, kan tâna ṭha tûr leh ṭha lo tûr pawh a hre bawk a ni.

11, 12. (a) Eng thurâwn ṭhate nge Isua’n Matthaia bung 5 aṭanga 7-ah min pêk? (b) Eng thil dangte nge Bible aṭangin kan zir theih?

¹¹ Hlimna neih dân te, mi dangte nêna inrem taka awm theih dân te, ṭawngṭai dân te, leh sum leh pai  thlîr dân tûrte chungchânga Isua thurâwn pêk ṭha takte chu Matthaia bung 5 aṭanga 7-ah kan chhiar thei a. Hêng thurâwnte hi kum 2,000 kaltaa ziak mah ni se, tûn thlengin thil a la titheiin, a la ṭangkai reng a ni.

¹² Jehova chuan Bible hmangin chhûngkaw hlim zâwk nei tûr te, hnathawktu ṭha ni tûr te, leh mi dangte nêna inrem tûrtea min ṭanpuitu thu bulte chu min zirtîr bawk. Chu bâkah, kan nihna, kan chênna, leh kan harsatna tawhte chu eng pawh ni se, Bible thu bulte chuan ṭanpuina min pe thei a ni.—Isaia 48:17 chhiar rawh; Endnote 3-na en rawh.

13. Babulon khawpui chunga thilthleng tûr chungchângah Isaia’n eng nge a sawi?

¹³ Bible hrilh lâwkna tam tak chu a thleng famkim tawh a. Entîr nân, Isaia chuan Babulon chhiat tûr thu a hrilh lâwk a. (Isaia 13:19) Khawpui tihchhiat a nih dân tûr chipchiar takin a sawi a ni. Khawpui chu kulh lian tak leh a vêla luang luia vênhim a ni a. Mahse, Isaia chuan lui tui chu tihkang a ni ang a, kulh kawngkhârte pawh inhawng saa hnutchhiah a ni ang tih a sawi lâwk a. A rûntute chuan do ngai miah lovin khawpui chu an la ang a; tichuan, Babulon tichhetu tûr chu Kura a ni dâwn tih thlengin a sawi lâwk a ni.—Isaia 44:27–45:2 chhiar rawh; Endnote 4-na en rawh.

14, 15. Engtin nge Isaia hrilh lâwkna chu a thlen famkim?

¹⁴ He hrilh lâwkna thu ziah a nih aṭanga kum zahnih hnuah, Babulon bei tûrin sipai pâwl khat chu an rawn thawk chhuak ta a. An sipai hotu chu tu nge ni? Hrilh lâwk ang ngeiin Persia lal, Kura a ni. Hrilh lâwknaa tel thil dangte pawh chu a rawn thleng dik dâwn ta.

 ¹⁵ An beih zân chuan, Babulon mite chuan ruai an ṭheh a. An kulh bang hrawl takte leh hual vêltu lui avângin him hle niin an inhria a ni. Khawpui pâwnah erawh, Kura leh a sipaite’n lui tui a kâm theih nân tui lâk pênna tûr an lai a. Tui chu Persia sipaite kal kai theih khawpin a kâm ta. Mahse, engtin nge Babulon kulh chu  an pal tlang tâk ang le? Hrilh lâwknain a sawi angin, khawpui kawngkhârte chu a lo inhawng sa a; chuvângin, indo ngai miah lovin khawpui chu an la thei ta a ni.

16. (a) Babulon chungchângah Isaia’n eng nge a hrilh lâwk? (b) Engtin nge Isaia hrilh lâwkna chu a thleng dik tih kan hriat theih?

¹⁶ A tâwpah chuan Babulonah mi an awm tawh ngai lo vang tih Isaia chuan a hrilh lâwk a. “Engtikah mah chutah chuan mi an awm tawh lo vang a, chhuan awm chhûng zawng zawng chuan a chhûngah awm an awm hek lo vang,” tiin a ziak a ni. (Isaia 13:20) Chu chu a thleng dik em? Tûn hmaa Babulon awmna hmun, Iraq ram Baghdad khawpui chhim lam mêl 50 vêla hlaah chuan khawpui chhe hnu chauh a awm a. Vawiin nî thlengin tumah an awm lo. Jehova’n Babulon chu ‘tihboralna hmunphiahin a phiat’ a ni.—Isaia 14:22, 23.

17. Engvângin nge Pathian thutiam zawng zawng chu kan rin theih?

¹⁷ Bible hrilh lâwkna tam tak a thlen famkim tawh avângin, nakin hun atâna Bible sawi dangte pawh a thleng famkim ngei ang tih kan ring thei a. Jehova chuan lei hi paradis-a chantîr tûra a thutiam chu a thlen  famkimtîr ngei ang tih kan ring thei a ni. (Numbers 23:19 chhiar rawh.) Ni e, ‘Pathian, dâwt sawi thei lova’n khawvêl awm hmaa a tiam chatuana nunna’ chu kan beisei a ni.—Tita 1:1, 2. *

18. Engtin nge Paula’n “Pathian thu” chu a târ lan?

¹⁸ Bible ang lehkhabu dang a awm loh thu kan hre tawh a. A thute chu a inrem vek a, science lam leh thilthleng chanchin lam a sawite pawh a dik vek a ni. Thurâwn ṭha takte min pêk bâkah, thleng famkim tawh hrilh lâwkna tam tak a chuang bawk. Mahse, Bible chuan chu aia tam thil a ti a. Tirhkoh Paula chuan: “Pathian thu hi a nung a, thil a ti thei,” tiin a ziak a ni. Chu chuan eng awmzia nge a neih?—Hebrai 4:12 chhiar rawh.

19, 20. (a) Engtin nge Bible chuan i nihna dik tak hre tûra a ṭanpui theih che? (b) Engtin nge Pathian thilpêk Bible avânga i lâwmzia i lantîr theih?

¹⁹ Bible chuan i nun a thlâk danglam thei a. I nihna dik tak hre tûrin a ṭanpui thei che a ni. Chhûngrila i ngaihtuahna leh i rilru vei zâwng hre tûrin a ṭanpui thei bawk che. Entîr nân, Pathian hmangaih niin kan inhre mai thei a. Mahse, kan hmangaihzia târ lang tûr chuan Bible sawite kan nunpui a ngai a ni.

²⁰ Bible chu Pathian min pêk lehkhabu a ni tak meuh va. Ani chuan chhiar a, zir a, ngaina tûrin a duh che a ni. He thilpêk avânga i lâwmzia lantîrin, zir zawm zêl ang che. Tichuan, mihringte tâna Pathian thiltum chu i rawn hre thiam ang. Bung 3-naah, he thiltum chungchâng kan zir belh ang.