1, 2. Chhûngkuate tân Jehova’n eng nge a duhsak?

PATHIAN JEHOVA chu inneihna bul ṭantu a ni a. Hmeichhe hmasa ber a siam hnuah, “Adama hnênah a hruai” tih Bible chuan min hrilh a ni. Adama chuan a hlim êm avângin: “Hei zet chu ka ruh ang ruh neia, ka tisa ang tisa nei ngei chu a ni,” tiin a sawi chhuak a. (Genesis 2:22, 23) Heta ṭang hian Jehova’n nupate chu hlim tûrin a duh tih kan hre thei a ni.

² Lungchhiatthlâk takin, mi tam tak chuan chhûngkaw hlim an nei ngai lo. Mahse, Bible-ah hian chhûngkuaa mi tinte’n an chhûngkaw nun tihlawhtling tûr leh hlim taka an khawsakho theihna tûra ṭanpuitu thu bul tam tak a chuang a ni.—Luka 11:28.

3, 4. (a) Engtin nge pasal chuan a nupui chu a cheibâwl ang? (b) Engvângin nge nupate chu an inngaihdam tawn a pawimawh?

³ Bible chuan pasal ṭha chuan a nupui chu hmangaih tak leh zah takin a cheibâwl tûr a ni tih a sawi a. Khawngaihin Ephesi 5:25-29 chhiar rawh. Pasal chuan a nupui chu hmangaihna nei takin a cheibâwl reng tûr a ni a. Chu bâkah, a vênghimin, a enkawl bawk ang a, amah tina tûrin thil engmah a ti tûr a ni lo.

⁴ A nih leh, a nupuiin thil tisual ta se, eng nge a tih ang? “Pasalte u, in nupuite hmangaih reng ula, an lakah thin tichhe suh u,” tia hrilh an ni a. (Kolossa 3:19, NW) Pasalte u, nangni pawhin thil tihsual tam tak in nei tih hre reng rawh u. Pathian ngaihdamna dawn in duh chuan, in nupuite in ngaidam tûr a ni. (Matthaia  6:12, 14, 15) Inhuam taka an inngaihdam tawnna chuan nupate chu chhûngkaw hlim nei tûrin a ṭanpui ang.

5. Pasal chuan a nupui chu engvângin nge a chawimawi ang?

⁵ Jehova’n pasal chu a nupui chawimawi tûrin a beisei a. A nupui tisa lam leh rilru lam mamawh chu a ngaihtuah tûr a ni. Hei hi thil pawimawh tak a ni a. Pasalin a nupui a chawimawi loh chuan, Jehova’n a ṭawngṭainate chu a ngaihthlâksak lo vang. (1 Petera 3:7) Jehova chuan mipa leh hmeichhiaah duh zâwk a nei lo va. A tân chuan amah hmangaihtu apiang chu an hlu a ni.

6. Nupate “tisa pum khat” an ni tih awmzia chu eng nge ni?

⁶ Isua chuan nupate chu “pahnih an ni tawh lo va, tisa pum khat an ni tawh zâwk,” tih a sawi a. (Matthaia 19:6) An rinawm tawn reng tûr a ni a, engtikah mah an inphatsan tûr a ni lo. (Thufingte 5:15-21; Hebrai 13:4) Chu bâkah, mipat hmeichhiatna chungchângah pawh mahni hmasialna nei lovin an inngaihsak tawn tûr a ni. (1 Korinth 7:3-5) Pasal chuan “tuman mahni tisa an haw ngai si lo va, an châwmin an duat zâwk ṭhîn,” tih hi hre rengin, a nupui chu a hmangaihin a duat hle tûr a ni. Nupui chuan eng dang zawng aiin a pasal ngilneihna leh hmangaihna dawn chu a duh ber si a.—Ephesi 5:29.

7. Engvângin nge chhûngkua chuan lû a mamawh?

⁷ Chhûng tin hian thawhhona ṭha tak an neih theih nâna kaihruaitu tûr lû an mamawh a. Bible ngei pawhin 1 Korinth 11:3-ah: “Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni tih in hriat ka duh a ni,” tiin a sawi a ni.

8. Engtin nge nupui chuan a pasal chungah zah thiamna a lantîr theih?

⁸ Pasal thil tisual ngai lo an awm lo. Mahse, nupuiin a pasal thu tlûkna siam a thlâwp a, châk taka a thawhpui  hian chhûngkua chuan a hlâwkpui a ni. (1 Petera 3:1-6) Bible chuan: “Nupui pawhin a pasal zah thiam rawh se,” a ti a. (Ephesi 5:33, Mizo King James Bible) An rinna inang lo ta se, engtin nge ni ang? Chutiang hunah pawh a pasal chu a zah reng tho tûr a ni. Bible chuan: “Nangni nupuite u, mahni pasalte thu thuin awm rawh u; chutichuan an zînga tupawhin thu chu âwih lo mah sela, thu lovin an nupuite chêtziaa hnehin an awm thei ang, ṭih dêk [a nih loh leh, zah thiam] chunga in chêtze thianghlim enin,” tiin a sawi a ni. (1 Petera 3:1, 2) A entawn tûr ṭha siam chuan a pasal chu a rinna hre thiam tûr leh zahsak tûrin a ṭanpui thei a ni.

9. (a) Nupui chuan a pasal ngaih dân a ṭâwmpui loh chuan eng nge a tih ang? (b) Tita 2:3-5-ah nupuite tân eng thurâwn nge chuang?

⁹ Nupui chuan a pasal ngaih dân a ṭâwmpui loh hunah eng nge a tih theih? A ngaih dânte chu zah thiam takin a sawi tûr a ni a. Entîr nân, Sari’n Abrahama duh loh zâwng a sawi chuan, Jehova’n Abrahama hnênah: “Thu a sawi zawng zawng chu zâwm rawh,” tiin a hrilh a ni. (Genesis 21:9-12) Kristian pasal chuan Bible  kalhin thu tlûkna a siam khât viau ang a; chuvângin, nupui chuan a pasal chu a thlâwp tûr a ni. (Tirhkohte 5:29; Ephesi 5:24) Nupui ṭha chuan a chhûngkua a ngaihsak ngei ang. (Tita 2:3-5 chhiar rawh.) Chutianga a thawhrimna chu a pasal leh a fate’n an hmuh hunah chuan an hmangaihin an zah lehzual ngei ang.—Thufingte 31:10, 28.

10. Bible chuan awm hranna leh inṭhenna chungchângah eng nge a sawi?

¹⁰ Nupate chu awlsam takin an awm hrang emaw, an inṭhen emaw ṭhîn a. Mahse, Bible chuan: “Nupui chuan a pasal ṭhen suh se,” a tih bâkah, “Pasal chuan a nupui ma suh se,” tiin a sawi bawk a ni. (1 Korinth 7:10, 11) Chutichung pawhin, dinhmun khirh tak ṭhenkhat avângin nupate chu an awm hrang mai thei a; mahse, hei hi ngun taka ngaihtuah ngai thu tlûkna a ni. * Inṭhen chungchâng chu eng nge ni? Bible aṭanga inṭhen theih chhan awmchhun chu pasal emaw, nupui emawin mi dang nêna mipat hmeichhiatna a hman hian a ni.—Matthaia 19:9.

11. Naupangte chuan eng nge an mamawh ber?

¹¹ Nu leh pate u, in fate chu a tam thei ang berin hun hmanpui ang che u. In fate chuan an mamawh che u a, eng dang zawng aiin Jehova chungchâng zirtîrna pe tûrin an mamawh ber che u a ni.—Deuteronomy 6:4-9.

12. Nu leh pate chuan an fate vênghim tûrin eng nge an tih ang?

¹² Setana khawvêl hi a chhe zual sauh va, kan fate chu mipat hmeichhiatna lam thlenga khawih chhe duh mi ṭhenkhat an awm hial a ni. Nu leh pa ṭhenkhat chuan  mipat hmeichhiatna chungchâng an fate sawipui chu harsa an ti a. Mahse, chutiang mite lakah an fate an vaukhân a, an pumpelh theih dân tûr an zirtîr chu a ngai a ni. Nu leh pate u, in fate chu in vênghim tûr a ni. *—1 Petera 5:8.

13. Engtin nge nu leh pate chuan an fate chu an zirtîr ang?

¹³ Nu leh pate chuan an fate nungchang mawi zirtîr tûrin mawhphurhna an nei a. Engtin nge i fate chu i zirtîr theih ang? I fate chuan zirtîrna leh thununna an mamawh a; mahse, i thununna chu a râwngin a na  lutuk tûr a ni lo. (Jeremia 30:11) Chuvângin, i fate chu i thinur laiin thunun ngai suh ang che. I ṭawngkam chu i fate tinatu “khandaih chhun anga na taka mi chhun” thei nihtîr i duh si lo va. (Thufingte 12:18) I fate chu thu an âwih a ngaih chhan hre thiam tûrin zirtîr ang che.—Ephesi 6:4; Hebrai 12:9-11; Endnote 29-na en rawh.

14, 15. Engvângin nge naupangte chuan an nu leh pate thu an âwih ang?

¹⁴ Isua chuan a harsat hunah pawh a Pa thu chu a âwih reng a. (Luka 22:42; Johana 8:28, 29) Jehova’n naupangte chu chutiang bawka an nu leh pate thu âwih tûrin a beisei a ni.—Ephesi 6:1-3.

¹⁵ Naupangte u, in nu leh pate thuâwih harsa in tih hunah pawh thu in âwih hian Jehova leh in nu leh pate’n an lâwm che u tih hre reng ang che u. *—Thufingte 1:8; 6:20; 23:22-25.

16. (a) Engtin nge Setana chuan naupangte chu thil sual ti tûra a thlêm? (b) Engvângin nge Jehova hmangaihtute ṭhiana thlan chu a pawimawh?

¹⁶ Diabola chuan i ṭhiante leh naupang dangte chu thil sual ti tûra thlêm nân che a hmang thei a. Chu thlêmna chu do a har hle thei tih a hria a ni. Entîr nân, Jakoba fanu Dinaii chuan Jehova hmangaih lotu ṭhiante a nei a. Chu chuan amah leh a chhûngte chungah buaina lian tak tak a thlen a ni. (Genesis 34:1, 2) I ṭhiante’n Jehova an hmangaih loh chuan, Jehova huat zâwng thil ti tûrin an thlêm thei che a, chu chuan nangmah, i chhûng te, leh Pathian chungah lungngaihna tam tak a thlen thei a ni. (Thufingte 17:21, 25) Chuvângin,  Jehova hmangaihtu ṭhiante i zawn hmuh chu a pawimawh hle a ni.—1 Korinth 15:33.

17. Chhûngkuaa mi tinte chuan eng mawhphurhna nge an neih ṭheuh?

¹⁷ Chhûngkaw zînga mite’n Pathian kaihhruaina an zawm hian, harsatna leh buaina tam tak an pumpelh ṭhîn. Chuvângin, nupui nei i nih chuan i nupui chu hmangaih la, duat hle ang che. Pasal nei i nih chuan i pasal chu zah thiam la, a lakah intulût la; chu bâkah, Thufingte 31:10-31-a târ lan nupui ṭha hi entawn ang che. Nu emaw, pa emaw i nih chuan i fate chu Pathian hmangaih tûrin zirtîr rawh. (Thufingte 22:6) Pa i nih chuan i chhûngkua chu ‘fel takin’ kaihruai ang che. (1 Timothea 3:4, 5; 5:8) Naupangte u, in nu leh pate thu zâwm rawh u. (Kolossa 3:20) Chhûngkaw zînga mi tupawhin thil an tisual thei tih hre reng ula; chuvângin inngaitlâwm takin ngaihdam indîl tawn ang che u. Ni e, Bible-ah chuan chhûngkuaa mi tinte tân Jehova kaihhruaina a chuang a ni.