1, 2. Mi tam takin eng nge an zawh?

TUILIANIN khaw pakhat a tichhia. Silai keng pa pakhatin biak inah a hmet puak zut zut a, hliam tuar leh thi tam tak an awm. Cancer avângin nu ber chuan fa panga a thihsan.

² Hetianga leilung chhiatna leh thil râpthlâk tak takte a thlen hian mi tam tak chuan, “Engati nge?” tiin an zâwt ṭhîn. Khawvêla harsatna leh hrehawm tawrhna a tam êm êm chhan pawh an zâwt ṭhîn a. Hemi chungchâng hi i zâwt tawh em?

3, 4. (a) Eng zawhnate nge Habakuka’n a zawh? (b) Engtin nge Jehova’n a chhân?

³ Pathian chunga rinna nghet tak neite pawhin chutiang zawhnate chu an lo zâwt tawh ṭhîn tih Bible-ah kan hmu a. Entîr nân, zâwlnei Habakuka chuan Jehova hnênah: “Engati nge khawlohnate min entîra, thiltih dik lo takte hi i en reng?” tiin a zâwt a. Tichuan, inrawkna leh inpâwngnêknate a hmuh reng chhan leh inhauhna leh innghirnghona a tam chhante a zawh belh bawk a ni.—Habakuka 1:3.

⁴ Habakuka 2:2, 3-ah Pathianin Habakuka zawhnate a chhânsakna leh dinhmunte siam ṭhat a tiamna thu kan hmu a ni. Jehova chuan mihringte a hmangaih êm êm a. Chu bâkah, Bible chuan: “A ngaihsak ṭhîn che u,” a ti a ni. (1 Petera 5:7) A nihna takah chuan, Pathianin keini aiin hrehawm tawrhnate hi a haw zâwk a. (Isaia 55:8, 9) Chuvângin, Engvângin nge khawvêlah hrehawm tawrhna a tam êm êm? tih zawhna hi i lo sawiho vang u.

5. Sakhaw hruaitu tam tak chuan hrehawm tawrhna chungchângah eng nge an sawi? Bible hian eng nge min zirtîr?

⁵ Pastor-te, Father-te, leh sakhaw hruaitute chuan mihringte hrehawm tawrh hi Pathian duh zâwng niin an sawi ṭhîn a. Ṭhenkhat chuan thil râpthlâk takte leh kan chunga thil lo thleng rêng rêng hi Pathian ruatsa a ni a, a chhan erawh hriatthiam rual a ni lo, an ti a. A ṭhen ve thung chuan, Pathianin naupangte pawh tiamin mite chu a hnêna awm tûrin vânah a la ṭhîn niin an sawi a. Mahse, chu chu a dik lo. Jehova’n engtikah mah thil ṭha lote a thlentîr ngai lo. Bible chuan heti hian a sawi si a: “Pathian chuan thil suaksual tiin, Engkimtitheia chuan thil dik lo chu a ti teuh lo vang”!—Joba 34:10.

6. Engvângin nge mi tam tak chuan khawvêla hrehawm tawrhna zawng zawngah Pathian an mawhpuh?

⁶ Mi tam tak chuan Pathian chu khawvêl rorêltu a nih an rin avângin, hrehawm tawrhna zawng zawngah Pathian an mawhpuh a. Mahse, Bung 3-naa kan hriat tawh angin, khawvêl chunga rorêltu dik tak chu Diabol-Setana a ni.

7, 8. Engvângin nge khawvêlah hrehawm tawrhna a tam êm êm?

⁷ Bible chuan “khawvêl pumhlûm hi mi sual thu thuin a awm” tih min hriattîr a. (1 Johana 5:19) Khawvêla rorêltu Setana hi a râwng hle a, ‘khawvêl zawng zawng a bum’ a ni. (Thu Puan 12:9) Mi tam takin Setana an entawn a. Chu chu khawvêla inbumna te, inhuatna te, leh nunrâwnna te a tam êm êm chhan pakhat a ni.

⁸ Khawvêla hrehawm tawrhna a tam êm êm chhan dang pawh a awm a. Chu chu Adama leh Evi te an hel hun aṭangin, an fate hnênah sual an hlân chhâwng hi a ni. Chu sual avâng chuan, mite’n mi dangte hrehawm tawrhna an thlen ṭhîn. Mi dangte aia pawimawh zâwk  nih chu an duh ṭhîn a. Chuvângin, an inbei a, an indo va, mi dangte an hnehchhiah ṭhîn a ni. (Thuhriltu 4:1; 8:9) A châng chuan mite’n hrehawm an tawrh chhan chu “hun leh khawrêl,” a nih loh leh hriat lâwk lohva thilthlengte vâng a ni a. (Thuhriltu 9:11) Mite chuan a hun lo leh hmun lova an awm avângin accident leh chhiatna dangte an tâwk thei a ni.

9. Engvângin nge Jehova’n hrehawm tawrhna thlen zawm zêl phal chhan ṭha tak a nei ang tih kan chian theih?

⁹ Jehova’n hrehawm tawrhna a thlentîr ngai lo. Indona te, dân bawhchhiatna te, leh mi dangte’n dik lo taka min cheibâwlnate avângin amah kan mawhpuh tûr a ni lo. Lîrnghîng te, thlipui te, leh tui lian te ang chi chhiatnate chu Pathian thlentîr a ni lo. Mahse, heti hian i ngaihtuah mai thei, ‘Jehova chu lei leh vâna thiltithei ber a nih si chuan, engati nge thil ṭha lote chu thleng lo tûra a dan loh?’ tiin. Pathian chuan min ngaihsak tih kan hria a; chuvângin, hrehawm tawrhna thlen zawm zêl phal chhan ṭha tak a nei ngei ang.—1 Johana 4:8.

10. Engtin nge Setana’n Jehova a cho?

¹⁰ Eden huanah khân Diabola’n Adama leh Evi a bum a. Setana chuan Pathian chu Rorêltu ṭha lo niin a puh a ni. Pathianin Adama leh Evi lakah thil ṭha engemaw a thup niin a sawi a. Jehova aiin amah chu rorêltu ṭha zâwk a ni tih leh Pathian an mamawh lo tih rintîr a duh a ni.—Genesis 3:2-5; Endnote 26-na en rawh.

11. Eng zawhna nge kan chhân ngai?

¹¹ Adama leh Evi chu Jehova thu âwih lovin, a lakah an hel a. Thil dik leh dik lo chungchângah mahnia thu tlûkna siam thei niin an inngai a ni. Engtin nge Jehova chuan helte chu an dik lo tih leh kan tâna thil ṭha ber hretu a nihzia a târ lan theih ang?

12, 13. (a) Engvângin nge Jehova’n helte chu a tihboral nghâl loh? (b) Engvângin nge Jehova’n Setana chu he khawvêl rorêltuah leh mihringte chu mahnia ro inrêl a phalsak?

 ¹² Jehova’n Adama leh Evi chu a tiboral nghâl lo. Fa an neih a phalsak zâwk a. Chu bâkah, an fate’n an chunga rorêltu atân tu nge an duh tih chungchângah duh thlan theihna a pe bawk a ni. Jehova thiltum chu lei hi mi ṭha famkimte luah khahtîr a ni a, chu chu Diabola’n eng ang pawhin tihchhiat tum mah se, a thleng famkim ngei ang.—Genesis 1:28; Isaia 55:10, 11.

¹³ Setana chuan vântirhkoh maktaduai tam tak hmaah Jehova chu a cho va. (Joba 38:7; Thu Puan 5:11) Chuvângin, Jehova chuan Setana puhna chu a dik leh dik loh fiah nân hun a pe a. Mihringte hnênah pawh Pathian ṭanpuina tel miah lova an hlawhtlin theih leh theih loh târ lan nân, Setana kaihhruaina hnuaia mahnia ro inrêl tûrin hun a pe bawk a ni.

14. Hun liam tate khân eng nge a finfiah?

¹⁴ Kum sâng tam tak chhûng chu mihringte’n mahnia ro inrêl an tum tawh a; mahse, an hlawh chham ṭhak a ni. Hei hian Setana chu dâwtpa a ni tih a finfiah a. Mihringte’n Pathian ṭanpuina an mamawh tak zet a ni. Zâwlnei Jeremia thusawi hi a dik a ni: “Aw LALPA, mihring awm dân chu, mahni thu mai a ni lo tih ka hre ta; tungchhova kal mihringah hian, a pheikhai hruai tûr a awm lo.”—Jeremia 10:23.

15, 16. (a) Engvângin nge Jehova’n tûn thlenga hrehawm tawrhna awm zêl a la phal? (b) Engvângin nge Jehova’n Setana chawh chhuah buainate chu a chinfel loh?

¹⁵ Engvângin nge Jehova’n tûn thlenga hrehawm tawrhna awm a la phal? Engvângin nge thil ṭha lote hi a tihtâwp loh? Setana rorêlna a hlawhchhamzia finfiah nâna hun pêk a ngaih vâng a ni. Mihringte chuan  sawrkârna chi hrang hrang thlâkin hma an la a; mahse, an hlawhtling ngai lo. Science leh technology lamah nasa takin hma sâwn mah se, dik lo taka rorêlna te, retheihna te, dân bawhchhiatna te, leh indonate chu tûn hma zawng aiin a tam lehzual a ni. Pathian tel lo chuan, hlawhtling takin ro kan inrêl thei lo.

¹⁶ Mahse, Jehova chuan Setana chawh chhuah buainate chu a chingfel lo. Chingfel sela chuan, Setana rorêlna a thlâwp ang a ni dâwn a, chutiang chuan a ti ngai lo vang. Chu bâkah, mihringte chuan mahniin ro an inrêl thei tih Setana sawi chu a dikah an ngai ang. Mahse, chu chu dâwt a ni a, Jehova chuan chu dâwt thu a thlâwp lo vang. Dâwt a sawi ve ngai si lo va.—Hebrai 6:18.

17, 18. Setana thiltih chhiat zawng zawng chu Jehova’n engtin nge a tih ang?

¹⁷ Jehova chuan Setana leh mihringte helna avânga chhiatna lo thleng zawng zawngte chu a siam ṭha leh thei em? Thei e. Pathian chuan thil tih theih loh a nei lo. Jehova chuan Setana chona zawng zawngte chhân famkim a nih hun tûr chu a hria a. Tichuan, lei hi a nih tûr ang takin paradis-ah a chantîr ang. Chutah chuan hriatrengna ‘thlâna awm zawng zawng’ pawh a kai tho vek ang. (Johana 5:28, 29) Mite chu an dam lovin, an thi tawh ngai lo vang a. Isua chuan Setana thlentîr chhiatna zawng zawng chu a sût lêt leh vek dâwn a ni. Chu bâkah, Jehova chuan ‘Diabola hnathawhte tihboral’ nân Isua a hmang ang. (1 Johana 3:8) Jehova’n amah kan hriat nân leh kan chunga Rorêltu atâna amah kan thlan theih nân hun min pe a, a dawhtheihna avângin kan lâwm hle a ni. (2 Petera 3:9, 10 chhiar rawh.) Hrehawm kan tawrh hunah pawh tuar chhuak thei tûrin min ṭanpui a ni.—1 Korinth 10:13 chhiar rawh.

 ¹⁸ Jehova chuan Rorêltu atâna amah thlang tûrin min tilui lo va. Zalên taka duh thlan theihna min pe zâwk a ni. He thilpêk hlu tak hian kan tâna awmzia a neih dân chu i lo ngaihtuah ang u.

19. Eng thilpêk ropui tak nge Jehova’n min pêk? Engvângin nge he thilpêk avânga kan lâwm ang?

¹⁹ Jehova min pêk zalên taka duh thlan theihna hian ramsate lakah min tihrang nalh a. Ramsate chuan an pianpui finna hmang chauhvin thil an ti a; mahse, keini chuan kan nun dân tûr leh Jehova tihlâwm kan duh leh duh loh chungchângah duh kan thlang thei a ni. (Thufingte 30:24) Chu bâkah, a siamtute duan ang chauhva thil ti thei khâwl ang pawh kan ni lo. Kan nih duh te, ṭhian atâna kan duh te, leh nuna kan thil tih duhte chungchângah zalên takin duh kan thlang thei a. Jehova chuan hlim taka nun kan hman chu a duh a ni.

20, 21. Tûna i siam theih duh thlanna ṭha ber chu eng nge ni?

²⁰ Jehova chuan amah kan hmangaih chu a duh a. (Matthaia 22:37, 38) Ani chu a fapain tihluihna vâng ni lova, thinlung aṭanga, “Ka hmangaih che,” tia a sawi hre châktu pa ber ang a ni. A rawng kan bâwl leh bâwl loh tûr thu-ah zalên taka duh thlan theihna min pe a. Setana, Adama, leh Evi te chuan Jehova an thlang lo. Engtin nge i thilpêk dawn, zalên taka duh thlan theihna chu i hman ang?

²¹ Zalên taka duh thlan theihna i neih chu Jehova rawngbâwl nân hmang ang che. Setana hnâwl a, Pathian tihlâwm thlangtu mi maktaduai tam tak an awm a. (Thufingte 27:11) Pathianin hrehawm tawrhna zawng zawng a tihbo hun, khawvêl thara awm tûrin tûnah eng nge i tih theih? Bung 12-naah a chhânna kan hmu ang.