1. Khawi aṭangin nge nakin hun tûr kan hriat theih?

CHANCHIN thar i en hunah, ‘Hei aia chhe zâwk a awm thei dâwn em ni?’ tiin i ngaituah ngai em? Chhiatna leh nunrâwnna râpthlâk takte a tam êm avângin, mi ṭhenkhat chuan khawvêl tâwp kan hnaih tawh an ring a. Chu chu a dik em? Nakina thilthleng tûrte hriat theih dân kawng a awm em? Awm e. Keini mihringte chuan hre thei lo mah ila, Jehova chuan a hre thei a. Bible hmangin kan nakin hun leh leilung hmabâk chu min hrilh a ni.—Isaia 46:10; Jakoba 4:14.

2, 3. Isua zirtîrte chuan eng nge an hriat duh a, engtin nge Isua’n a chhân?

² Bible-a khawvêl tâwpna chungchâng kan chhiar hian, a sawi tum chu kan awmna a Lei tak tak tâwpna ni lovin, mi suaksualte tâwpna a ni a. Isua’n Pathian Ramin leiah ro a la rêl dâwn tih mite a zirtîr a ni. (Luka 4:43) A zirtîrte chuan Pathian Ram lo thlen hun tûr chu hriat an châk êm avângin, Isua hnênah: “Chûng chu engtikah nge a lo awm ang? I lo kal lehna leh khawvêl tâwpna chhinchhiahna chu eng nge ni ang?” tiin an zâwt a ni. (Matthaia 24:3) Isua’n a nî chiah chu a hrilh lo va; mahse, he khawvêl a tâwp hma lawka thilthleng tûrte chu a hrilh a. Chûng chu tûnah a thleng mêk a ni.

³ He bung 9-naah hian, khawvêl tâwpna hun hmâwr têah kan nung tawh tih târ langtu thilthlengte kan sawiho vang a. A hmasain, khawvêla dinhmun a chhiat  êm êm chhan kan hriat theih nân vâna indona chungchâng i lo zir ang u.

4, 5. (a) Isua Lal a nih hnu lawkah vânah eng thil nge thleng? (b) Thu Puan 12:12-a kan hmuh angin, Setana leia paih thlâk a nih khân eng thil nge thleng?

⁴ Bung 8-naah khân, Isua chu kum 1914-ah vânah Lal a nih thu kan zir tawh a. (Daniela 7:13, 14) Chumi huna thilthleng chu Thu Puan bu chuan heti hian min hrilh a ni: “Vânah chuan indona a lo awm a; Mikaela [Isua] leh a vântirhkohte chuan drakon [Setana] chu an do va; drakon leh a tirhkohte pawh chuan an do ve a,” tiin. * Setana leh a ramhuaite chu an tlâwm a, leiah paih thlâk an ni ta a. Vântirhkohte hlim tûrzia chu han mitthla teh! Mahse, leia mite chungah eng thil nge thleng ang? Bible chuan mihringte tâna hun khirh tak a nih tûr thu a sawi a. Engvângin nge? Diabola chuan “hun tlêm tê chauh a nei tih a inhriat” avângin.—Thu Puan 12:7, 9, 12.

⁵ Diabola chuan theih tâwp chhuahin leiah hian buaina a thlentîr a. Rei lo têah Pathianin a paih bo dâwn tih a hriat avângin a thinur hle a ni. Tûnah chuan, Isua’n ni hnuhnûng chhûnga thilthleng tûr a sawite chu i lo ngaihtuah ang u.—Endnote 23-na en rawh.

6, 7. Tûn laia indona leh ṭâm chungchângah eng nge kan sawi theih?

⁶ Indona. Isua chuan: “Hnam hrang leh hnam hrang an indo vang a, ram hrang leh ram hrang an indo vang,” tiin a sawi a. (Matthaia 24:7) Tûn laia indona  avânga thi zât chu mihring chanchina indona avânga thi zât aiin a tam zâwk a. Khawvêla thilthlengte zir chiangtu pâwl, Worldwatch Institute chuan kum 1914 aṭanga indona avânga thi chu mi maktaduai 100 an chuang tih a sawi a. Kum 1900 leh 2000 inkâr, kum 100 chhûnga indona avânga thi zât chu, a hma kum 1,900 chhûnga indona avânga thi zât aiin a lêt thumin a tam zâwk a ni. Indona avânga mi maktaduai tam takte tawrh manganna leh hrehawmna chu han ngaihtuah teh!

⁷ Ṭâmna. Isua chuan: “Ṭâmte a tla ang,” tiin a sawi a. (Matthaia 24:7) Tûn hma zawng aiin buh leh bâl thar tam zâwk ni mah se, mi tam tak chuan khamkhawp tûr an nei lo. Engvângin nge? A leina tûr emaw, a chînna tûr hmun emaw lei nâna sum an neih tâwk loh vâng a ni. Mi tlûklehdingâwn khat aia tamte chu ni khatah dollar khat pawh tling lovin an khawsa a. World Health Organization chuan kum tinin naupang maktaduai têlte chu an hrisêlna tham ei tûr khamkhawp an neih loh avângin an thi tih a sawi bawk.

8, 9. Lîrnghîng leh natna chungchânga Isua hrilh lâwknate a thleng dik tih engin nge târ lang?

 ⁸ Lîrnghîng. Isua chuan: “Lîr nasa takin a nghîng a nghîng ang,” tiin a sawi lâwk a. (Luka 21:11) Kum tin hian lîrnghîng na tak tak thleng tûra beisei a ni a. Kum 1900 aṭang khân, lîrnghîng vânga thi chu mi maktaduai hnih aiin an tam tawh a ni. Tûn lai thiamnate hmangin lîrnghîng tûrte hre lâwk thei tawh mah ila, mi tam takin an thihphah reng tho a ni.

⁹ Natna. Isua chuan “hri” a lên tûr thu a sawi lâwk a. Natna hlauhawm tak takte chu a darh chakin mi tam takin an thih phah a ni. (Luka 21:11) Doctor-te chuan natna tam tak enkawl dam thei tawh mah se, an tihdam theih loh natna tam tak a la awm cheu va. Chanchinbu pakhat chuan kum tin hian mi maktaduai tam takte chu TB te, sikserh te, leh tuihri te avânga an thih thu a sawi. Chu mai a ni lo, doctor-te chuan natna thar chi 30 lai an hmuh belh a, chûng zînga ṭhenkhat chu enkawl dam theih a ni lo.

10. Engtin nge 2 Timothea 3:1-5 hi tûn laiah a thlen famkim?

¹⁰ Bible chuan 2 Timothea 3:1-5-ah: “Ni hnuhnûngahte chuan hun khirh takte a lo awm ang,” tiin a sawi a. Tirhkoh Paula’n ni hnuhnûnga mi tam takte nungchang tûr chu a târ lang a ni. Mite chu hetiang mi an ni ang

• mahni inhmangaihtute

• tangka ngainatute

• nu leh pa thuâwih lote

• chapote

• hmangaihna pianpui nei lote

• insûm thei lote

• mi kawlhsente leh ṭha duh hauh lote

• Pathian aia mahni lâwmna hmangaihtute

• Pathian hmangaiha inchhâl a, a thu awih lotute

11. Sâm 92:7-a kan hmuh angin mi suaksualte chungah eng thil nge thleng dâwn?

¹¹ I awmna hmunah mi tam tak chu hetiang mi an ni em? Khawvêl pumah chutiang mi tam tak an awm a. Mahse, Pathianin hma a rawn la thuai dâwn. Ani chuan: “Mi suaksualte  hlobet anga an lo chawr a, thil tisualtute zawng zawng an lo duah hluah hluah hian, kumkhua atâna tihboralin an awm dâwn a lo ni ṭhîn,” tiin a sawi si a.—Sâm 92:7.

12, 13. Ni hnuhnûng chhûng hian Jehova’n eng nge min zirtîr?

¹² Bible chuan ni hnuhnûng chhûngin khawvêl chu na tawrhna leh hrehawm tawrhnain a khat dâwn tih a sawi lâwk a. Chutih rualin thil ṭhate pawh a thleng dâwn tih a sawi bawk.

¹³ Bible hriatthiamna. Zâwlnei Daniela chuan ni hnuhnûng chungchâng a ziahnaah: “Hriatnate a pung dâwn a ni,” a ti a. (Daniela 12:4) Jehova chuan a mite chu tûn hma zawng aia nasain Bible thu hriatthiamna a pe dâwn a ni. A bîk takin, kum 1914 aṭangin a pe ṭan a. Entîr nân, a hming pawimawhna leh leilung atâna a thiltumte min zirtîr mai bâkah, tlanna, thihna, leh thawhlehna chungchânga thutak hriatnate min zirtîr bawk a ni. Pathian Ram chauhvin kan buaina zawng zawng a chingfel thei tih kan hre tawh a. Hlimna neih theih dân leh Pathian duh zâwng anga nun theih dân kan hre tawh bawk. Mahse, Pathian chhiahhlawhte chuan an thu hriatte chu engtin nge an tih? Chu chu hrilh lâwkna dangin a chhâng a ni.—Endnote 20 leh 24-na en rawh.

14. Ram chanchin ṭha hrilhna chu eng angin nge a darh zau va, tute’n nge hril?

¹⁴ Khawvêl puma thu hrilh rawngbâwlna. Ni hnuhnûng chungchâng a sawinaah Isua chuan: “He Ram chanchin ṭha hi . . . khawvêl zawng zawngah hrilhin a awm ang,” tiin a sawi a. (Matthaia 24:3, 14) Tûnah, Ram chanchin ṭha chu ram 240-ah ṭawng 900 chuanga hrilh a ni tawh a. Khawvêl puma ‘hnam tin chi tin zînga mi’  Jehova Thuhretute chuan mite chu Lalram nihna leh chu miin mihringte tâna a tihsak tûrte hre thiam tûrin an ṭanpui a ni. (Thu Puan 7:9) He hna hi hlawh neia thawk an ni lo. Mi tam takte huat leh tihduhdah tuar mah se, Isua sawi lâwk ang ngeiin engmahin an thu hrilh rawngbâwlna chu a titâwp thei lo.—Luka 21:17.

15. (a) Ni hnuhnûngah kan awm tawh tih i ring em? Engvângin nge i rin? (b) Jehova thuawihtute leh awih lotute chungah eng thil nge thleng dâwn?

¹⁵ Ni hnuhnûngah kan awm tih i ring em? Ni hnuhnûng chungchânga Bible hrilh lâwkna tam tak chu a thleng famkim mêk a. Nakin lawkah Jehova chuan chanchin ṭha hrilhna chu a titâwp ang a, “tâwpna” chu a lo thleng ang. (Matthaia 24:14) Tâwpna chu eng nge ni? Chu chu Pathianin suahsualna zawng zawng a tihbo vekna tûr, Armageddon hi a ni. Jehova chuan Isua leh a vântirhkoh chak takte chu Amah leh a Fapa thu âwih duh lote tihboral nân a hmang ang. (2 Thessalonika 1:6-10) Chumi hnuah, Setana leh a ramhuaite chuan mite chu an hruai sual tawh lo vang. Pathian thu âwih duhte leh a Lalram pawma thlâwp zawng zawngte chuan Pathian thutiam zawng zawngte thlen famkimna chu an hmu ang.—Thu Puan 20:1-3; 21:3-5.

16. Tâwpna a hnaih tawh êm avângin eng nge i tih ngai?

¹⁶ Setana rorêlna hnuaia awm he khawvêl hi a tâwp thuai ang. Chuvângin, ‘Eng nge ka tih ngai?’ tia mahnia inzawh chu a pawimawh hle. Jehova chuan Bible thu a tam thei ang bera zir tûrin a duh che a. Chuvângin, i Bible zirna chu i ngai pawimawh hle tûr a ni. (Johana 17:3) Jehova Thuhretute chuan Bible hre thiam tûra mite ṭanpui nân chawlhkâr tinin inkhâwmte an nei a. Chûng inkhâwmahte chuan tel ziah tum ang  che. (Hebrai 10:24, 25 chhiar rawh.) Inthlâk danglam a ngai tih i hriat chuan, inthlâk danglam rawh. Chutianga i inthlâk danglam chuan Jehova nêna in inṭhianna chu a nghet zual sauh vang.—Jakoba 4:8.

17. Engvângin nge tâwpna a lo thlen hunah mi tam zâwk chuan mak an tih ang?

¹⁷ Tirhkoh Paula chuan mi suaksualte tihboralna chu “zânah rûkru angin,” mi tam takte beisei loh hunah a lo thleng dâwn tih a sawi a. (1 Thessalonika 5:2) Isua chuan mi tam takin ni hnuhnûnga kan awm tawhzia finfiahnate an ngaihsak dâwn lo tih a sawi lâwk a. “Nova dam lai ang bawk kha Mihring Fapa lo kal lehna [a nih loh leh, ni hnuhnûngte] chu a ni ang. Chûng nî tuilêt hmate chuan Nova lawnga a luh nî thlengin an eiin an bâr a, nupui pasal an innei ṭhîn; tui a lo lêt a, an zaa a lâk bo vek hma loh chuan engmah an hre lo va,” tiin a sawi a ni.—Matthaia 24:37-39.

18. Isua’n eng vaukhânna nge min pêk?

¹⁸ Isua chuan ‘ei puar lutukna, zu ruihna, leh dam chhûng khawsak ngaihtuahnate’ avânga kan rilru pêntîr lo tûrin min vaukhân a. Tâwpna chu “thang âwk angin” a lo thleng phut dâwn tih a sawi a. “Lei chung zawng zawnga awmte chungah chuan a thleng ṭheuh dâwn,” tih a sawi bawk. Chu bâkah: “Chutichuan chûng thil lo thleng tûr zawng zawng chu pumpelh tlâkah leh Mihring Fapa hmaa ding tlâka ruat in nih theihna tûrin, eng lai pawhin ṭawngṭai chungin ngaihven rawh u,” tiin a sawi belh a ni. (Luka 21:34-36) Engvângin nge Isua vaukhânna zawm chu a pawimawh êm êm? Nakin lawkah Setana khawvêl suaksual hi tihboral a ni tawh dâwn a. Jehova leh Isua pawm hlawhte chauh chu tâwpnaah dam khawchhuakin, khawvêl thara chatuana an nun dâwn vâng a ni.—Johana 3:16; 2 Petera 3:13.