BUNG THUM
Mihringte Tâna Pathian Thiltum Chu Eng Nge Ni?
1. Mihringte tâna Pathian thiltum chu eng nge ni?
PATHIAN chuan mihringte tân thiltum ropui tak a nei a. Mihring hmasa ber Adama leh Evi chu a siam a, huan mawi takah a dah a ni. Fate nei a, lei pumpui hi paradis-a siam a, thil nung tinrêngte an enkawl chu Pathian thiltum a ni.—Genesis 1:28; 2:8, 9, 15; Endnote 6-na en rawh.
2. (a) Engtin nge Pathian chuan a thiltum ang ngeiin a ti dâwn tih kan hriat theih? (b) Bible-in chatuana nun chungchâng eng nge a sawi?
2 Paradis-ah kan nung ve thei ang em? Jehova chuan: “Ka tum tawh a, ka ti bawk ang,” tiin min hrilh a. (Isaia 46:9-11; 55:11) A thiltum chu a tihlawhtling ngei ang a, engmahin a dang thei lo vang. Jehova chuan lei hi, “Engmah lovah a siam lo,” chhan neiin a siam a ni. (Isaia 45:18) Mite chu leilung luahkhat tûrin a duh a. Eng ang mite nge Pathianin he leia chêng tûra a duh a, engtia rei nge nung tûra a duh? Bible chuan: “Mi felte [a nih loh leh, thu âwihte] chuan ram hi an luah ang a, a chhûngah hian kumkhuain an awm ang,” tiin a sawi a ni.—Sâm 37:29; Thu Puan 21:3, 4.
3. Mihringte kan nata kan thih ṭhin avângin, eng zawhna nge lo chhuak?
3 Mahse, tûn laiah mite chu an dam lovin an thi a. Hmun tam takah chuan indona leh inthahnate a thleng bawk. Chutiang chu Pathian thiltum a ni lo. A nih chuan, engvângin nge chûng thilte chu a thlen? Chu chu Bible chauhvin min hrilhfiah thei a ni.
PATHIAN HMELMA
4, 5. (a) Eden huana rûl hmanga Evi betu chu tu nge ni? (b) Engtin nge mi rinawm tak chu rûkru a lo nih theih?
4 Bible chuan Pathianin “Diabola leh Setana an tih” hmêlma a neih thu min hrilh a. Setana chuan Eden huana Evi biak nân rûl a hmang a. (Thu Puan 12:9; Genesis 3:1) Rûl chu thusawi thei angah a lantîr a ni.—Endnote 7-na en rawh.
5 A nih leh, Diabol-Setana chu Pathian siam a ni em? Ni lo! Pathianin Adama leh Evi tâna leilung a buatsaih laia awm ve vântirhkoh pakhat mai a ni zâwk a, a hnuah Diabola-ah a insiam a ni. (Joba 38:4, 7) Chu chu engtin nge a nih theih? Awle, engtin nge mi rinawm tak chu rûkru a lo nih theih? Rûkru ni saa piang chu a ni lo. Mahse, a neih theih loh tûr thil a awt a, neih a duh ta tlat a. Chumi ringawt a ngaihtuah avângin, a châkna dik lo chu a lo ṭhang lian ta a. Tichuan, remchâng hmasa berah thil a ru ta a. Chutiang chuan, rûkruah a insiam ta a ni.—Jakoba 1:13-15 chhiar rawh; Endnote 8-na en rawh.
6. Engtin nge vântirhkoh pakhat chu Pathian hmêlma a rawn nih?
6 Chutiang chu, he vântirhkoh chungah hian a thleng a. Jehova’n Adama leh Evi a siam hnuah, fate nei a, “leilung hi luah khat” tûrin a hrilh a. (Genesis 1:27, 28) Chu vântirhkoh chuan, ‘Mihring zawng zawng hian Jehova ni lovin kei min be zâwk se!’ tiin a ngaihtuah a ni thei ang. Chutianga a ngaihtuah nasat poh leh, Jehova thil neihte a îtna chu a pung tial tial a. Chuvângin, mite’n amah an biak chu a duh a, Evi chu dâwt sawiin a bum ta a ni. (Genesis 3:1-5 chhiar rawh.) Chutianga a tih avângin, Pathian hmêlma Diabol-Setana tih chu a rawn ni ta a ni.
7. (a) Engvângin nge Adama leh Evi an thih? (b) Engvângin nge kan tar a, kan thih?
7 Adama leh Evi chuan Pathian thu âwih lovin thing rah chu an ei a. (Genesis 2:17; 3:6) Jehova chungah thil an tisual a, a lo sawi tawh ang ngeiin a hnuah an thi ta a. (Genesis 3:17-19) An fate pawh sual fate an lo nih avângin an thi a ni. (Rom 5:12 chhiar rawh.) Sual fate an lo nih dân hre thiam tûra min ṭanpui thei he entîrna hi lo ngaihtuah ta ila. Chhangthâwp chu kil li nei thîr bâwm, a sîra khuar neia ur angah han inmitthla teh. A urna bâwma khuar ang chu chhangthâwpah chuan a awm ngei ang. Chutiang bawkin, Adama’n Pathian thu a âwih loh khân mi sual a lo ni a. A fate kan nih avângin, kan za hian sual fate kan ni a, a neih ang “khuar” chu kan nei vek a. Chuvângin, kan tarin kan thi a ni.—Rom 3:23; Endnote 9-na en rawh.
8, 9. (a) Setana chuan Adama leh Evi chu eng ring tûrin nge a duh? (b) Engvângin nge Jehova’n hel hmangte chu a tihboral nghâl loh?
8 Setana’n thuâwih lo tûra Adama leh Evi thununin Jehova laka helna chu a ṭan a. Adama leh Evi’n Jehova chu bumhmang a ni tih leh an tân thil ṭha a duhsak lo tih an rin chu a duh a ni. Setana chuan mihringte’n Pathian kaihhruaina an mamawh lo va, a dik leh dik lo chu mahniin thu tlûkna an siam tûr a ni, a tihna a ni. A nih chuan, Jehova’n eng nge a tih ang? Hel hmangte chu chawp leh chilha tihlumin helna chu a titâwp nghâl thei a. Mahse, chu chuan Setana chu bumhmang a ni tih a finfiah ang em? Finfiah lo vang.
9 Chuvângin, Jehova’n hel hmangte chu a tiboral nghâl lo. Mihringte chu mahnia ro an inrêl a phalsak hrih zâwk a ni. Chu chuan Setana chu bum hmang a ni tih leh Jehova’n mihringte tâna thil ṭha ber tûr a hria tih a finfiah ang. Hemi chungchâng hi Bung 11-naah kan zir belh ang a. Mahse, Adama leh Evi te thu tlûkna siam chu engtin nge i ngaih? Setana ring a, Pathian thu an âwih lo chu an ti dik em? An thil neih zawng zawng chu Pathian Jehova pêk vek a ni a. Nun ṭha famkim, huan mawi tak, leh hna hlimawm tak a pe a. Mahse, Setana erawh chuan an tân thil ṭha pakhat mah a tihsak ngai si lo. Chuta awm ve ni ta la, eng nge i tih ang?
10. Eng duh thlan tûr pawimawh tak nge kan neih ṭheuh?
10 Tûn laiah, chutiang bawk duh thlan theihna chu kan nei ṭheuh va, kan nun chu kan duh thlannaah a innghat a ni. Kan chunga rorêltu anga Jehova thu âwih chu thlangin, Setana chu bumhmang a ni tih kan finfiahpui thei a. Kawng lehlamah, Setana chu rorêltuah kan thlang thei a ni. (Sâm 73:28; Thufingte 27:11 chhiar rawh.) He khawvêla mi tlêm tê chauhvin Pathian thu an âwih a. Pathian chu he khawvêl chunga rorêltu a ni lo rêng a ni. Chuti chu, tu nge ni ta ang?
TUIN NGE KHAWVELAH ROREL?
Khawvêl ram zawng zawng hi Setana ta ni lo sela chuan, Isua hnênah pêk a tiam thei ang em?
11, 12. (a) Isua hnêna Setana thutiam aṭangin eng nge kan hriat? (b) Eng Bible chângtein nge Setana chu khawvêl rorêltu a ni tih târ lang?
11 Isua chuan khawvêl rorêltu dik tak chu a hria a. Ṭum khat chu, Setana’n “khawvêl ram zawng zawng leh a ropuina chu a entîr a.” Tichuan, Isua hnênah: “Bawkkhupin [a nih loh leh, kûnin] chibai mi bûk la, hêng zawng zawng hi ka pe vek ang che,” tiin a tiam a ni. (Matthaia 4:8, 9; Luka 4:5, 6) Heti hian inzâwt rawh, ‘Chûng ramte chu Setana ta ni lo ta se, Isua hnênah pêk a tiam thei ang em?’ Thei lo vang. Sawrkâr zawng zawng chu Setana ta a ni.
12 Heti hian i ngaihtuah mai thei: ‘Engtin nge Setana chu khawvêl rorêltu a nih theih? Lei leh vân siamtu chu Pathian Engkimtithei, Jehova a ni lâwm ni?’ tiin. (Thu Puan 4:10, 11) Ni e, Jehova siam a ni a; mahse, Isua’n Setana chu “he khawvêl lal,” tiin a ko va. (Johana 12:31; 14:30; 16:11) Tirhkoh Paula chuan Diabol-Setana chu “he khawvêl pathian,” tiin a ko bawk. (2 Korinth 4:3, 4) Tirhkoh Johana pawhin, “Khawvêl pumhlûm hi mi sual thu thuin a awm,” tiin a ziak bawk a ni.—1 Johana 5:19.
ENGTIN NGE SETANA KHAWVEL CHU TIHBORAL A NIH DAWN?
13. Engvângin nge khawvêl thar kan mamawh?
13 He khawvêl hi a hlauhawm tawlh tawlh a. Indona te, eirûkna te, vervêkna te, leh tharum thawhnate chu nî tin kan hmu a. Mihringte chuan theih tâwp chhuah ṭhîn mah se, chûng buainate chu an chingfel thei lo. Mahse, Pathian chuan Armageddon indonaah he khawvêl suaksual hi a tiboral thuai ang a, felna khawvêl tharin a thlâk ang.—Thu Puan 16:14-16; Endnote 10-na en rawh.
14. Pathianin A Lalrama Lal ni tûrin tu nge a thlan? Bible-in Isua chungchângah eng nge a sawi lâwk?
14 Jehova’n Isua Krista chu A vân sawrkâr, a nih lo leh A Lalrama Lal ni tûrin a thlang a. Kum sâng tam tak liam ta khân, Isua chuan “Remna Lal” angin ro a rêl ang a, a sawrkârna chu a tâwp ngai lo vang tih Bible chuan a lo sawi lâwk a ni. (Isaia 9:6, 7) Isua’n a hnungzuitute chu: “I ram lo thleng rawh se. I duhzâwng vâna an tih angin leia mi’n ti rawh se,” tia zirtîrin, he sawrkârna dîla ṭawngṭai tûrin a lo hrilh a. (Matthaia 6:10) Bung 8-naah chuan, Pathian Ramin khawvêl sawrkârte a thlâk dân tûr kan hria ang a. (Daniela 2:44 chhiar rawh.) Chutianga a thlâk hnuah, Pathian Ram chuan lei hi paradis mawi takah a chantîr ang.—Endnote 11-na en rawh.
KHAWVEL THAR A HNAI!
15. “Lei thar” chu tute nge?
15 Bible chuan, “vân tharte leh lei thar, a chhûnga felna awmte” chu min tiam a. (2 Petera 3:13; Isaia 65:17) A châng chuan Bible-in “lei” a sawi hian a chhûnga chêng mite a sawina a ni a. (1 Chronicles 16:31) Chuvângin, felna awmna “lei thar” tih chuan Pathian thu âwih a, a malsâwmna dawngtute a kâwk a ni.
16. Pathianin khawvêl thara chêngte hnênah eng thilpêk ropui tak nge a pêk dâwn a, chumi dawng thei tûr chuan eng nge kan tih ngai?
16 Isua chuan Pathian khawvêl thara chêngte hnênah “chatuana nunna” pêk a tiam a. (Marka 10:30) Chu thilpêk dawng tûr chuan eng nge kan tih ngai? A chhânna hre tûrin Johana 3:16 leh 17:3 chhiar ang che. Lei Paradis-a nun awm dân tûr Bible sawite chu i lo en ang u.
17, 18. Engtin nge lei pum puiah remna leh thlamuanna a awm dâwn tih kan hriat?
17 Sualsualna te, indona te, dân bawhchhiatna te, leh tharum thawhnate a bo vang. Leiah hian mi suaksual tumah an awm tawh lo vang. (Sâm 37:10, 11) Pathian chuan “indonate chu kâwlkil thlengin a tireh” ang a. (Sâm 46:9; Isaia 2:4) Leilung chu Pathian hmangaihtute leh a thuâwihtutein an khat tawh dâwn a ni. Chutah chuan remna leh thlamuanna a awm kumkhua ang.—Sâm 72:7.
18 Jehova mite chu thlamuang takin an awm ang. Bible hun lai khân, Israel mite’n Pathian thu an âwih chhûng chuan, Pathianin a vênhim avângin thlamuang takin an awm a. (Leviticus 25:18, 19) Chutiang bawkin, Paradis-ah chuan engmah kan hlau tawh lo vang a, tumah kan hlau tawh hek lo vang. Thlamuang takin kan awm reng tawh ang!—Isaia 32:18; Mika 4:4 chhiar rawh.
19. Pathian khawvêl tharah ei tûr tam tak a awm dâwn tih engvângin nge kan hriat theih?
19 Ei tûr tam tak a awm ang. “Leiah, tlâng chungahte hian, buh tam tak a awm ang.” (Sâm 72:16) Jehova, “keimahni Pathian ngei chuan, mal min sâwm ang” a, “lei hian a thil ṭo chu a pe” ang.—Sâm 67:6.
20. Engtin nge lei chu paradis-ah a chang dâwn tih kan hriat?
20 Lei pum pui chu paradis-ah a chang ang. Mite chuan in mawi tak leh huan mawi takte an nei ang a. (Isaia 65:21-24; Thu Puan 11:18 chhiar rawh.) Lei pum pui chu Eden huan anga mawi a ni tawh ang. Jehova chuan kan mamawh engkim min pe ang a. Bible chuan Jehova chungchângah: “I kut i phar a, thil nung zawng zawng châkna chu i tihrehsak ṭhîn,” tiin a sawi a ni.—Sâm 145:16.
21. Engtin nge mihringte leh ramsate chu inrem takin an awm dâwn tih kan hriat?
21 Mihringte leh ramsate chu inrem takin an awm ang. Ramsate chuan min tina tawh lo vang a. Naupangte pawhin tûn laia kan tâna hlauhawm ramsate chu an hlau lo vang.—Isaia 11:6-9; 65:25 chhiar rawh.
22. Isua’n dam lote tân eng nge a tih dâwn?
22 Tumah an na tawh lo vang. Isua chuan leia a awm laiin mi tam tak a tidam a. (Matthaia 9:35; Marka 1:40-42; Johana 5:5-9) Mahse, Pathian Rama Lal a nih hun chuan mi zawng zawng chu a tidam ang. Tumahin: “Ka dam lo ve,” an ti tawh lo vang.—Isaia 33:24; 35:5, 6.
23. Mitthite tân Pathianin eng nge a tih ang?
23 Mitthite an tho leh ang. Pathian chuan thi tawh mi maktaduai têlte chu a kai tho leh dâwn tih min tiam a. “Mi felte leh fel lote thawhlehna a awm ang.”—Johana 5:28, 29 chhiar rawh; Tirhkohte 24:15.
24. Paradis-a nung tûra i inngaihtuah hian engtin nge i awm?
24 Duh thlan theihna kan nei ṭheuh va. Jehova chungchâng zir leh a rawngbâwl kan thlang thei a, a nih loh leh kan duh zâwng tih kan thlang thei bawk. Jehova rawngbâwl kan thlan chuan nakin hun ropui tak kan nei ang. Mi pakhatin a thih hnua amah hre reng tûra Isua a ngen khân Isua chuan: “Ka hnênah Paradis-ah i awm ve ang,” tiin a tiam a. (Luka 23:43) Isua chungchâng bâkah, Pathian thutiam ropui takte a thlen famkimtîr dân tûr chungchâng chu i lo zir belh ang u.
