1. Kawng dika Pathian kan biak theih dân min hrilh theitu chu tu nge ni?

SAKHUA zawng zawng chu Pathian chungchânga thu dik zirtîr niin a inchhâl a. Mahse, chu chu thil ni thei a ni lo, Pathian chungchâng leh amah biak dân tûr chungchânga an zirtîr dânte chu a inang si lo va. Engtin nge kawng dika Pathian kan biak theih dân chu kan hriat theih ang? Pathian Jehova chauhvin amah kan biak dân tûr chu min hrilh thei a ni.

2. Engtin nge kawng dika Pathian kan biak theih dân chu i hriat theih?

² Jehova chuan kawng dika amah kan biak theih dân kan hriat theih nân Bible min pe a. Chuvângin, Bible zir rawh; Jehova’n a ngaihsak che avângin a zirtîrnate hlâwkpui tûrin a ṭanpui ang che.—Isaia 48:17.

3. Pathianin eng ti tûrin nge min duh?

³ Mi ṭhenkhat chuan Pathianin sakhua zawng zawng a pawm vek an ti a; mahse, Isua’n chutiang chuan a zirtîr lo. Ani chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duh zâwng titu erawh chu an lût ang,” a ti a. Chuvângin, Pathian duh zâwng zir a, a duh zâwng anga kan tih chu a pawimawh hle. Isua’n Pathian thuâwih lote chu dân bawhchhetu, “thil sual tite” nên a khaikhin si a.—Matthaia 7:21-23.

4. Isua chuan Pathian duh zâwng tih chungchângah eng nge a sawi?

⁴ Isua chuan Pathian duh zâwng tih kan duh chuan harsatnate kan hmachhawn dâwn tih min hrilh a. Heti hian a sawi a ni: “Kawngka zîmah chuan lût rawh u: boralnaa kalna kawngka chu a zau va, a kawng pawh a zau  bawk a, chumi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêm tê an ni,” tiin. (Matthaia 7:13, 14) Kawngka zîm, a nih loh leh kawng dika Pathian biakna chuan chatuana nunnaah min hruai a. Kawngka zau, a nih loh leh kawng dik lova Pathian biakna chuan thihnaah min hruai thung a ni. Mahse, Jehova’n tuma boral chu a duh lo va. Mi tinte chu a chanchin zir theihna hun remchâng a pe a ni.—2 Petera 3:9.

5. Engtin nge kawng dika Pathian betute chu i hriat hran theih?

⁵ Isua chuan kawng dika Pathian betute kan hre hrang thei tih a sawi a. An thurin leh thiltihte bih chiangin kan hre hrang thei a ni. Isua chuan: “Anmahni chu an rahah in hre mai ang,” a ti a. Chu bâkah: “Thing ṭha apiang a rah ṭha ṭhîn,” tiin a sawi belh bawk. (Matthaia 7:16, 17) Hei hi Pathian betute chu, an ṭha famkim tihna erawh a ni lo. Mahse, Pathian chhiahhlawhte chuan englai pawhin thil dik tih an tum tlat a ni. Tûnah chuan, kawng dika Pathian betute kan hriat hran theih dân i lo en ang u.

6, 7. Engvângin nge biakna dik chuan Bible a ṭanchhan? Isua entawn tûr siam chuan eng nge min zirtîr?

⁶ Kawng dika Pathian be tûr chuan kan biakna chuan Bible a ṭanchhan tûr a ni. Bible chuan: “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân,” tiin a sawi. (2Timothea 3:16, 17) Tirhkoh Paula chuan Kristiante hnênah: “Pathian thu kan hnên ata in hriat, in pawm lai khân, mihring thu pawma in pawm lo va, Pathian thu pawma  in pawm zâwk avâng khân; chu chu Pathian thu a ni rêng a,” tiin a ziak a ni. (1 Thessalonika 2:13) Biakna dik chuan Pathian Thu, Bible chauh a ṭanchhan a. Mite ngaih dân te, hnam dân te, leh thil dang engmah a ṭanchhan lo.

⁷ Isua zirtîrna chuan Pathian Thu a ṭanchhan vek a. (Johana 17:17 chhiar rawh.) A thusawinaah Pathian Lehkha Thu a la chhâwng fo a ni. (Matthaia 4:4, 7, 10) Pathian chhiahhlawh dik takte chuan Isua an entawn a, an zirtîrna zawng zawngah Bible an ṭanchhan a ni.

8. Jehova biak dân tûr chungchângah Isua’n eng nge min zirtîr?

⁸ Kawng dika Pathian be tûr chuan Jehova chauh kan be tûr a ni. Sâm 83:18 chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a sawi a. Isua chuan mite’n Pathian dik tak chu hria se a duh avângin, Pathian hming a zirtîr a ni. (Johana 17:6 chhiar rawh.) Isua chuan: “Lalpa i Pathian chibai bûk la, ama rawng chauh bâwl rawh,” a ti a. (Matthaia 4:10) Chuvângin, Pathian chhiahhlawhte kan nih angin Isua kan entawn a. Jehova chauh kan bia a, a hming kan lam a, mi dangte chu Pathian hming leh a thil min tihsak tûrte kan zirtîr bawk a ni.

9, 10. Engtin nge hmangaihna kan lantîr?

⁹ Kawng dika Pathian be tûr chuan mi dangte hmangaihna kan nei tûr a ni. Isua chuan a zirtîrte chu inhmangaih tawn tûrin a hrilh a. (Johana 13:35 chhiar rawh.) Kan awmna hmun te, hnam dân te, kan hausak dân te, leh kan retheih dânte chu eng pawh ni se, kan inhmangaih tawnna chuan unau angin min inpumkhattîr tûr a ni. (Kolossa 3:14) Chuvângin, indonaah kan tel lo va, mi kan that lo. Bible chuan: “Hemiah hian Pathian fate leh Diabola fate a hriat a ni; tu pawh felna ti  lo chu Pathian aṭanga chhuak a ni lo, a unau hmangaih lova pawh chu Pathian aṭanga chhuak a ni hek lo,” a ti a. Chu bâkah: “Kaina, mi sual laka mi, mahni unau thattu ang khân awm lovin. Eng vângin nge a thah tâk le? Ama thiltihte a sual a, a unau thiltihte a fel avângin,” tiin a sawi belh a ni.—1 Johana 3:10-12; 4:20, 21.

¹⁰ Kan hun te, kan tha leh zung te, leh kan neih sum leh paite chu inṭanpui tawn nân leh infuih tawn nân kan hmang a. (Hebria 10:24, 25) “Mi zawng zawng chungah thil ṭha” kan ti bawk a ni.—Galatia 6:10.

11. Engvângin nge Isua chu Pathian kan panna kawng anga kan pawm?

¹¹ Kawng dika Pathian be tûr chuan Pathian kan panna kawng, Isua thu kan zâwm tûr a ni. Bible chuan: “Mi dang tu ma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” tiin a sawi a. (Tirh. 4:12) He lehkhabu bung 5-naah Jehova’n Isua chu thuâwih mihringte tlan nâna a nun pe tûrin a rawn tîr tih kan zir tawh a. (Matthaia 20:28) Jehova chuan Isua chu lei Lalber ni tûrin a thlang tawh a ni. Chuvângin, Bible chuan chatuana nun kan duh chuan Isua thu kan âwih a ngai tih min hrilh a ni.—Johana 3:36 chhiar rawh.

12. Engvângin nge politics-ah kan tel loh?

¹² Kawng dika Pathian be tûr chuan politics-ah kan inhnamhnawih tûr a ni lo. Isua chu politics-ah a tel lo. Rom lal Pilata hmaa hruai a nih khân: “Ka Ram chu he khawvêla mi hi a ni lo,” a ti a. (Johana 18:36 chhiar rawh.) Isua ang bawkin Pathian Ram chungah kan rinawm tlat a; chuvângin, khawvêl khawi hmunah pawh awm ila, politics-ah kan inhnamhnawih lo. Mahse, Bible chuan ‘kan chunga rorêltu,’ sawrkâr thuneitute thu âwih tûrin thu min pe a. (Rom 13:1) Chuvângin, kan  awmna ram dânte chu kan zâwm a ni. Mahse, Pathian dânte a kalh hunah chuan: “Mihring thu aiin Pathian thu kan zâwm zâwk tûr a ni,” tia sawitu tirhkohte chu kan entawn a ni.—Tirhkohte 5:29; Marka 12:17.

13. Pathian Ram chungchângah eng nge kan hrilh?

¹³ Kawng dika Pathian be tûr chuan Pathian Ram chu khawvêl buainate chingfel theitu awmchhun a ni tih kan ring tûr a ni. Isua chuan “Ram Chanchin Ṭha” chu khawvêl zawng zawngah hrilh a ni dâwn tih a sawi a. (Matthaia 24:14 chhiar rawh.) Mihring sawrkâr a enga mah hian Pathian Ramin min tihsak tûr ang chu a ti thei lo. (Sâm 146:3) Isua chuan: “I ram lo thleng rawh se. I duhzâwng vâna an tih angin leia mi’n ti rawh se,” tia Pathian Ram dîla ṭawngṭai tûrin min zirtîr a. (Matthaia 6:10) Bible chuan Pathian Ramin mihring sawrkâr zawng zawng a tichhia ang a, amah chauh chu “kumkhuain a ding reng ang” tih min hrilh a ni.—Daniela 2:44.

14. Kawng dika Pathian betute chu tute nge nia i hriat?

¹⁴ Hêng thute i zir hnuah heti hian inzâwt rawh: ‘Tute’n nge an zirtîrnaah Bible ṭanchhan? Tute’n nge mite hnênah Pathian hming hrilh? Tute’n nge mi dangte chungah hmangaihna dik tak lantîr a, Isua chu min chhandam tûra Pathian tirh a ni tih ring? Tute nge politics-ah inhnamhnawih lo? Tute’n nge Pathian Ram chauhvin kan buainate a chingfel thei tih puang chhuak?’ tiin. A chhânna chu, Jehova Thuhretute chauhvin, tih hi a ni.—Isaia 43:10-12.

15. Kan biakna chu Pathian pawm tlâk ni tûrin eng nge kan tih ngai?

¹⁵ Pathian a awm tih rin mai chu a tâwk lo. Ramhuaite pawhin a thu âwih si lovin Pathian a awm tih chu an ring si a. (Jakoba 2:19) Pathian pawm tlâk biakna ni tûr  chuan, Pathian a awm tih kan rin mai bâkah, a thusawite kan nunpui a ngai bawk a ni.

16. Engvângin nge sakhaw dik lo chu kan hnâwl a ngaih?

¹⁶ Kan biakna chu Pathian pawm tlâk ni tûr chuan sakhaw dik lo kan hnâwl a ngai a. Zâwlnei Isaia chuan: “A chhûng ata kal chhuak rawh u . . . thianghlim takin awm rawh u,” tiin a ziak a ni. (Isaia 52:11; 2 Korinth 6:17) Chuvângin, biakna dik lo nêna inhnamhnawihna nei thil rêng rêng chu kan hnâwl a ngai a ni.

17, 18. “Babulon Khaw Ropui” chu eng nge ni a, engvângin nge rang taka chhuahsan a ṭûl?

¹⁷ Sakhaw dik lo chu eng nge ni? Bible kalh zâwnga Pathian be tûra zirtîrtu sakhua tawh phawt chu a ni a. Bible chuan chutiang sakhaw dik lo zawng zawng chu “Babulon Khaw Ropui,” tiin a ko a ni. (Thu Puan 17:5) Engvângin nge? Nova hun laia Tuilêt hnuah, Babulon khawpui aṭangin sakhaw dik lo zirtîrna tam tak a inṭan vâng a ni. Chûng zirtîrna dik lote chu lei pumpuiah hian a darh a. Entîr nân, Babulon-a chêngte chuan pathian pathum infinkhâwmte chu an bia a. Tûn laia sakhaw tam tak pawhin Pathian chu Trinity niin an zirtîr a; mahse, Bible erawh chuan Pathian dik awmchhun chu Jehova a ni tih leh, Isua chu a Fapa a ni tih chiang takin min zirtîr a ni. (Johana 17:3) Babulon-a chêngte chuan mi a thih hian a thlarau chu a nung zawm zêl a, hremhmun meidîlah hrehawm a tuar thei tih rinna an nei bawk a. Mahse, chu chu a dik lo.—Endnote 14 leh 17-na en rawh.

¹⁸ Pathian chuan sakhaw dik lo zawng zawng chu tihboral a ni thuai dâwn tih a sawi lâwk a. (Thu Puan 18:8) Sakhaw dik lo rang taka chhuahsan a ṭûl chhan i hre thiam em? Pathian Jehova chuan a tlai lutuk hmaa chhuahsan tûrin a duh che.—Thu Puan 18:4.

19. Jehova rawngbâwl tûra thu tlûkna i siam chuan engtin nge Pathianin a ngaihsak ang che?

 ¹⁹ Sakhaw dik lo chhuahsan a, Jehova rawngbâwl tûra thu tlûkna i siam hunah i ṭhiante leh i chhûngte chuan hre thiam lovin, harsatna an siam che pawh a ni thei a. Mahse, Jehova chuan a kalsan lo vang che. Hmangaihna nei khawvêl pum huap mi maktaduai tam takte awmna chhûngkuaah i rawn tel ang a, Pathian khawvêl thara chatuana nun beiseina i nei bawk ang. (Marka 10:28-30) Jehova rawngbâwl tûra i thu tlûkna dodâltu i ṭhiante leh i chhûngte zînga ṭhenkhat chuan a hnuah Bible an zir duh pawh a ni mai thei a ni.

20. Engvângin nge kawng dika Pathian biak chu a pawimawh?

²⁰ Nakin lawkah, Pathian Ramin suahsualna zawng zawng tibovin, lei pum puiah ro a rêl tawh dâwn a. (2 Petera 3:9, 13) Chu chu hun hlimawm tak a ni ngei ang! Mi zawng zawngin Jehova duh dân angin amah an be tawh ang. Chuvângin, tûna hma i lâk a, kawng dika Pathian i biak ṭan chu a pawimawh tak meuh a ni.