1, 2. Eng zawhna nge i inzawh ngai a, engvângin nge chu chu a pawimawh?

BIBLE i zirna aṭangin, Pathian biaa inchhâl mi tam tak chuan, a huat zâwngte zirtîrin, an ti tih chu i hre tawh a. (2 Korinth 6:17) Chuvângin, Jehova’n sakhaw dik lo, “Babulon Khaw Ropui” aṭanga chhuak tûrin thu min pe a ni. (Thu Puan 18:2, 4) Eng nge i tih ang? Hemi chungchângah hian thu tlûkna kan siam ṭheuh a ngai a; chuvângin, ‘Pathian chu a duh zâwng angin ka be dâwn nge ni a, tûn hma ang thovin ka be zawm zâwk dâwn?’ tiin kan inzâwt tûr a ni.

² Sakhaw dik lo aṭangin i chhuak, a nih loh leh bânna i theh lût tawh a nih chuan, i ti ṭha e. Mahse, sakhaw dik lo thiltih leh chîn dân ṭhenkhat chu i la thlah thei lo pawh a ni thei. Tûnah chuan, chûng thiltih leh chîn dân ṭhenkhat chu sawihovin, Jehova thlîr dân anga kan thlîr a pawimawhzia kan hria ang.

3. (a) Engvângin nge mi ṭhenkhatin Pathian biak nâna milem hman loh chu harsa an tih mai theih? (b) Pathian biak nâna milem hman chungchângah Bible-in eng nge a sawi?

³ Mi ṭhenkhat chuan an inah Pathian biak nân milem leh maichâmte chu kum tam tak chhûng an lo hmang tawh a. Chutiang mi i nih chuan, chûng thilte tel lo va Pathian biak chu mak deuhvah leh dik lo deuhvah i ngai hial thei. Mahse, Jehova’n amah kan biak dân tûr min zirtîr tih chu theihnghilh suh. Chu bâkah, Jehova’n biaknaah milem hman a  duh lo tih Bible chuan chiang takin min hrilh bawk.—Exodus 20:4, 5 chhiar rawh; Sâm 115:4-8; Isaia 42:8; 1 Johana 5:21.

4. (a) Engvângin nge thlahtute chu kan biak loh vang? (b) Engvângin nge Jehova’n a mite chu mitthite biak tum lo tûra a hrilh?

⁴ Mi ṭhenkhat chuan an thlahtu thi tawhte tihlâwm tumin hun leh tha tam tak an hmang mai thei a. Anni chu Pathian biakin an be hial pawh a ni thei. Mahse, kan zir tawh angin mitthite chuan min ṭanpui thei lo va, min tina thei hek lo. Khawi hmunah mah an nung zawm tawh lo bawk. Kan chhûngkhat thi tate hnên aṭanga lo kal anga lang thusawite chu, a nihna takah chuan ramhuaite hnên aṭanga lo kal a nih avângin anmahni nêna inbiak tum chu a hlauhawm hle. Chuvângin, Jehova’n Israel mite chu mitthite biak tum lo tûr leh ramhuai zâwlna eng nên mah inhnamhnawih lo tûrin thu a pe a ni.—Deuteronomy 18:10-12; Endnote 25 leh 30-na en rawh.

5. Pathian biak nâna milem hman leh thlahtute biakna bânsan tûrin engin nge ṭanpui thei che?

⁵ Pathian biak nâna milem hman leh thlahtute biakna bânsan tûrin engin nge ṭanpui thei che? Bible chhiarin, Jehova’n chûng thilte a thlîr dân chu ngun taka i ngaihtuah a ngai a. Ani chuan chûng thilte chu thil “tenawm” angin a thlîr a ni. (Deuteronomy 27:15) A thil thlîr dân anga thlîr ve thei tûr leh a duh dân anga amah be thei tûra ṭanpui tûr chein, nî tin Jehova hnênah ṭawngṭai rawh. (Isaia 55:9) Jehova chuan biakna dik lo nêna in inzawmna eng pawh nuaibo tûra i mamawh chakna a pe ang che tih i ring tlat thei a ni.

6. Engvângin nge December 25 chu Isua pian champha anga hman a lo nih?

⁶ Khawvêl pumah hian Krismas chu kût nî hriat lâr  tak zînga pakhat a ni a, mi tam zâwkte chuan Isua pian chamah an ngai a ni. Mahse, Krismas chuan biakna dik lo nêna inzawmna a nei a. Encyclopedia pakhat chuan, ramhuai bia Rom mite’n December 25-ah hian ni pian champha an hmang ṭhîn tih a sawi a. Kohhran hruaitute chuan ramhuai bia tam tak chu Kristiana inlehtîr an duh a, chuvângin Isua chu December 25-ah piang lo mah se, chu chu Isua pian nî anga hman an rêlthlu ta a ni. (Luka 2:8-12) Isua zirtîrte chuan Krismas an hmang ve lo. Lehkhabu pakhat chuan Isua pian aṭanga kum 200 a liam hnuah pawh, “Isua pian nî chu tuman an hre lo va, ngai pawimawh an awm meuh lo,” tiin a hrilhfiah a ni. (Sacred Origins of Profound Things) Krismas chu Isua leia a pian aṭanga kum za têl a liam hnuah chauh hman ṭan a ni.

7. Engvângin nge Kristian dikte’n Krismas an hman loh?

⁷ Mi tam tak chuan Krismas leh a kaihhnawih hlimhlawp bâwlna leh thilpêk inpêkna ang chîte chu ramhuai biakna aṭanga lo chhuak a ni tih an hria a. Entîr nân, England leh America hmun ṭhenkhatahte chuan, Krismas chu ramhuai biakna aṭanga lo chhuak a nih avângin hman khap a lo ni tawh ṭhîn a. A hmangtute chuan hrem an tâwk ṭhîn bawk. Mahse, a hnuah mite’n Krismas chu an hmang ṭan leh a ni. Engvângin nge Kristian dikte’n Krismas an hman loh? An thiltih apiangah Pathian tihlâwm an duh vâng a ni.

8, 9. Engvângin nge Kristian hmasate’n piancham an lawm loh?

⁸ Mi tam takte hman lâr tak thil dang leh chu an piancham lawm hi a ni a. Kristiante’n piancham an lâwm tûr a ni em? Bible-a piancham lawmna târ lan awmchhun chu Jehova be lotute piancham lawmna a  ni a. (Genesis 40:20; Marka 6:21) Piancham lawmna chu pathian dik lote chawimawi nâna hman a ni ṭhîn. Chuvângin, Kristian hmasate chuan “tuemaw piancham lawm chu ramhuai biate thil chîn zînga mi niin an ngai a ni.”—The World Book Encyclopedia.

⁹ Hmân lai Rom leh Grik mite chuan mi tinte chu pathian pakhat pian nîah an piang ṭheuh niin an hria a. Chu pathian nêna inpâwlna nei thlarau chuan chumi nîa piang chu a awmpui nghâl ṭhîn niin an hre bawk. Ramhuai betute chuan miin a dam chhûnga chu thlarau vênhimna a duh chuan, a piancham a lawm a ngai niin an hria a ni.

10. Engvângin nge tûn laia Kristiante chuan piancham an lawm loh?

¹⁰ Sakhaw dik lo nêna inzawmna nei kût ni hman chu Jehova’n a pawm ang em? (Isaia 65:11, 12) A pawm lo. Chuvângin, piancham leh biakna dik lo nêna inzawmna nei kût nî eng pawh chu kan hmang lo a ni.

11. Engvângin nge mi ṭhenkhatin kût nîte an hman? Eng nge i ngaih pawimawh ber ang?

¹¹ Mi ṭhenkhat chuan Krismas leh kût ni dangte chu ramhuai biate hnên aṭanga lo chhuak a ni tih an hria a; mahse, an hmang zawm zêl tho va. Kût nîte chu an chhûngkua nêna hun hmanho theihna remchâng ṭha tak mai niin an ngai a ni. Chutiang chuan i ngai em? Chhûngkuaa hun hmanho duh chu thil sual a ni lo. Jehova’n chhûngkua chu a din a, chhûngkuate’n inlaichînna ṭha an neih chu a duh a ni. (Ephesi 3:14-19) Mahse, sakhaw dik lo kût nîte hmang a, kan chhûngte tihlâwm ai chuan, Jehova nêna inlaichînna ṭha neih chu kan tum zâwk tûr a ni a. Chuvângin, tirhkoh Paula chuan: ‘Lalpa lâwm zâwng eng nge ni tih fiah rawh u,’ tiin a sawi a ni.—Ephesi 5:8-10.

12. Engin nge kût nî chu Jehova tân pawm tlâk loh nihtîr?

 ¹² Mi tam tak chuan kût nîte lo chhuahna chu an ngai pawimawh lo va; mahse, Jehova chuan a ngai pawimawh a ni. Ani chuan sakhaw dik lo aṭanga lo chhuak kût nîte, leh mihring leh ram chawisângtu kût nîte chu a pawm lo. Entîr nân, Aigupta mite chuan an pathian dik lote tân kût nî tam tak an nei a. Israel mite Aigupta aṭanga an tlân chhuah hnuah, chûng mite ramhuai biakna kût pakhat chu entawnin, chu chu, “LALPA tân kût,” tiin an vuah a. Chu an thiltih avâng chuan Jehova’n anni chu a hrem a ni. (Exodus 32:2-10) Zâwlnei Isaia sawi angin, “thil bawlhhlawh rêng rêng” kan dek tûr a ni lo.—Isaia 52:11 chhiar rawh.

13. Kût nîte hman tawh loh i tum hunah eng zawhnate nge i neih mai theih?

¹³ Kût nîte hman tawh loh i tum hunah zawhna tam tak i nei mai thei a. Entîr nân: Ka hnathawhpui chuan an ruala Krismas ka hman loh chhan min zâwt ta se eng nge ka sawi ang? Krismas thilpêk min pe ta se eng nge ka tih ang? Ka kawppuiin kût ni pakhat hmang tûrin min beisei ta se, eng nge ka tih ang? Kût nî emaw, an piancham emaw kan lawm loh avânga lunghnual lo tûrin ka fate chu engtin nge ka ṭanpui theih ang?

14, 15. Tuemawin kût nî nuam taka hmang tûra duhsakna a hlân che emaw, thilpêk a pe che emaw a nih chuan eng nge i tih theih?

¹⁴ Dinhmunte i hmachhawn huna sawi tûr leh tih tûrte i ngaihtuah apiangin remhriatna hman chu a pawimawh hle. Entîr nân, mite’n kût nî nuam taka hmang tûra duhsakna an hlan che hunah i hawisan kher a ngai lo. “Ka lâwm e,” tiin i chhâng thei a. Mahse, dinhmun dangah miin hriat belh a duh chuan, kût nî i hman loh  chhan chu i hrilhfiah thei ang. Mahse, eng lai pawhin ngilnei tak, remhre tak, leh mi zah thiam tak ni ang che. Bible chuan: “Mi tin engtia chhân ṭheuh tûr nge ni tih in hriat theih nân in ṭawngka chhuak chu, chia al, khawngaihna tel ni fo rawh se,” tiin a sawi a. (Kolossa 4:6) Chuvângin, mi dangte nêna hun hmanho leh thilpêkte pêk chu i duh a, mahse, kût nîte nêna inzawmna neia tih i duh lo mai a nih thu i hrilhfiah thei ang.

¹⁵ Miin thilpêk pe ta che sela, eng nge i tih ang? Bible chuan dân ziak chhuakin min pe lo va; mahse, chhia leh ṭha hriatna thiang kan nei reng tûr a ni tih erawh a sawi a ni. (1 Timothea 1:18, 19) Thilpêk petu che chuan kût nî i hmang ve lo tih a hre lo pawh a ni thei a. A nih loh leh, “Kût nî i hmang lo tih ka hria a; mahse, hei hi pêk ka duh tho che,” tiin a sawi pawh a ni thei. Chutiang hunah chuan, thu tlûkna siamin, thilpêk chu i dawngin i dawng lo thei a. Mahse, chhia leh ṭha hriatna thiang tak neihtîr thei tûr thu tlûkna siam ngei ang che. Jehova nêna kan inlaichînna tichhe thei tûr thil tih chu kan duh ngai lo vang.

16. I chhûngkua chuan kût nî hmang duh ta sela eng nge i tih ang?

¹⁶ I chhûngkua chuan kût nî hmang duh ta sela eng nge i tih ang? Anni chu i khap a ngai lo. An duh duh an ti thei tih hre reng rawh. I duh thlanna an zahsak che i duh angin, ngilnei takin an duh thlanna chu zahsak ang che. (Matthaia 7:12 chhiar rawh.) Mahse, i chhûngkua chuan kût nîa hun hmanpui tûrin an beisei che a nih chuan eng nge i tih ang? Thu tlûkna i siam hmain, Jehova ṭanpuina dîl rawh. Dinhmun chu ngaihtuahin, chumi chungchângah zir bingna nei rawh. Jehova tihlâwm i duh reng a ni tih theihnghilh ngai suh.

17. I fate’n mi dangin kût nî hlimawm tak an hman avânga chân nei nia an inhriat loh nân eng nge i tihsak theih?

 ¹⁷ I fate’n mi dangte kût nî hlimawm tak an hmang an hmuh hunah anmahni ṭanpui tûrin eng nge i tih theih? An tân ruahmanna ṭha tak engemaw a khât tâwkin i siam thei a. An beisei loh hunah thilpêkte i pe thei bawk. I fate hnêna i pêk theih thilpêk hlu ber chu i hun leh hmangaihna hi a ni.

18. Engvângin nge Kristian inkhâwmahte kan tel ang?

¹⁸ Jehova tilâwm tûr chuan sakhaw dik lo chhuahsan mai bâkah, chumi nêna inzawmna nei a thil chîn leh kût nîte chu kan bânsan a ngai a. Chutih rual chuan, biakna dik kan vawn tlat a ngai bawk a ni. Engtin nge? Kawng khat chu Kristian inkhâwma tel ziahna hmangin a ni. (Hebrai 10:24, 25 chhiar rawh.) Inkhâwm chu biakna dik pêng pawimawh tak a ni a. (Sâm 22:22; 122:1) Kan inkhâwmho hian kan infuih tawn thei a ni.—Rom 1:12.

19. Engvângin nge Bible thutak i zirte chu mi dangte hnêna hrilh a pawimawh?

¹⁹ Biakna dik kan vawn tlat theih dân kawng dang chu Bible aṭanga kan thu zirte mi dang hnêna hrilhhriat hi a ni. Mi tam tak chu he leiah thil ṭha lote a thlen ṭhin avângin an mangang hle a. Chutiang mi hriat i nei pawh a ni thei. Anni chu i nakin hun beiseina ropui tak chungchâng hrilh rawh. Kristian inkhâwmahte i tel a, mi dangte hnêna Bible thutak i hrilh chuan, sakhaw dik lo leh a thil chînte nêna inhnamhnawih duhna rilru i nei tawh lo tih i hmu chhuak ang. Jehova chuan a duh dân anga amah be tûra i ṭan lâkna chu nasa taka mal a sâwm dâwn avângin i hlim ngei ang.—Malakia 3:10.