1, 2. Mite hian eng zawhnate nge an zawh ṭhin?

NAUPANGTE hian zawhna tam tak an zâwt ṭhîn a. Thil pakhat i han hrilhfiah hnuah, ‘Engati nge?’ tiin an zâwt ṭhîn. Chhânna i pêk hnuah pawh, ‘Mahse, engati nge?’ tiin an zâwt leh hrâm ṭhîn a ni.

² Kum eng zât pawh ni ila, zawh duh kan nei ṭheuh va. Kan ei tûr te, kan hâk tûr te, leh kan thil lei tûrte chungchângah zawhna kan nei a ni. A nih loh paw’n nunna leh nakin hun tûr chungchânga zawhna pawimawh tak kan nei pawh a ni thei bawk. Mahse, chhânna lungawithlâk tak kan hmuh loh hian, a chhânna zawn loh phah nân kan hmang thei a ni.

3. Engvângin nge mi tam tak chuan an zawhna pawimawh takte chhânna chu zawn hmuh theih an inrin loh?

³ Bible hian kan zawhna neih pawimawh takte a chhâng em? Ṭhenkhat chuan a chhân an ring a; mahse, hriatthiam harsa an ti a. Pastor-te leh Father-te chauhvin a chhânna hre tûrah an ngai a ni. A ṭhen chuan a chhânna hre lo bîk nih chu zahthlâk an ti bawk.

4, 5. Eng zawhna pawimawh takte nge i neih? Engvângin nge a chhânna chu i zawn zêl ang?

⁴ Hêng zawhnate chhânna hi hriat i duh pawh a ni thei: Nunin eng nge a tum? Kan thih hian engtin nge kan awm ang? Pathian chu eng ang mi nge a nih? tihte hi. Zirtîrtu hmingthang tak, Isua chuan: “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u,” tiin a sawi a. (Matthaia 7:7) Chuvângin, i rin theih tûr chhânna i hmuh hma loh chu zawng zêl ang che.

 ⁵ Ni e, i ‘zawn zêl’ chuan Bible-a a chhânnate chu i hmu ang. (Thufingte 2:1-5) A chhânnate chu hriatthiam harsa lutuk a ni lo. I thil hmuh chhuahte chuan tûna nun hlimawm tak leh nakin hun beiseina ropui tak a pe ang che. Tûnah, mi tam takte hriatthiam loh zawhna pakhat ilo ngaihtuah ang u.

6. Engvângin nge mi ṭhenkhat chuan an hrehawm tawrhna Pathianin a ngaihsak lo nia an hriat?

⁶ Mi tam tak chuan Pathianin min ngaihsak lo niin an hria a. ‘Min ngaihsak sela chuan, khawvêl hi tûn ang a ni lo vang,’ an ti a ni. Tûnah chuan indona te, inhuatna te, leh mangannate chu hmun tinah kan hmu a. Dam lohna te, hrehawm tawrhna te, leh thihnate kan tâwk bawk. Mi ṭhenkhat chuan, ‘Pathianin min ngaihsak a nih chuan, engvângin nge hêng hrehawm tawrhna zawng zawng hi a tihtâwp loh?’ tiin an ngaihtuah a ni.

7. (a) Engtin nge sakhaw hruaitute’n Pathian chu nunrâwng tak angin an zirtîr? (b) Engvângin nge thil ṭha lote a thlen hian Pathian mawhpuh tûr a ni lo tih kan chian theih?

⁷ Sakhaw hruaitute chuan Pathian chu nunrâwng tak anga mite rintîr châng an nei a. Chhiatna râpthlâk tak a lo thlen hian, Pathian remruat a ni, Pathian duh zâwng a ni, an ti ṭhîn. Hetianga an sawi hian Pathian an mawhpuh tihna a ni. Mahse, Bible chuan Pathian chu suahsualnate awmtîrtu a ni lo tih min zirtîr a. Chu ai chuan, Jeremia Ṭah Hla 3:33 chuan: “Mihring fate tihhrehawm leh tuivui hi a duhzâwng a ni si lo,” a ti zâwk a. Chuvângin, Pathianin thil ṭha lote dang lo mah se, a thlentîrtu erawh a ni lo rêng rêng. (Joba 34:10-12 chhiar rawh.) Entîrna pakhat lo hmang ta ila.

8, 9. Engvângin nge kan buaina tawhah Pathian mawhpuh chu a dik loh vang? Entîrna pe rawh.

 ⁸ A nu leh pate hnêna khawsa tlangvâl pakhat chu han mitthla teh. A pa chuan a hmangaih êm êm a, thu tlûkna ṭha siam dânte a zirtîr a. Mahse, a pa chungah lungnih lohna neiin, in a chhuahsan ta a. Thil ṭha lote tiin buaina a tâwk ta. In aṭanga chhuak lo tûra a dan loh avângin, chu thilthlengah a pa chu i mawhpuh ang em? Mawhpuh lo vang! (Luka 15:11-13) Heta pa ber ang bawk hian, Pathian pawhin mihringte’n a laka an hel a, thil ṭha lo tih an thlan khân a dang lo. Chuvângin, thil ṭha lote a thlen hian, Pathian thlentîr a ni lo tih kan hre reng tûr a ni. Chûng thilte avânga Pathian mawh puh chu a dik lo vang.

⁹ Chhan ṭha tak neiin Pathianin thil ṭha lote a la titâwp hrih lo va. Bung 11-naah, hemi chungchânga Bible zirtîrna chu kan hria ang. Mahse, tûnah chuan Pathianin min hmangaih tih leh buaina kan tawh hunah mawhpuh tûr a ni lo tih kan chiang thei a. Dik tak chuan, kan buaina zawng zawng chingfel Theitu awmchhun a ni zâwk a ni.—Isaia 33:2.

10. Engvângin nge Pathianin mi sualte thil tihchhiat zawng zawng a siam ṭha dâwn tih kan chian theih?

¹⁰ Pathian chu a thianghlim a. (Isaia 6:3) A thiltih engkim chu a thianghimin, a ṭha a. Chuvângin kan ring thei a ni. Mihringte chu chutiang kan ni ve lo. Thil sual tih châng kan nei a. Rorêltu ṭha ber pawhin mi sualte thil tihchhiat zawng zawng siam ṭha tûrin thiltihtheihna a nei lo. Mihringte zîngah hian Pathian anga thiltithei tumah an awm lo. Mahse, Pathian chuan mi sualte thil tihchhiat zawng zawng a siam ṭha thei a, a siam ṭha bawk ang a. Tichuan, suahsualna zawng zawng pawh a nuai bo hlen bawk ang.—Sâm 37:9-11 chhiar rawh.

11. Engtin nge Pathianin i hrehawm tawrhna chu a ngaih?

¹¹ Khawvêla thilthlengte leh i chunga thilthlengte a hmuh hian Pathian chu engtin nge a awm? Bible chuan Pathian chu ‘rorêlna fel ngainatu’ a nih thu min zirtîr a. (Sâm 37:28) Chuvângin, thil dik leh dik lo chu a ngaihven hle. Mite hrehawm tawrh chu a duh lo va. Bible chuan Pathianin hmân lai khawvêl suahsualnaa khat a hmuh khân “rilru nat nân a hman phah” tih a sawi. (Genesis 6:5, 6) Pathian chu a danglam lo. (Malakia 3:6) Chuvângin, Bible chuan Pathianin a ngaihsak tak zet che tih a sawi a ni.—1 Petera 5:7 chhiar rawh.

12, 13. (a) Engvângin nge mi dangte hmangaihna leh ngaihsakna kan neih a, khawvêla hrehawm tawrhnate kan hmuh hian engtin nge kan awm? (b) Engvângin nge Pathianin hrehawm tawrhna leh rorêlna dik lo zawng zawng chu a nuai bo vek dâwn tih kan rin theih?

¹² Bible chuan Pathianin a anpuiin min siam tih a sawi bawk a. (Genesis 1:26) Pathianin a neih ang mize ṭhate neiin min siam tihna a ni. Chuvângin, mi ṭha hrehawm tuar i hmuh huna pawi i tih chuan, Pathian phei chuan pawi a va ti lehzual dâwn êm! Chu chu engtin nge kan hriat theih?

¹³ Bible chuan: “Pathian chu hmangaihna a ni,” tih min zirtîr a. (1 Johana 4:8) A thiltih zawng zawng chu hmangaihnain a chêttîr vânga ti a ni. Pathianin hmangaihna a neih vângin keini pawhin kan nei ve a ni. Hei hi han ngaihtuah teh: Thiltihtheihna nei ta la, khawvêla hrehawm tawrhna leh rorêlna dik lo zawng zawng hi i nuai bo vek ang em? Mite i hmangaih avângin i nuai bo ngei ang. A nih, Pathianin eng nge a tih ang? Thiltihtheihna a neih bâkah, min hmangaih avângin hrehawm tawrhna leh rorêl dik lohna zawng zawng chu a nuai bo  vek ang. He lehkhabu ṭantîr lama târ lan Pathian thutiam zawng zawng chu a thleng famkim vek ang tih i ring thei a! Mahse, chûng thutiamte ring thei tûr chuan min tiamtu Pathian chungchâng i hriat belh a ngai a ni.

14. Pathian hming chu tu nge ni a, kan lam tûr a ni tih engtin nge kan hriat?

¹⁴ Tuemaw ṭhiana i siam dâwn hian eng nge i hrilh hmasak ber ṭhin? I hming i hrilh hmasa ṭhîn a ni. A nih, Pathianin hming a nei em? Sakhaw tam tak chuan a hming chu Pathian, a nih loh leh Lalpa an ti a; mahse, chûng chu hming a ni lo. “Lal,” tih leh “president” tih ang chi nihna sawina mai a ni. Pathian chuan a hming chu Jehova a ni tih min hrilh a. Sâm 83:18 chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a sawi a. Bible ziaktute chuan Pathian hming chu vawi sâng tam tak an lo ziak lang a ni. Jehova chuan a hming hria a, lam tûrin a duh che a. A ṭhian i rawn nih theih nân a hming a hrilh che a ni.

15. Jehova hming awmzia chu eng nge ni?

¹⁵ Pathian hming Jehova chuan awmze thûk tak a nei a  ni. A thutiam engpawh a tifamkim theiin, a thiltumte a hlen thei tihna a ni a. Jehova chu eng mahin a dang thei lo. Amah chauhvin he hming hi a pu thei a ni. *

16, 17. (a) “Engkimtithei,” (b) “Lalber chatuana awm,” (c) “Siamtu,” tih awmzia chu eng nge ni?

¹⁶ Kan chhiar tâk angin, Sâm 83:18 chuan Jehova chungchângah: “Nangmah chauh hi . . . Chungnungber i nih an hriat theih nân,” a ti a. Thu Puan 15:3  pawhin: “Aw Lalpa Pathian, Engkimtithei, i thiltihte chu a ropuiin a mak a,” tiin a sawi a ni. “Engkimtithei” tih chu eng tihna nge ni? Jehova chu lei leh vâna thiltithei ber a ni tihna a ni. Timothea thawn khat 1:17 chuan Jehova chu “Lalber chatuana awm,” tiin a ko va. Chu chuan engtik lai pawhin a awm reng tih a kâwk a. Tichuan, Sâm 90:2 pawhin ani chu chatuan ata chatuan thlenga Pathian a nih thu a sawi bawk. A va ropui tak êm!

¹⁷ Jehova chauh chu engkim Siamtu a ni a. Thu Puan 4:10, 11 chuan: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin a sawi. Ni e, vâna vântirhkoh te, arsi te, theirah te, leh tuifinriata sanghate ang  chi i thil ngaihtuah chhuah theih zawng zawng chu Jehova siam vek a ni.

18. Engvângin nge mi ṭhenkhat chu Pathian ṭhian ni thei lo tûra an inngaih? Chumi chungchângah Bible-in eng nge a sawi?

¹⁸ Mi ṭhenkhat chuan Jehova nihna ropui tak takte chungchâng an chhiar hian an hlau va, ‘Pathian chu thiltithei tak leh thianghlim tak a nih bâkah, vânah daih a awm si a, engvângin nge min ngaihsak tehlul ang?’ tiin an ngaihtuah a. Chu bâkah, ṭhenkhat chuan Pathian chu ṭhian anga ngaih hi amah zah lohna angah an ngai thei bawk. Mahse, chutianga ngaih chu Pathianin a duh em? Duh lo ve. Jehova chuan min hnaih a duh a. Bible chuan Pathianin “min hlat lo ṭheuh si a,” tiin a sawi. (Tirhkohte 17:27) Pathianin amah kan hnaih chu a duh a, ‘hnaih ve’ min tiam bawk a ni.—Jakoba 4:8.

19. (a) Engtin nge Pathian ṭhian kan nih theih ang? (b) Jehova miziate zîngah a eng hi nge i duh ber?

¹⁹ Engtin nge Pathian ṭhian kan nih theih ang? Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi a. (Johana 17:3) I zir zawm zêl chuan Jehova leh Isua i rawn hria ang a. Tichuan, chatuana nunna i chang thei ang. Entîr nân, “Pathian chu hmangaihna a ni,” tih kan zir tawh a. (1 Johana 4:16) Mahse, mize duhawm dang tam tak a la nei. Bible chuan Jehova chu “lainatnaa khat, mi khawngaih thei tak, thin nel tak, ngilneihna leh thutak ngah” a nih thu min hrilh a. (Exodus 34:6) Ani chu ‘a ṭhain, ngaihdam a peih’ bawk a. (Sâm 86:5) A dawhtheiin, a rinawm bawk a ni. (2 Petera 3:9; 1 Korinth 1:9) Bible-a a chanchin kan chhiar chuan a mize duhawm tam tak kan hriat belh ang.

20-22. (a) Pathian chu kan hmu thei si lo va, engtin nge kan hnaih theih ang? (b) Mi dangte’n Bible zir zawm lo tûra an tih che chuan eng nge i tih ang?

 ²⁰ Pathian chu kan hmu thei si lo va, engtin nge kan hnaih theih ang? (Johana 1:18; 4:24; 1 Timothea 1:17) Bible-a Jehova chanchin kan chhiar chuan, ani chu kan Ṭhian a lo ni ang. (Sâm 27:4; Rom 1:20) A chanchin kan zir tam poh leh amah kan hmangaih lehzual ang a, kan hnaih lehzual bawk ang.

²¹ Chu bâkah, Jehova chu kan Pa a ni tih kan hria ang a. (Matthaia 6:9) Nunna min petu a ni a, nun ṭha ber nei tûrin min duhsak bawk a ni. Chu chu hmangaihna ngah tak pain a fate tâna a thil duhsak chu a ni. (Sâm 36:9) Ni e, Bible chuan Jehova ṭhian kan ni thei tih min zirtîr a. (Jakoba 2:23) Han ngaihtuah teh! Lei leh vân Siamtu Jehova’n a ṭhian atân a duh che!

²² Mi ṭhenkhat chuan Bible zir zawm lo tûrin an duh mai thei che a. I sakhaw vawn i thlâk an hlauh vâng a ni mai thei. Mahse, Jehova ṭhian i nihna tûr chu tumah indâltîr suh. I Ṭhian neih theih azawnga ṭha ber a ni si a.

23, 24. (a) Engvângin nge zawhnate zawh zêl chu thil ṭha tak a nih? (b) Bung 2-naah eng nge kan sawiho vang?

²³ Bible i zir hunah hriatthiam lohte pawh i nei ang a. Zawhna zawh leh ṭanpuina dîl chu hreh suh. Isua chuan naupangte angin kan inngaitlâwm tûr a ni tih a sawi a. (Matthaia 18:2-4) Naupangte chuan zawhna tam tak an zâwt ṭhîn a. Pathian chuan a chhânnate i hriat chu a duh a ni. Chuvângin, Bible ngun taka zirin, i thu zirte chu thutak a ni tih hria ang che.—Tirhkohte 17:11 chhiar rawh.

²⁴ Jehova chungchâng hriat theih dân ṭha ber chu Bible zir hi a ni a. Bung 2-naah chuan, Bible chu lehkhabu dangte laka a danglam bîk chhan kan hmu ang.