1, 2. Engvângin nge ṭawngṭaina chu thilpêk hlu tak nia i ngaih a, a chungchânga Bible zirtîrna chu engvângin nge kan hriat a ngaih?

VAN boruak zau tak nêna khaikhin chuan lei chu a tê tham hle a. Jehova’n leilung a en hian hnam tina mite chu bâlṭîna tui far khat ang lekin an lang a ni. (Sâm 115:15; Isaia 40:15) Chutiangin tê tham hle mah ila, Sâm 145:18, 19 chuan: “LALPA chuan a kotu zawng zawngte chu a hnaih ṭhîn a. Tih tak zeta amah kotu zawng zawngte chu. Amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang,” tiin a sawi. Chanvo ropui a va ni êm! Engkimtithei, Siamtu Jehova chuan min hnaih a duh a, kan ṭawngṭaina min ngaihthlâksak a duh bawk. Ni e, ṭawngṭaina chu Jehova’n mi tinte hnêna a pêk chanvo hlu leh ropui tak a ni.

² Mahse, Jehova chuan a pawm zâwnga kan biak chauhvin kan ṭawngṭaina a ngaithla ang. Engtin nge a pawm zâwnga kan biak theih? Ṭawngṭaina chungchânga Bible sawi chu i lo en ang u.

3. Engvângin nge Jehova hnênah i ṭawngṭai ang?

³ Jehova chuan a hnêna ṭawngṭai tûr, a nih loh leh amah be tûrin a duh che a. Chu chu engtin nge kan hriat? Khawngaihin Philippi 4:6, 7 chhiar rawh. Chu sâwmna duhawm tak chu han ngaihtuah teh. Lei leh vâna rorêltu chuan a ngaihsak che a, i rilru leh i harsatnate a hnêna hrilh tûrin a duh che a ni.

4. Engtin nge Jehova hnêna ṭawngṭai ziahna chuan amah nêna in inṭhianna chu a tihngheh?

⁴ Ṭawngṭaina chuan Jehova nêna inṭhianna ṭha tak nei tûrin min ṭanpui a. Mi pahnih inkâra inṭhianna chu  rilru vei zâwng leh ngaihtuahnate an inhrilh tawn reng hian a nghet lehzual ṭhîn. Jehova hnêna ṭawngṭai pawh chutiang bawk chu a ni a. Bible aṭangin a ngaihtuahna leh a rilru vei zâwngte chu a hrilh che mai bâkah, nakin huna a tih tûrte pawh a hrilh bawk che a. Amah biak ziahna hmangin i rilru chhûngrila awmte chu i hrilh thei a ni. Chutianga i tih chuan, Jehova nêna in inṭhianna chu a nghet zual sauh vang.—Jakoba 4:8.

5. Jehova chuan ṭawngṭaina zawng zawng a ngaithla lo tih engtin nge kan hriat?

⁵ Jehova chuan ṭawngṭaina zawng zawng a ngaithla em? Ngaithla lo. Zâwlnei Isaia hun laiin, Jehova’n Israel mite hnênah: “Vawi tam tak in ṭawngṭai hunah pawh ka ngaithla tawh lo vang: in kutte chu thisenin a khat si a,” tiin a hrilh a. (Isaia 1:15) Chuvângin, kan fîmkhur loh chuan Jehova min hlattîr thei thilte kan ti palh theiin, kan ṭawngṭaina chu a ngaihthlâk tlâk lovah kan siam thei a ni.

6. Engvângin nge rinna chu a pawimawh êm êm? Rinna i nei tih engtin nge i lantîr?

 ⁶ Jehova’n kan ṭawngṭaina min ngaihthlâksak kan duh chuan amah rinna kan neih a ngai a. (Marka 11:24) Tirhkoh Paula chuan: “Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” tiin a sawi. (Hebrai 11:6) Mahse, rinna kan nei tia sawi mai chu a tâwk lo. Kan rinna chu nî tina Jehova thu âwihna hmangin kan lantîr tûr a ni.—Jakoba 2:26 chhiar rawh.

7. (a) Engvângin nge Jehova hnêna kan ṭawngṭai hunah inngaitlâwm tak leh zah thiam tak kan nih a ngaih? (b) Engtin nge tih tak zetin kan ṭawngṭai tih kan lantîr theih?

⁷ Jehova hnêna kan ṭawngṭai hunah kan inngaitlâwmin kan zah hle tûr a ni a. Engvângin nge? Lal emaw, president emaw be dâwn ta ila, zah thiam taka biak chu kan duh ngei ang. Jehova chu Pathian Engkimtithei a nih avângin, amah kan biak hunah kan zah lehzualin kan inngaitlâwm lehzual tûr a ni dâwn lâwm ni? (Genesis 17:1; Sâm 138:6) Thu ngai chham nawn awn awn lovin, tih tak zet leh thinlung aṭangin Jehova hnênah kan ṭawngṭai tûr a ni.—Matthaia 6:7, 8.

8. Kan ṭawngṭai hunah, eng dang nge kan tih ngai?

⁸ Thil engemaw atâna kan ṭawngṭai hian, kan dîlte mila theih tâwp chhuaha kan thawh a ngai a. Entîr nân, kan nî tin mamawh atâna Jehova hnêna kan ṭawngṭai chuan, hna thawk thei reng chung pawha thatchhe taka awmin kan mamawh zawng zawng a faisaa min pêk chu kan beisei thei lo. Kan thawkrim tûr a ni a, hna thawh hreh kan nei tûr a ni lo. (Matthaia 6:11; 2 Thessalonika 3:10) A nih loh leh, kan tih ṭhin thil sual pakhat bânsan tûra Jehova ṭanpuina kan dîl a nih chuan, thlêmnaa min hruai thei eng dinhmun pawh kan pumpelh tûr a ni. (Kolossa 3:5) Tûnah chuan, ṭawngṭaina  chungchânga zawh ṭhin zawhna ṭhenkhatte chu i lo ngaihtuah ang u.

9. Tu hnênah nge kan ṭawngṭai ang? Johana 14:6 chuan ṭawngṭaina chungchângah eng nge min zirtîr?

⁹ Tu hnênah nge kan ṭawngṭai ang? Isua chuan a hnungzuite chu “kan Pa vâna mi” hnêna ṭawngṭai tûrin a zirtîr a. (Matthaia 6:9) “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” tiin a sawi bawk. (Johana 14:6) Chuvângin, Isua hmingin Jehova hnênah chauh kan ṭawngṭai tûr a ni. Isua hminga ṭawngṭai tih awmzia chu eng nge ni? Kan ṭawngṭaina Jehova pawm tlâk ni tûr chuan, Isua hnêna a pêk chanvo pawimawh tak kan zahzia kan lantîr a ngai a. Kan hriat tawh angin, Isua chu sual leh thihna ata min chhandam tûrin leiah a lo kal a. (Johana 3:16; Rom 5:12) Jehova chuan Isua chu Puithiam Lalber leh Rorêltu-ah a ruat bawk a ni.—Johana 5:22; Hebrai 6:20.

10. Ṭawngṭai hunah awm dân tûr bîk neih a ngai em? Hrilhfiah rawh.

¹⁰ Kan ṭawngṭai hunah awm dân tûr bîk neih a ngai em? Ngai lo, Jehova chuan kan ṭawngṭai hunah ṭhingṭhi tûr te, ṭhu tûr te, leh ding tûrtein min phût lo. Bible chuan awm dân zahawm tak a nih phawt chuan Jehova kan be thei tih min zirtîr a ni. (1 Chronicles 17:16; Nehemia 8:6; Daniela 6:10; Marka 11:25) Jehova tâna pawimawh ber chu kan ṭawngṭai huna kan awm dân ni lovin, rilru put hmang dik tak nêna amah kan biak hi a ni a. Khawi hmunah leh eng hunah pawh, aw ri chhuakin emaw, chhuak lovin emaw chhûnah pawh, zânah pawh kan ṭawngṭai thei a. Kan ṭawngṭai hian mi dang tuman hre thei lo mah se, Jehova chuan a ngaithla ang tih kan ring tlat thei a ni.—Nehemia 2:1-6.

11. Jehova hnêna kan dîl theih thil ṭhenkhat chu eng nge ni?

 ¹¹ Engte nge ṭawngṭainaah kan telh theih? Jehova pawm tlâk thil eng pawh kan telh thei a. Bible chuan: “Eng pawh a duhzâwng anga kan dîl chuan anin min ngaihthlâksak ṭhin hi,” tiin a sawi. (1 Johana 5:14) Mi mal thil tân kan ṭawngṭai thei em? Thei e. Jehova hnêna ṭawngṭai chu ṭhian ṭha tak nêna inbiakna ang a ni tûr a ni. A hnênah kan rilru leh thinlunga awmte kan hrilh vek thei a. (Sâm 62:8) Thil dik ti tûra min ṭanpui tûrin a thlarau thianghlim thiltithei tak chu kan dîl thei bawk. (Luka 11:13) Thu tlûkna ṭhate siam thei tûra kan mamawh finna kan dîl thei a, harsatnate hmachhawn thei tûrin chakna kan dîl thei bawk. (Jakoba 1:5) Jehova hnênah kan sualte min ngaidam tûrin kan ngên tûr a ni a. (Ephesi 1:3, 7) Kan chhûngte leh kohhrana unaute pawh tiamin, mi dangte tân kan ṭawngṭai tûr a ni bawk.—Tirhkohte 12:5; Kolossa 4:12.

12. Kan ṭawngṭainaah eng nge kan ngaih pawimawh ber ang?

¹² Ṭawngṭainaah eng nge kan ngaih pawimawh ber ang? Jehova leh a duh zâwng a ni. Kan tâna thil min tihsak zawng zawng avângin thinlung takin lâwmthu kan hrilh tûr a ni a. (1 Chronicles 29:10-13) Chu chu Isua’n a zirtîrte hnêna ṭawngṭai dân tûr a hrilh aṭangin kan hre thei a ni. (Matthaia 6:9-13 chhiar rawh.) Pathian hming zahawm tûr, thil thianghlim anga cheibâwl ni tûrin kan dîl hmasa ber tûr tihna a ni. A dawtah, Pathian Ram lo thleng tûr leh leia Jehova duh zâwng tih ni tûrin kan ṭawngṭai tûr a ni tih Isua chuan a târ lang. Chutiang thil pawimawh takte kan dîl hnuah chauh, mi mala kan mamawhte kan dîl tûr a ni. Kan ṭawngṭainaah Jehova leh a duh zâwng kan dah hmasak ber hian, kan thil ngaih pawimawh ber chu kan târ lang a ni.

13. Engtia rei nge kan ṭawngṭai ang?

 ¹³ Engtia rei nge kan ṭawngṭai ang? Bible chuan a rei zâwng tûr a sawi lo. Kan ṭawngṭainate chu dinhmun azirin a tâwiin a sei thei a. Entîr nân, chaw ei hmaa ṭawngṭai chu tâwi tê a ni thei a; mahse, Jehova hnêna lâwmthu kan hrilh hunah leh lungkhamnate kan thlen hunah chuan a reiin, a sei deuh pawh a ni thei. (1 Samuela 1:12, 15) Isua hun laia mi ṭhenkhatte tih ṭhin angin, mi dangte rilru lâk nâna rei tak chhûng ṭawngṭai  chu kan duh lo. (Luka 20:46, 47) Chutiang ṭawngṭaina chuan Jehova rilru a la ve lo. Jehova tâna thil pawimawh chu thinlung taka ṭawngṭai hi a ni.

14. Engtia zingin nge kan ṭawngṭai ang a, hei hian Jehova chungchâng eng nge min zirtîr?

¹⁴ Engtia zingin nge kan ṭawngṭai ang? Jehova chuan amah nêna inbe ziah tûrin min sâwm a. Bible chuan, “ṭawngṭai rawh u,” “ṭawngṭai fan fan ula,” “bâng lovin ṭawngṭai ula,” ti tein a sawi. (Matthaia 26:41; Rom 12:12; 1 Thessalonika 5:17) Jehova chu kan ṭawngṭaina ngaithla tûrin a inpeih reng a. A hmangaihna leh a thilphalna avângin nî tin a hnênah lâwmthu kan hrilh thei a ni. A kaihhruaina te, a chakna te, leh a thlamuanna te chu kan dîl thei bawk. Jehova hnêna ṭawngṭai theihna chanvo kan ngaihhlut tak zet chuan, hun remchâng apiangah kan ṭawngṭai reng ang.

15. Engvângin nge ṭawngṭai zawhah hian “amen” kan tih ang?

 ¹⁵ Engvângin nge ṭawngṭai zawhah hian “amen” kan tih ang? “Amen” tih hi “tehrêng mai” emaw, “ni rawh se,” emaw tihna a ni a. Kan thu chhamte kan tih tak zetzia târ lanna a ni. (Sâm 41:13) Bible chuan mipui hmaa ṭawngṭaina tâwpah thu chhamte kan pawmpuizia lantîr nâna a ri chhuak emaw, rilru emawa “amen,” lo tih chu a inâwmin a ṭha a ni tih min zirtîr a ni.—1 Chronicles 16:36; 1 Korinth 14:16.

16. Jehova chuan kan ṭawngṭainate a chhâng em? Hrilhfiah rawh.

¹⁶ Jehova chuan kan ṭawngṭainate chu a chhâng em? Chhâng e. Bible chuan ani chu “ṭawngṭaina Ngaithlatu,” tiin a ko va. (Sâm 65:2) Jehova chuan mi maktaduai têlte ṭawngṭaina chu ngaithlain, kawng chi hrang hrangin a chhâng a ni.

17. Engtin nge Jehova chuan vântirhkohte leh leia a chhiahhlawhte chu kan ṭawngṭaina chhân nâna a hman?

¹⁷ Jehova chuan a vântirhkohte leh leia a chhiahhlawhte hmangin kan ṭawngṭaina a chhâng a. (Hebrai 1:13, 14) Bible hre thiam tûra Pathian ṭanpuina an dîl hnu lawkah, Jehova Thuhretute’n an va tlawh tih ang chi thiltawn tam tak a awm a. Hêng hian vântirhkohte chu lei pumpuia “chanchin ṭha” hrilhnaah an tel a, thuchhuahtute chu mi rilru ṭhate hnênah an hruai tih a târ lang. (Thu Puan 14:6 chhiar rawh.) Chu bâkah, kan zînga tam tak chuan buaina leh mamawhna engemaw bîk pakhat chungchânga Jehova hnêna kan ṭawngṭai hnuah, kan mamawh ṭanpuina chu Kristian unau tuemaw hnên aṭangin kan dawng ṭhîn a ni.—Thufingte 12:25; Jakoba 2:16.

18. Engtin nge Jehova chuan kan ṭawngṭaina chhân nân a thlarau thianghlim leh Bible a hman?

¹⁸ Jehova chuan a thlarau thianghlim hmangin kan  ṭawngṭaina a chhâng a. Buaina pakhat hmachhawn thei tûra kan ṭawngṭai hian, kaihhruaina leh chakna min pe tûrin a thlarau thianghlim chu a hmang thei a ni. (2 Korinth 4:7) Jehova chuan kan ṭawngṭainate chhân nân leh thu tlûkna fing siam thei tûra min ṭanpui nân Bible a hmang bawk. Chuvângin, Bible kan chhiar hunah min ṭanpuitu tûr Bible chângte kan zawng hmu thei a ni. Jehova chuan kan hriat ngai thu pakhat kan hriat theih nân inkhâwmnaa tuemaw chu chhânna pe tûrin a chêttîr thei a, a nih loh leh kohhran upa chu Bible aṭanga thu pakhat min hrilh tûrin a chêttîr thei bawk a ni.—Galatia 6:1.

19. Engvângin nge Jehova’n kan ṭawngṭainate min chhânsak lo anga a lan mai theih?

¹⁹ Mahse, a châng chuan heti hian kan ngaihtuah mai thei, ‘Engvângin nge Jehova’n ka ṭawngṭainate min la chhân loh?’ tiin. Kan ṭawngṭainate chhân hun leh chhân dân tûr a hria tih chu theihnghilh suh ang che. Kan mamawh chu a hria a. A hnêna kan thil dîlte chu kan duh tak zetin, amah kan ring tak zet tih târ lan nân hun engemaw chen chu kan ṭawngṭai zawm zêl a ngai thei a. (Luka 11:5-10) A châng chuan Jehova chuan kan ṭawngṭainate chu kan beisei loh zâwngin min chhâng thei a ni. Entîr nân, dinhmun harsa tak pakhat atân kan ṭawngṭai a, chu harsatna min lâk kiansak aiin, tuar chhuak thei tûra kan mamawh chakna min pe thei a ni.—Philippi 4:13 chhiar rawh.

20. Engvângin nge Jehova hnênah kan ṭawngṭai fo vang?

²⁰ Jehova hnêna kan ṭawngṭai thei chu chanvo ropui a va ni êm! Ani chuan min ngaithla ang tih kan ring a. (Sâm 145:18) Thinlung aṭanga Jehova hnêna kan ṭawngṭai nasat poh leh amah nêna kan inṭhianna chu a nghet lehzual sauh vang.