1, 2. Tûn lai hian khawiah nge inhumhimna kan hmuh theih?

THLIPUI tleh nîa kal chhuak angah han inchan teh. Vân chu a rawn thim mup mup a, kâwlte a lo phe zawr zawrin, khawpuite pawh a rawn ri dur dur a. A hnu lawkah ruahpuivânâwn a rawn sûr ta. Tawm hulna tûr i zawng ta chung chung a. Hmun him leh ro i zawn hmuh chuan i thla a va muang dâwn êm!

² Tûn laiah pawh chutiang dinhmunah chuan kan ding a. Khawvêl dinhmun chu a chhe zual deuh deuh va. Heti hian i ngaihtuah mai thei, ‘Khawiah nge inhumhimna ka hmuh ang?’ tiin. Bible-a fakna hla phuahtu chuan: “LALPA chung thu-ah chuan, ‘Ani chu ka inhumhimna leh ka kulhpui a ni a; ka Pathian, ka rina chu a ni,’ ka ti ang,” tiin a ziak a. (Sâm 91:2) Ni e, Jehova chuan tûna kan buainate lakah min thlamuan thei a, nakin hun beiseina ropui tak min pe bawk a ni.

3. Engtin nge Jehova chu inhumhim nâna kan hman theih?

³ Engtin nge Jehova’n min vênhim theih? Kan harsatna eng pawh hmachhawn thei tûrin min ṭanpui thei a, min tihnat tumtute ai pawhin thil a ti thei zâwk a ni. Thil ṭha lote kan tâwk a nih pawhin, nakinah Jehova’n a siam ṭha ang tih kan ring thei a ni. Bible chuan: “Pathian hmangaihnaah chuan invawng ṭha rawh u,” tiin min fuih a. (Juda 21) Harsatna kan tawh huna a ṭanpuina dawng thei tûr chuan, Jehova kan hnaih tlat a ngai a ni. Mahse, engtin nge kan hnaih theih?

4, 5. Engtin nge Jehova’n min hmangaihna chu a târ lan?

⁴ Jehova hnaih tlat tûr chuan min hmangaihna a  nasatzia kan hriat a ngai a. Kan tâna a thiltih zozaite chu han ngaihtuah teh. Leilung mawi tak min pêk bâkah, thing leh mau leh nungcha rilru la tak taktein a tikhat bawk a ni. Ei tûr tuihnai tak tak leh tui in tûr thianghlim takte min pe bawk. Bible aṭangin Jehova chuan a hming leh a mize ropui tak takte min zirtîr a. Eng dang zawng aiin, a Fapa duh tak Isua chu kan tân a nun hlân tûra leiah rawntîrin min hmangaihzia a lantîr a. (Johana 3:16) Chu inthawina avâng chuan nakin hun beiseina ropui tak kan nei a ni.

⁵ Jehova chuan hrehawm tawrhna zawng zawng titâwptu tûr Messia Lalram, vân sawrkâr chu a din a. Chu Lalram chuan lei hi paradis-ah a chantîr ang a, chutah chuan mi tinte chu inrem tak leh hlim takin chatuanin an nung ang. (Sâm 37:29) Jehova’n min hmangaihna a lantîr dân kawng dang leh chu tûna nun dân ṭha ber min zirtîrna hmangin a ni. A hnêna ṭawngṭai tûrin min sâwm a, kan ṭawngṭainate min ngaihthlâksak a inpeih reng bawk. Jehova chuan min hmangaih ṭheuhzia chiang takin a târ lang a ni.

6. Engtin nge Jehova hmangaihna chu i chhân lêt ang?

⁶ Engtin nge Jehova hmangaihna chu i chhân lêt ang? I tâna a thiltih zawng zawng chungah i lâwmzia lantîr rawh. Mahse, tûn laia mi tam takin lâwm nachâng an hre lo chu a pawi hle. Isua leia a awm lai pawh khân tûn ang tho a ni a. Ṭum khat chu Isua’n phâr sâwm a tidam a, mahse mi pakhat chauhvin a hnênah lâwm thu a hrilh a ni. (Luka 17:12-17) Isua hnêna lâwm thu sawitu ang nih chu kan duh a. Jehova hnênah englai pawha lâwm thu hrilh chu kan duh a ni.

7. Engtia nasain nge Jehova kan hmangaih ang?

⁷ Jehova kan hmangaihzia kan lantîr a ngai bawk a. Isua’n a zirtîrte hnênah Jehova chu an thinlung zawng  zawng, thlarau zawng zawng, leh rilru zawng zawngin an hmangaih tûr a ni tih a hrilh a. (Matthaia 22:37 chhiar rawh.) Chumi awmzia chu eng nge ni?

8, 9. Engtin nge Jehova kan hmangaihzia kan lantîr theih?

⁸ Jehova ka hmangaih tia sawi mai chu a tâwk em? Tâwk lo. Jehova chu kan thinlung, thlarau, leh rilru zawng zawnga kan hmangaih a nih chuan chu chu kan thiltihin kan lantîr ang. (Matthaia 7:16-20) Bible chuan Pathian kan hmangaih chuan a thupêkte kan zâwm dâwn tih chiang takin min zirtîr a. Chu chu thil harsa a ni em? Ni lo ve, Jehova “thupekte chu a khirh si lo va.”—1 Johana 5:3 chhiar rawh.

⁹ Jehova thu kan âwih hian nun hlimawm leh lungâwithlâk tak kan nei a. (Isaia 48:17, 18) Mahse, Jehova hnaih tlat tûrin engin nge min ṭanpui ang? I lo en ang u.

10. Engvângin nge Jehova chanchin i zir zawm zêl ang?

¹⁰ Engtin nge Jehova ṭhian i rawn nih theih? Bible i zirna aṭangin Jehova chu i rawn hre chiang lehzual a, amah nêna inṭhianna i rawn nei chho a ni. Chu in inṭhianna chu mit lo tûra i duh meialh nên a inang a. Mei chu alh reng tûr chuan tuah belh zêl a ngaih angin, in inṭhianna nghet reng tûr chuan Jehova chanchin i zir zawm zêl a ngai a ni.—Thufingte 2:1-5.

11. Bible zirtîrnate chuan i chungah eng ang nghawng nge a neih ang?

¹¹ Bible i zir zawm zêl chuan, i thinlung khawihtu thute i zir chhuak ang. Isua’n Bible hrilh lâwknate a hrilhfiah laia zirtîr pahnihte rilru hi han ngaihtuah teh. Anni chuan: “Kalkawnga min biak laia Pathian Lehkha Thute min hrilhfiah lai khân, kan thinlung a harh huai rêng lâwm ni kha?” tiin an sawi a ni.—Luka 24:32.

12, 13. (a) Pathian kan hmangaihna chu engtin nge a awm theih? (b) Engtin nge Jehova kan hmangaihna chu kan chhawm nun reng theih?

 ¹² Pathian Lehkha Thute hriatthiamnain zirtîrte thinlung a khawih ang bawkin, Bible i hriatthiam ṭan lai khân an phûrna ang chu i nei mai thei a. Chu chuan Jehova hre tûr leh hmangaih tûrin a ṭanpui che a ni. Chu hmangaihna tihdaih chu i duh lo vang.—Matthaia 24:12.

¹³ Pathian ṭhian i rawn nih hnuah, chu in inṭhianna tinghet reng tûrin theih tâwp i chhuah a ngai a. Amah leh Isua chanchin i zir zawm tûr a ni a, chu bâkah, i thu zirte nunpui theih dân chu i ngaihtuah tûr a ni. (Johana 17:3) Bible i chhiar a, i zir hunah heti hian inzâwt rawh: ‘Hei hian Pathian Jehova chungchâng eng nge min zirtîr? Engvângin nge ani chu thinlung leh thlarau zawng zawnga ka hmangaih ang?’ tiin.—1 Timothea 4:15.

14. Engtin nge ṭawngṭaina chuan Jehova kan hmangaihna tinghet reng tûra min ṭanpui?

 ¹⁴ Ṭhian ṭha tak i neih hian in inbe ziah a, chu chuan in inṭhianna a tinghet a. Chutiang bawkin, ṭawngṭaia Jehova kan biak ziahna chuan amah kan hmangaihna a tinghet a ni. (1 Thessalonika 5:17 chhiar rawh.) Ṭawngṭaina hi kan Pa vâna mi hnên aṭanga kan dawn thilpêk ropui tak a ni a. Thinlung takin amah kan be ziah tûr a ni. (Sâm 62:8) Kan ṭawngṭai hunah by-heart sa thute kan chham nawn mai mai tûr a ni lo va, rilru tih tak zetin kan chham zâwk tûr a ni. Ni e, Bible kan zir zawm a, thinlung taka kan ṭawngṭai chuan Jehova kan hmangaihna chu a nghet reng ang.

15, 16. Engtin nge thu hrilh rawngbâwlna chu i thlîr?

¹⁵ Jehova hnaih reng kan duh chuan, kan rinna chungchâng mi dangte hnêna kan hrilh pawh a ngai bawk a. Mi dangte hnêna Jehova chanchin hrilh chu chanvo ropui tak a ni. (Luka 1:74, 75) Chu chu Isua’n Kristian dik zawng zawngte hnêna a pêk mawhphurhna a ni bawk. Kan za hian Pathian Ram chanchin ṭha chu kan hril tûr a ni. Chutiang chuan i hril tawh em?—Matthaia 24:14; 28:19, 20.

¹⁶ Tirhkoh Paula chuan thu hrilh rawngbâwlna chu a ngaihhlut êm avângin “ro” tiin a ko hial a. (2 Korinth 4:7) Mi dangte hnêna Jehova leh a thiltum hrilh chu i thawh theih azawnga hna pawimawh ber a ni. Chu chu Jehova rawng i bâwl theih dân kawng khat a ni a, a tâna i thiltih chu a ngaihlu hle. (Hebrai 6:10) Thu hrilhna chuan nang leh mi dangte chu Jehova hnaih tûr leh chatuana nung tûra a ṭanpui che u avângin, chu chu in hlâwkpui ve ve thei a ni. (1 Korinth 15:58 chhiar  rawh.) Chu aia lungâwina min pe thei zâwk hna dang a awm thei dâwn em ni?

17. Engvângin nge thu hrilh rawngbâwlna chu a hmanhmawhthlâk?

¹⁷ Thu hrilh rawngbâwlna hi a hmanhmawhthlâk hle a. Chuvângin, ‘thu chu kan hril’ tûr a ni a, “a hunah te, a hun lovah te pawh” hmanhmawh takin kan hril tûr a ni. (2 Timothea 4:2) Mite’n Pathian Ram chanchin an hriat a ngai a, Bible chuan: “LALPA ni ropui tak chu a hnai e, a hnaiin a thleng thuai dâwn a ni,” tia a sawi bâkah, tâwpna chu “a tlai chuang lo vang,” a ti bawk si a. (Zephania 1:14; Habakuka 2:3) Ni e, nakin lawkah Jehova chuan Setana khawvêl suaksual chu a tiboral dâwn. Chumi a lo thlen hmain, mite’n Jehova rawngbâwl an thlan theih nân vaukhânna pêk a ngai a ni.

18. Engvângin nge Kristian dikte ruala Jehova kan biak ang?

¹⁸ Jehova chuan Kristian dikte ruala amah be tûrin min duh a. Bible chuan: “Hmangaih leh thil ṭha tiha inchawk tho tûrin i inngaihtuah tawn ang u; ṭhenkhat tih dân anga kan inkhâwmte bânsan lovin, i infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tiin a sawi. (Hebrai 10:24, 25) Inkhâwm zawng zawnga tel tûrin theih tâwp kan chhuah tûr a ni. Inkhâwmte chuan infuih tawnna leh intihchak tawn theihna hun remchâng min pe si a.

19. Engin nge kan Kristian unaute hmangaih tûra min ṭanpui thei?

¹⁹ Inkhâwma i tel hian Jehova be tûra nangmah ṭanpuitu tûr ṭhian ṭhate i hmu ang a. Anni chu nangmah ang bawka Pathian be tûra theih tâwp chhuahtu unaute an ni a, ṭha famkim lo leh thil tisual thei vek an ni. Chuvângin, thil an tihsual hunah ngaidam ang che. (Kolossa 3:13 chhiar rawh.) Kristian unaute mize ṭha chu en tlat rawh, chu chuan anmahni hmangaih tûr leh Jehova hnaih lehzual tûrin a ṭanpui ang che.

20, 21. “Nunna tak tak” chu eng nge ni?

²⁰ Jehova chuan a ṭhian zawng zawngte tân nun ṭha ber a duhsak a. Bible chuan nakin huna kan nun dân tûr chu tûna kan nun dân lakah chuan a danglam hle dâwn tih min hriattîr a ni.

²¹ Nakin hunah chuan, kum 70 emaw, 80 emaw lek ni lovin, chatuanin kan nung tawh ang a. Paradis mawi takah chuan remna, hlimna, leh hrisêlna ṭha famkim neiin “chatuan nunna” kan chên ang. Chu chu Bible chuan “nunna tak tak” tiin a ko va. Jehova chuan he nunna tak tak hi pêk min tiam a; chumi “vuan” tlat thei tûr chuan tûnah kan tih theih apiang kan ti tûr a ni.—1 Timothea 6:12, 19.

22. (a) Engtin nge ‘nunna tak tak chu kan vawn tlat’ theih? (b) Engvângin nge chatuana nunna chu kan thawh chhuah theih loh?

²² Engtin nge ‘nunna tak tak chu kan vawn tlat’ theih? “Thil ṭha ti tûrin, thil ṭha tih ngah tûrin,” theih tâwp kan chhuah tûr a ni a. (1 Timothea 6:18) A awmzia chu Bible-a kan thu zirte kan nunpui a ngai tihna a ni. Mahse, nunna tak tak chu kan thawhrimnaah a innghat lo. Chatuan nunna chu kan thawk chhuak thei ngai dâwn si lo va. A nihna takah chuan, chu chu Jehova’n a “khawngaihna” entîrna anga a chhiahhlawh rinawmte hnêna a pêk thilthlâwnpêk a ni a. (Rom 5:15) Kan Pa vâna mi chuan a chhiahhlawh rinawmte hnênah he thilthlâwnpêk hi pêk a duh a ni.

23. Engvângin nge tûna duh thlanna dik i siam a ngaih?

²³ Heti hian inzâwt rawh, ‘A duh dân angin Pathian chu ka bia em?’ tiin. Inthlâk danglamna ṭhenkhat i siam a ngai tih i hriat chuan, siam nghâl ang che. Jehova kan rinchhan a, theih tâwp chhuaha a thu kan âwih hian kan tân inhumhimna a lo ni ang a. Setana khawvêl  suaksual ni hnuhnûng chhûng hian a mi rinawmte chu a vênghim ang. Tichuan, a thutiam ang ngeiin, Paradis-ah chatuanin min nuntîr ngei ang. Ni e, tûna duh thlanna dik i siam chuan nunna tak tak chu i nei thei ang!