1. Tûnah eng ṭawngṭaina hmingthang tak nge kan sawiho dâwn?

KHAWVELA mi maktaduai tam tak chuan Lal Ṭawngṭaina tia koh ṭawngṭaina hmingthang tak chu an hre bel hle a. Isua chuan a zirtîrte hnêna ṭawngṭai dân tûr zirtîr nân he ṭawngṭaina hi a hmang a ni. Eng nge a dîl ber? Engvângin nge he ṭawngṭaina hi kan tân a pawimawh?

2. Isua’n eng thil pawimawh pathum tâna ṭawngṭai tûrin nge min zirtîr?

² Isua chuan: “Chutichuan, nangni chuan hetiang hian ṭawngṭai rawh u:—‘Kan Pa vâna mi, i hming zahawm [“thianghlim,” Baptist Mid-Missions’] rawh se. I ram lo thleng rawh se. I duh zâwng vâna an tih angin leia mi’n ti rawh se,’” tiin a sawi a. (Matthaia 6:9-13 chhiar rawh.) Engvângin nge Isua’n chûng thil pathumte tâna ṭawngṭai tûra min zirtîr?—Endnote 19-na en rawh.

3. Pathian Ram chungchângah eng nge kan hriat ngai?

³ Pathian hming chu Jehova a ni tih kan zir tawh a. Leilung leh mihringte tâna A duh zâwng chu kan sawiho tawh bawk a. A nih leh, Isua’n: “I ram lo thleng rawh se,” tia a sawi hian eng a tihna nge ni ta ang? Pathian Ram nihna te, chu miin a tih tûr te, leh Pathian hming a tihthianghlim dân tûrte chu kan zir ang.

4. Pathian Ram chu eng nge ni a, chuta Lal tûr chu tu nge ni?

⁴ Jehova chuan vân sawrkâr a din a, chuta Lal tûrin Isua a thlang a ni. Bible chuan chu sawrkâr chu Pathian  Ram tiin a ko va. Isua chu “lalberte Lalber, lalte Lal” a ni. (1 Timothea 6:15) Mihring rorêltute aia thil ṭha a tih theih zâwk bâkah, an thiltihtheihna zawng zawng belh khâwm aiin thil a tithei zâwk bawk a ni.

5. Pathian sawrkâr chuan khawi aṭangin nge ro a rêl? Eng chungah nge ro a rêl dâwn?

⁵ Isua chu a thawhleh aṭanga ni sawmli hnuah vânah a chho va. A tâwpah, Jehova chuan a Lalrama Lal ni tûrin a ruat ta a ni. (Tirhkohte 2:33) Pathian sawrkâr chuan vân aṭangin lei pumpuiah ro a la rêl dâwn a. (Thu Puan 11:15) Chuvângin, Bible chuan Pathian Ram chu ‘vân Ram’ tiin a ko a ni.—2 Timothea 4:18.

6, 7. Engin nge Isua chu mihring lalte aia ṭha zâwk nihtîr?

⁶ Bible chuan Isua chauhvin “thih theih lohna a nei” tih a sawi a, chuvângin mihring lal tu dang zawng aiin a chungnung zâwk a ni. (1 Timothea 6:16) Mihring rorêltute chu a tâwpah an thi ṭhîn a; mahse, Isua erawh a thi thei lo. Kan tâna a tih tûr thil ṭha zawng zawng chuan chatuan a daih ang.

⁷ Bible hrilh lâwkna chuan Isua chu Lalber, fel taka rorêl ṭhîn leh khawngaihna nei tak a ni dâwn tih a sawi lâwk a ni: “LALPA thlarau—finna leh hriat theihna thlarau, remruatna leh chakna thlarau, hriatna leh LALPA ṭihna thlarau chu—a chungah a fu ang. A lâwmna chu LALPA ṭihnaah a ni ang, a mita a hmuh angin ro a rêl lo vang a, a benga a hriat angin a zilhhau hek lo vang; retheite chu fel takin ro a rêlsak zâwk ang,” tiin. (Isaia 11:2-4) Chutiang mi chu Lal atân i duh dâwn lâwm ni?

8. Engtin nge Isua chuan amah chauhvin ro a rêl dâwn lo tih kan hriat?

⁸ Pathian chuan a vân sawrkâra Isua rorêlpui tûr mi ṭhenkhat a thlang tawh a. Entîr nân, tirhkoh Paula  chuan Timothea hnênah: “Kan tuar chuan, a rorêlnaah ro kan rêl ang,” tiin a hrilh a ni. (2 Timothea 2:12) Chuti chu, Isua rualin mi eng zâtin nge rorêl dâwn?

9. Isua nên mi eng zâtin nge rorêl dâwn? Engtik aṭangin nge Pathianin anni chu a thlan ṭan?

⁹ Bung 7-naa kan hriat tawh angin, tirhkoh Johana chuan Isua chu vâna Lalber angin leh a ruala lal dang 1,44,000-te telna inlârna a hmu a. Mi 1,44,000-te chu tute nge ni? Johana chuan ‘an chalah [Isua] hming leh a Pa hming ziak’ a awm thu a sawi a. (Thu Puan 14:1 chhiar rawh.) A hnuah: “Chûng chu Berâm No [Isua] a kalna apianga zuitute chu an ni. Chûng chu . . . mihring zîng ata tlan an ni,” tiin a sawi belh a ni. (Thu Puan 14:4) Mi 1,44,000-te chu Pathianin ‘leia rorêl tûra’ a thlan Kristian rinawmte an ni a. An thih hunah vân nunna changa kaihthawh an ni. (Thu Puan 5:9, 10) Tirhkohte hun aṭanga inṭanin, Jehova chuan Kristian rinawmte chu mi 1,44,000-te zînga tel tûrin a thlang ṭan a ni.

10. Jehova’n mihringte chunga rorêl tûrin Isua leh mi 1,44,000-te a thlang chu engvângin nge hmangaihna a nih?

¹⁰ Jehova chuan min ngaihsak êm avângin, Isua rorêlpuitu atân mihringte a thlang a. Isua chu min hre thiamtu a nih avângin, kan tân rorêltu ṭha tak a ni ngei ang. Mihring nih leh hrehawm tawrh chu eng nge a nih a hre chiang hle a. Paula’n Isua chu “kan chak lohnate” min hriatpui theitu leh “keimahni anga kawng tinrênga thlêmna tâwk tawh” a nih thu a sawi a ni. (Hebrai 4:15; 5:8) Mi 1,44,000-te pawhin mihring nih awmzia an hre bawk. Anmahni ngeiin ṭhat famkim lohna leh dam lohnate an lo hmachhawn tawh a. Chuvângin, Isua leh mi 1,44,000-te chuan kan rilru an hre thiam mai ni lovin, kan buaina tawhte pawh min hriatthiampui tih kan chiang thei a ni.

11. Engvângin nge Isua’n a zirtîrte chu Pathian duh zâwng vâna tih ni tûra a ṭawngṭaitîr?

¹¹ Isua’n a zirtîrte chu Pathian duh zâwng vâna tih ni tûrin a ṭawngṭaitîr a. Engvângin nge? Bung 3-naah khân, Diabol-Setana chu Jehova chungah a hel tih kan hre tawh a. A hel hnuah pawh, Jehova chuan Setana leh vântirhkoh rinawm lote, a nih loh leh ramhuaite chu vâna hun engemawti chhûng an awm zawm chu a phalsak a. Chuvângin, vâna awm zawng zawngin Pathian duh zâwng an ti lo a ni. Bung 10-naah, Setana leh a ramhuaite chungchâng kan zir belh ang.

12. Thu Puan 12:10-ah eng thilthleng pawimawh tak pahnih nge târ lan a nih?

¹² Isua chuan Pathian Rama Lal a nih hnu rei lo têah Setana a do dâwn tih Bible-in a sawi a. (Thu Puan 12:7-10 chhiar rawh.) Châng 10-na chuan thilthleng pawimawh tak pahnih a târ lang a ni. Pathian Rama Isua Krista a Lal ṭan khân, Setana chu vân aṭangin leiah paih thlâk a ni a. A hnuaiah chuan, chûng thilte chu a thleng der tawh tih kan zir chiang ang.

13. Vân aṭanga Setana paih thlâk a nih khân eng thil nge thleng?

¹³ Bible chuan Setana leh a ramhuaite vân aṭanga paih thlâk an nih hnua vântirhkoh rinawmte lâwmzia a sawi lang a. “Aw, vânte leh a chhûnga awmte u, lâwm rawh u!” tiin kan chhiar a ni. (Thu Puan 12:12) Vâna awm zawng zawngin Pathian duh zâwng an tih vek tawh avângin, tûnah chuan vânah remna leh inpumkhatna a awm tawh a ni.

14. Vân aṭanga Setana paih thlâk a nih avângin leiah eng nge thleng?

¹⁴ Lei dinhmun erawh a ṭha lo hle a. “Diabola chuan  hun tlêm tê chauh a nei tih a inhriat avânga thinur êm êma . . . a lo chhuk tâk” avângin mite chungah thil râpthlâk tak tak a thleng a ni. (Thu Puan 12:12) Setana chu a thinur hle a. Vân aṭanga paih thlâk a ni tawh a, nakin lawkah tihboral a ni tawh dâwn tih a inhria a ni. Lei pumpuiah harsatna, natna, leh hrehawm tawrhna thlentîr tûrin theih tâwp a chhuah mêk a ni.

15. Leilung atâna Pathian duh zâwng chu eng nge ni?

¹⁵ Mahse, leilung atâna Pathian duh zâwng chu a la inthlâk danglam chuang lo. Mihring ṭha famkimte lei paradis-a chatuana an nun chu a la duh reng a ni. (Sâm 37:29) A nih leh, Pathian Ramin chu chu engtin nge a thlentîr ang?

16, 17. Daniela 2:44 chuan Pathian Ram chungchâng eng nge min hriattîr?

¹⁶ Daniela 2:44-a hrilh lâwkna chuan: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi a. He hrilh lâwkna hian Pathian Ram chungchâng eng nge min zirtîr?

¹⁷ Pakhatnaah, Pathian Ram chuan “chûng lalte nîah” ro a rêl dâwn tih min hriattîr a. A awmzia chu, Lalramin ro a rêl ṭan hunah he leiah hian sawrkâr dangte an la ding dâwn tihna a ni. Pahnihnaah, Pathian Ram chu a chhe ngai lo vang a, sawrkâr dangin a thlâk ngai dâwn lo tih min hriattîr bawk. Pathumnaah, Pathian Ram leh he khawvêl sawrkârte inkârah indona a awm dâwn tih min zirtîr a ni. Chu indonaah Pathian Ram chuan hnehna a chang ang a, leia sawrkâr ding awmchhun a rawn ni ang. Tichuan, mihringte’n an  neih theih azawnga sawrkâr ṭha ber chu an nei tawh dâwn a ni.

18. Pathian Ram leh khawvêl sawrkârte inkâra indona hnuhnûng ber chu eng nge ni?

¹⁸ Engtin nge Pathian Ram chuan leia rorêlna chu a lâk ang? Armageddon tia koh indona hnuhnûng ber inṭan hmain, ramhuaite chuan ‘Pathian Engkimtitheia ni ropuia indonaah khawvêl zawng zawnga lalte’ chu bumin an hruai khâwm ang. Ni e, mihring sawrkârte chuan Pathian Ram chu an do dâwn a ni.—Thu Puan 16:14, 16; Endnote 10-na en rawh.

19, 20. Engvângin nge leia rorêl tûrin Pathian Ram kan mamawh?

¹⁹ Engvângin nge Pathian Ram kan mamawh? A lo berah pawh chhan pathum a awm a. A hmasain, sual fate kan nih avânga kan dam lovin, kan la thih vâng a ni. Mahse, Bible chuan Pathian Ramah chatuanin kan nung dâwn tih min hrilh a. Johana 3:16 chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a sawi a ni.

²⁰ Pathian Ram kan mamawh chhan pahnihna chu mi suaksualte hual vêla kan awm vâng a ni. Mi tam tak chu dâwt sawi hmang, bum hmang, leh nungchang bawlhhlawh takte an ni a. Chûng mite awm lo tûrin tih theih engmah kan nei lo va; mahse, Pathian chauhvin a a tiboral thei a ni. Thil sual ti zawm zêlte chu Armageddon-ah tihboral vek an ni ang. (Sâm 37:10 chhiar rawh.) Pathian Ram kan mamawh chhan pathumna chu mihring sawrkârte hian thil an tihtheih tâwk loh vâng leh an râwngin, dik lo taka thil an tih ṭhin vâng a ni a. Mite chu Pathian thuâwih  tûra ṭanpui an tum lo bawk. Chuvângin, Bible chuan: “Mi, mi dang chungah pawi khawpin a intilal ṭhîn,” tiin a sawi a ni.—Thuhriltu 8:9.

21. Engtin nge Pathian Ram chuan leiah Pathian duh zâwng a thlentîr ang?

²¹ Armageddon zawhah, Pathian Ram chuan leiah Pathian duh zâwng a thlentîr dâwn a ni. Entîr nân, Setana leh a ramhuaite chu a ti bo vang. (Thu Puan 20:1-3) A tâwpah chuan, dam lo leh thi an awm tawh lo vang. Tlanna zârah, mi rinawm zawng zawngte chu Paradis-ah chatuanin an nung thei tawh ang. (Thu Puan 22:1-3) Lalram chuan Pathian hming a tithianghlim bawk ang. Chumi awmzia chu eng nge ni? Pathian sawrkârnain leia ro a rêl hun chuan, mihring zawng zawngin Jehova hming an chawimawi tawh ang tihna a ni.—Endnote 20-na en rawh.

22. Engtin nge Isua chuan leia a awm lai leh vâna a lâwn hnu lawkah Lalna a chang nghâl lo tih kan hriat?

²² Isua’n a zirtîrte chu: “I ram lo thleng rawh se,” tia ṭawngṭai tûrin a zirtîr a. Chuvângin, Pathian ram chu chutih hun laiin a la thleng lo tih a chiang hle. Jehova chuan a sawrkârna chu vânah a din hmasa ang a, chutah  chuan Isua a Laltîr ang. A nih leh, Isua chu vâna a kîr veleh khân Lala siam a ni nghâl em? Ni nghâl lo ve, a nghah phawt a ngai a ni. Isua thawh leh hnu lamah, Petera leh Paula’n Sâm 110:1-a hrilh lâwkna hi Isua chungchânga an hman aṭangin kan hre thei a ni. Chu hrilh lâwknaah chuan Jehova’n: “Ka ding lamah ṭhu reng rawh, i hmêlmate i kephah nghahchhana ka siam hma loh zawng,” tiin a sawi a. (Tirhkohte 2:32-35; Hebrai 10:12, 13) Jehova’n Lala a siam hmain Isua chuan engtia rei nge a nghah?

23. (a) Engtik aṭangin nge Isua chu Pathian sawrkârah Lal a nih ṭan? (b) Bung 9-naah eng nge kan zir ang?

²³ Kum 1914 a thlen hma kum tam takah, chumi kum chu Bible hrilh lâwknate thlen famkimna kum pawimawh tak a ni dâwn tih Kristian dikte’n an lo hre lâwk a. An hre dik tih chu kum 1914 aṭanga khawvêla thilthlengte chuan a târ lang. Chumi kumah chuan Isua chu a Lal ṭan a ni. (Sâm 110:2) A hnu lawkah, Setana chu leiah paih thlâk a ni a, tûnah chuan “hun tlêm tê chauh a nei” tawh a ni. (Thu Puan 12:12) Bung 9-naah chuan, chumi hun chhûngah kan awm tih finfiahna tam zâwk kan hmu ang. Pathian Ram chuan Pathian duh zâwng leiah a thlentîr thuai ang tih pawh kan zir bawk ang.—Endnote 21-na en rawh.