1, 2. Jehova ṭhian ṭhenkhat chu tute nge ni?

TU NGE ṭhian atâna i duh? I rilru milpui, i kawm ngeih tak leh nangmah kâwm ngeihtu che bâkah, i ngaihsân zâwng mizia leh nungchang neitu chu i duh ang.

² Pathian Jehova chuan mi ṭhenkhat chu a ṭhian atân a thlang a. Entîr nân, an zînga pakhat chu Abrahama a ni. (Isaia 41:8; Jakoba 2:23) Davida pawh Jehova mi ngainat tak a ni a, “Ka thinlung ang pu mi,” tiin a sawi hial a ni. (Tirhkohte 13:22) Zâwlnei Daniela pawh Jehova tân “mi duhawm tak” a ni bawk.—Daniela 9:23.

3. Engvângin nge Abrahama te, Davida te, leh Daniela te chu Jehova ṭhian an nih?

³ Engtin nge Abrahama te, Davida te, leh Daniela te chu Pathian ṭhian an lo nih? Jehova chuan Abrahama nêna an inṭhian chhan chu ‘a thu a âwih vâng’ niin a sawi. (Genesis 22:18) Chuvângin, Jehova chuan inngaitlâwm taka a thuâwihtute chu ṭhianah a siam a ni. Chu bâkah, a hnam pum pawhin Jehova ṭhian a nih theih bawk a. Jehova’n Israel hnamte hnênah: “Ka aw ngaithla ula, in Pathian ka ni ang a, nangni pawh ka mite in ni ang,” tiin a hrilh a ni. (Jeremia 7:23) Chuvângin, nang pawh Jehova ṭhian nih ve i duh chuan a thu i âwih a ngai a ni.

4, 5. Engtin nge Jehova’n a ṭhiante chu a vênhim?

⁴ Jehova chuan ‘a lama rilru dik tak putute chunga a chakzia tihlan dân’ kawng a zawng tih Bible-in a sawi a. (2 Chronicles 16:9) Sâm 32:8-ah Jehova chuan a ṭhiante  hnênah: “Fing taka awmtîr chein i kalna tûr kawng chu ka entîr ang chia: ka mita en reng chung chein rem ka ruatsak zêl ang che,” tiin a tiam a ni.

⁵ Hmêlma thiltithei tak chuan Pathian ṭhian ni tawh lo tûrin min duh a. Mahse, Jehova chuan min vênhim chu a duh a ni. (Sâm 55:22 chhiar rawh.) A ṭhian kan nih angin, thinlung zawng zawngin a rawng kan bâwl a. Dinhmun harsa tak kârah pawh a chungah kan rinawm a ni. Chu bâkah: “LALPA chu . . . ka ding lama a awm avângin ka nghîng lo vang,” titu fakna hla phuahtu neih ang rinngamna chu kan nei a ni. (Sâm 16:8; 63:8) Engtin nge Setana chuan Pathian ṭhian ni tawh lo tûra min dan a tum?

6. Mihringte chungchângah Setana chuan eng nge a sawi?

⁶ Bung 11-naah khân, Setana’n Jehova a cho thu leh dawthei nia a puh thu kan hre tawh a. Chu bâkah, Adama leh Evi chu thil dik leh dik lo mahnia thu tlûkna an siam a phalsak loh avângin a dik tâwk lo nia a puh thu pawh kan hre tawh bawk. Setana chuan Pathian ṭhian nih duh mihringte pawh dik lo takin a puh bawk tih Joba bu chuan min hrilh a. Pathian rawng an bâwl chhan chu amah an hmangaih vâng ni lovin, a hnên aṭanga thil dawn an duh vâng niin a sawi. Mihring tute pawh chu Pathian a hawisantîr thei niin a insawi hial a ni. Joba hnên aṭanga kan zir theihte leh Jehova’n a vênhim dânte chu i lo en ang u.

7, 8. (a) Engtin nge Jehova chuan Joba chu a ngaih? (b) Setana’n Joba chungchângah eng thu nge a sawi?

⁷ Joba chu tu nge ni? Kum 3,600 vêl kal taa nung mi ṭha tak a ni a. Chutih lai chuan, Jehova chuan leiah Joba ang mi an awm loh thu a sawi hial a ni. Joba chuan Pathian a zahin, thil ṭha lo a hua a. (Joba 1:8) Joba chu Jehova ṭhian dik tak a ni.

 ⁸ Setana chuan Joba chu mahni hmasialna avânga Pathian rawngbâwl niin a sawi a. Jehova hnênah: “Amah chu a in nên, a neih zawng zawng nên, kil tinah i hung vêl a ni lâwm ni? A kut hnathawh mal i sâwm a, he ramah hian a lo neinung sâwt êm êm atin a ni. Tûnah hian i kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che,” tiin a sawi a ni.—Joba 1:10, 11.

9. Jehova chuan Setana chu eng tih nge a phalsak?

⁹ Setana chuan Joba chu Jehova hnên aṭanga thil dawn a duh vâng chauhva a rawngbâwl nia a puh bâkah, Jehova rawngbâwl a bânsantîr thei niin a insawi bawk a ni. Jehova chuan Setana thusawi chu pawm lo mah se, hmangaihna avânga a rawngbâwl a nih leh nih loh finfiah nâna Joba a fiah erawh a phalsak a ni.

10. Engtin nge Setana’n Joba chu a beih a, Joba’n engtin nge a chhân lêt?

¹⁰ A hmasa berin, Setana chuan Joba chu a ran rual zawng zawng a chântîr a; a ṭhen rûksakin, a ṭhen a tihhlumsak a ni. Chu bâkah, a chhiahhlawh a tam zâwkte pawh a that a. Joba chuan a neih zawng zawng a chân ta. A beihna hnuhnûng ber atân a fa sâwmte chu thlipuiin a tihlumsak a. Mahse, Joba chu Jehova chungah a rinawm tlat a ni. “Hêng zawng zawngah hian Joba chu a sual lo va, Pathian chu a mawhchhiat hek lo.”—Joba 1:12-19, 22.

11. (a) Setana’n Joba chungah eng thil dang nge a tih? (b) Joba’n engtin nge a chhân lêt?

¹¹ Setana chu a tlâwm lo. “A ruh leh a tisa ngei khawihsak teh, i hmaichhan ngeiah a sawichhe mai ang che,” tia sawiin Pathian chu a cho leh a. Chuvângin, Joba chu pânchhia na tak a veitîr ta a. (Joba 2:5, 7) Hemi ṭumah pawh hian Joba chu Jehova chungah a rinawm  leh a. “Ka thih thlengin ka dikna [“rinawmna,” NW] ka dah bo lo vang,” tiin a sawi a ni.—Joba 27:5.

12. Engtin nge Joba chuan Setana chu dawthei a ni tih a finfiah?

¹² Joba chuan Setana puhna leh a hrehawm tawrh chhan chungchângah hriat engmah a nei lo va. A harsatnate chu Jehova thlentîrah a ngai a ni. (Joba 6:4; 16:11-14) Chuti chung pawhin, Jehova chungah a rinawm reng a. Tûnah chuan, Joba’n mahni hmasial vângin Pathian rawng a bâwl lo tih chu rinhleh rual lovin a chiang ta. Pathian a hmangaih vângin a ṭhian a ni a. Setana puhna zawng zawng chu dâwt a va ni chiang tak êm!

13. Joba rinawmna chuan eng nge a rah chhuah?

¹³ Joba chuan vâna thilthleng engmah hre lo mah se, Pathian chunga a rinawm tlatna hmangin Setana chu mi sual a ni tih a finfiah a. A tâwpah Jehova chuan Joba chu an inṭhianna rinawm taka a vawn avângin lâwmman a pe a ni.—Joba 42:12-17.

14, 15. A hmei a paa Setana min puhna chu eng nge ni?

¹⁴ Joba chunga thilthleng aṭangin thil pawimawh tak i zir thei a. Tûn laiah pawh, Setana chuan Pathian min pêk tûr lâwmman kan duh avâng chauhva rawngbâwl niin min puh a ni. Joba 2:4-ah Setana chuan: “Miin a neih zawng zawng a nunna atân a pe phal ang chu!” tiin a sawi a. Chuvângin, Setana chuan Joba chauh ni lovin, kan zavai hian a hmei a pain mahni hma sial vekah min puh tihna a ni. Joba thih aṭanga kum sâng tam tak a liam hnuah pawh, Setana chuan Jehova chu a la deu sawh reng a, a chhiahhlawhte chu a la sawi chhe reng a ni. Entîr nân, Thufingte 27:11-ah chuan: “Ka fapa, fing la, ka thinlung tilâwm rawh; mi sawichhetute ka chhân theih nân,” tiin kan chhiar a ni.

¹⁵ Jehova thuâwih chu thlangin a ṭhian rinawm tak  i ni thei a, Setana chu dawthei a ni tih i finfiah thei bawk a ni. Pathian ṭhian ni tûra inthlâk danglamna lian tham tak i siam a ngai a nih pawhin, chu chu i siam theih azawnga thu tlûkna ṭha ber a ni. He thu tlûkna hi a pawimawh hle. Setana chuan harsatna i tawh hunah Pathian chungah i rinawm lo vang a ti a. Pathian chunga rinawm lo tûra min bum a tum a ni. Engtin nge?

16. (a) Mite’n Jehova rawngbâwl an bânsanna tûrin Setana chuan eng tih dânte nge a hman? (b) Jehova rawngbâwl i bânsan nân, Setana chuan i chungah eng tih dân nge a hman mai theih?

¹⁶ Setana chuan Pathian ṭhian ni tawh lo tûra min dan nân tih dân chi hrang hrang a hmang a. Ani chu “sakeibaknei rûm ṭhîn angin a ei theih tûr zawngin a phi ruai ṭhîn.” (1 Petera 5:8) I ṭhian te, i chhûng te, leh mi dangte’n Bible zir tawh lo tûr leh thil dik ti tawh lo tûra dan an tum che chuan mak i ti tûr a ni lo. Chutiang hunah chuan, beih tâwk niin i inhre mai thei. * (Johana 15:19, 20) Setana ngei pawh “êng tirhkohvah” a insiam chawp thei a. Chuvângin, Jehova thu âwih lo tûrin min bum a tum thei a ni. (2 Korinth 11:14) Jehova rawngbâwl bânsan tûra min tih dân kawng dang leh chu rawngbâwl tûra tling tâwk lo nia inhriatna min neihtîr hi a ni.—Thufingte 24:10.

17. Engvângin nge Jehova thu kan âwih?

¹⁷ Jehova thu kan âwih hian Setana chu dawthei a ni tih kan târ lang a. Thuâwih tûrin engin nge min ṭanpui ang? Bible chuan: “LALPA in Pathian chu in thinlung zawng zawngin, in rilru zawng zawngin, in  chakna zawng zawngin in hmangaih tûr a ni,” tiin a sawi. (Deuteronomy 6:5) Jehova kan hmangaih avângin a thu kan âwih a. Amah kan hmangaihna a pun chhoh zêl chuan, ti tûra min phût zawng zawngte tih chu kan duh ang. Tirhkoh Johana chuan: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin a ziak a ni.—1 Johana 5:3.

18, 19. (a) Jehova’n thil ṭha lo nia a sawi ṭhenkhat chu engte nge ni? (b) Jehova chuan kan tih theih lohte ti tûrin min phût lo tih engtin nge kan hriat?

¹⁸ A nih leh, Jehova’n thil ṭha lo nia min hrilh ṭhenkhat chu engte nge ni? Entîrna ṭhenkhat chu, “ Jehova Thil Huatte Chu Haw Rawh,” tih bâwmah târ lan a ni. A tîrah chuan, chûng thil zînga ṭhenkhat chu a sual lutuk hran lo niin i hre mai thei a. Mahse, Bible chângte chhiar a, ngun taka i ngaihtuah hnu chuan, Jehova dânte zawm chu a finthlâk tih i rawn hre thiam ang.  Chu bâkah, i nunah inthlâk danglamna ṭhenkhat siam ngai niin i inhre mai thei bawk. A châng chuan a harsa mai thei; mahse, chutianga i inthlâk danglam chuan Pathian ṭhian rinawm i nihna aṭanga lo awm remna leh hlimna i nei ang. (Isaia 48:17, 18) Chûng inthlâk danglamnate kan siam thei tih engtin nge kan hriat?

¹⁹ Jehova chuan kan tih theih lohte ti tûrin min phût ngai lo. (Deuteronomy 30:11-14) Kan Ṭhian a nih angin, mahni kan inhriat aiin min hre chiang zâwk a. Kan chaknate leh chak lohnate chu a hria a ni. (Sâm 103:14) Tirhkoh Paula chuan: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin min fuih a ni. (1 Korinth 10:13) Jehova chuan thil dik ti tûra kan mamawh chakna min pe reng ang tih kan ring nghet thei a. Dinhmun khirh takte tuar chhuak thei  tûrin ‘thiltihtheihna nasa tak’ a pe ang che. (2 Korinth 4:7) Paula chuan chutiang hun khirh taka Jehova ṭanpuina a dawn hnuah: “Mi tichaktuah chuan engkim ka ti thei a ni,” tiin a sawi thei ta a ni.—Philippi 4:13.

20. Eng miziate nge kan entawn ngai a, engvângin nge?

²⁰ Jehova ṭhian nih kan duh chuan thil ṭha lo nia a sawite kan bânsan ngei tûr a ni a; mahse, chu chu a tâwk lo. (Rom 12:9) Pathian ṭhiante chuan a thil ngainatte chu an ngaina a. Chûng a ngainatte chu Sâm 15:1-5-ah târ lan a ni. (Chhiar rawh.) Jehova ṭhiante chuan a miziate chu an entawn a, “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” an lantîr bawk.—Galatia 5:22, 23.

21. Engtin nge Pathian ngainat miziate lantîr dân chu i zir theih?

²¹ Engtin nge chûng mize duhawm takte lantîr dân chu i zir theih? Bible chhiar ziahna leh zir ziahna hmangin Jehova thil ngainatte chu i zir a ngai a. (Isaia 30:20, 21) Chutianga i tih chuan Jehova i hmangaihna a ṭhang chho vang a, a thu âwih chu i duh telh telh ang.

22. Jehova thu i âwih chuan eng nge a rah chhuah ang?

²² I nuna inthlâk danglamna siam ngaite chu thawmhnaw hlui hlîp a, thawmhnaw thar hâk nên khaikhin theih a ni a. Bible chuan ‘mihring hlui chu hlîp a, mihring thara’ inthuam tûrin a ti che. (Kolossa 3:9, 10) Chu chu thil awlsam a ni lo mai thei; mahse, chûng inthlâk danglamnate siam a, Jehova thu kan âwih chuan “lâwmman nasa tak” pêk min tiam a ni. (Sâm 19:11) Jehova thu âwih chu thlang la, Setana chu dawthei a nihzia finfiah rawh. Nakin huna dawn tûr lâwmmante vâng ni lovin, mahni hma sial lo hmangaihna avâng zâwkin Jehova rawng chu bâwl rawh. Chutianga i tih chuan Pathian ṭhian ṭha tak i lo ni thei ang!