1. Nunna hi tu min pêk nge ni?

JEHOVA chu “Pathian nung” a ni a. (Jeremia 10:10) Min Siamtu leh nunna min petu a ni bawk. Bible chuan: “Nangin engkim i siam a, i duh avânga awm leh siam a ni bawk si a,” tiin a sawi a ni. (Thu Puan 4:10, 11) Ni e, Jehova chuan nunna kan neih a duh a. Nunna hi a hnên aṭanga kan dawn thilpêk hlu tak a ni.—Sâm 36:9 chhiar rawh.

2. Engtin nge nun hlawhtling kan neih theih?

² Jehova chuan nun zawm zêl nâna kan mamawh ei leh inte min pe a. (Tirhkohte 17:28) Chu mai chu a ni lo, hlim taka nung tûrin min duh a ni. (Tirhkohte 14:15-17) Nun hlawhtling tak nei tûr chuan Pathian dânte kan zawm a ngai a ni.—Isaia 48:17, 18.

3. Kaina’n Abela a thah khân, Jehova chuan eng nge a tih?

³ Bible chuan Jehova tân kan nunna leh mi dangte nunna a hlu tih min zirtîr a. Entîr nân, Adama leh Evi fapa, Kaina chu a nau Abela chunga a thin a ur khân, Jehova chuan a thinurna thunun tûrin a vaukhân a. Mahse, a ngaithla lo, a thinur zawm zêl a, “a nau Abela chu a bei a, a that ta mai a.” (Genesis 4:3-8) Jehova chuan Kaina chu Abela a thah avângin a hrem a ni. (Genesis 4:9-13) Huatna leh thinurna chuan tharum thawh hmang leh nun râwng tak min nihtîr theih avângin thil hlauhawm tak a ni. Chutiang mi chuan chatuana nunna a nei thei lo vang. (1 Johana 3:15 chhiar rawh.)  Jehova tilâwm tûr chuan mi zawng zawng hmangaih dân kan zir a ngai a ni.—1 Johana 3:11, 12.

4. Pathianin Israel mite hnêna a pêk dânte zînga pakhat chuan nunna thilpêk chungchâng eng nge min zirtîr?

⁴ Jehova chuan kum sâng tam tak a liam hnua Mosia hnêna Dân Sâwm a pêk khân, nunna a ngaihhlutzia a târ lang a. Chûng dân zînga pakhat chu: “Tual i that tûr a ni lo,” tih hi a ni. (Deuteronomy 5:17) Tum rêng vânga tual thattu chu tihhlum ngei ngei tûr a ni.

5. Pathianin nau tihtlâk chu engtin nge a ngaih?

⁵ Pathianin nau tihtlâk chu engtin nge a ngaih? Naute piang lo nunna pawh hi Jehova tân a hlu hle a. Israelte hnêna Jehova Dân pêkah chuan miin hmeichhe nau pai chu vaw palh sela, a nau chu lo tlain thi ta se, chu mi chu tihhlum ve ngei tûr a ni. (Exodus 21:22, 23 chhiar rawh; Sâm 127:3) Hei hian nau tihtlâk chu thil sual a ni tih min zirtîr a ni.—Endnote 27-na en rawh.

6, 7. Engtin nge Jehova mithmuhah nunna kan ngaihhlutzia kan lantîr?

⁶ Engtin nge Jehova mithmuhah kan nunna leh mi dangte nunna kan ngaihhlutzia kan lantîr theih? Kan nunna leh mi dangte nunna chu dinhmun hlauhawma dah lohna hmangin a ni. Chuvângin, kan tâna thil pawi tak leh thihna hial min thlen theitu vaihlo hman te, kuva ei te, leh ruihhlo hmante chu kan pumpelh a ngai a ni.

⁷ Kan nunna leh kan taksa hi Pathian min pêk a nih avângin a duh dân angin kan hmang tûr a ni a. Kan taksa ṭha taka kan enkawl a ngai a ni. Chutilochuan, Pathian mithmuhah mi bawlhhlawh kan ni ang. (Rom 6:19; 12:1; 2 Korinth 7:1) Nunna kan ngaihhlut loh chuan, nunna min petu Pathian Jehova chu kan be thei lo vang. Kan thil chîn ṭha lote bânsan chu harsa hle  mah se, nunna kan ngaihhlut avânga bânsan kan tum a nih chuan Jehova’n min ṭanpui ngei ang.

8. Keimahni leh mi dangte nunna chu dinhmun hlauhawma a awm loh nân eng nge kan tih ang?

⁸ Nunna hi thilpêk hlu tak a ni tih kan hre tawh a. Jehova chuan kan nunna leh mi dangte nunna chu dinhmun hlauhawmah kan dah dâwn lo tih a ring tlat a. Chu chu motor te, bike te, leh lîrthei dangte kan khalh dân hmangin kan lantîr thei a ni. Tharum hmanga infiamna hlauhawm takte chu kan pumpelh bawk. (Sâm 11:5) Chu bâkah, kan in chu a him thei ang berin kan sa a. Jehova’n Israelte hnênah: “In thar in sak chuan chuta mi an tlâka in in chu thisen chhuahna in a nih loh nân in in chung in hung tûr a ni,” tiin thu a pe a ni.—Deuteronomy 22:8.

9. Engtin nge ramsate kan cheibâwl ang?

⁹ Jehova chuan ramsate kan cheibâwl dân thlengin a ngai pawimawh a. A sa ei atân te, silhfên atân te, leh kan nunna atâna hlauhawmte a nih chauh loh chuan thah a phal lo. (Genesis 3:21; 9:3; Exodus 21:28) Chu bâkah, ramsate chungah kan râwng tûr a ni lo va, intihhlim nân maiin kan ram vâk tûr a ni hek lo.—Thufingte 12:10.

10. Engtin nge thisen chu nunna a ni tih kan hriat?

¹⁰ Thisen chu nunna a nih avângin Jehova tân a thianghlim a. Kaina’n Abela a thah hnuah, Jehova’n heti hian a hrilh a ni: “I nau thisen aw chuan lei aṭangin mi au asin,” tiin. (Genesis 4:10) Thisen chu nunna a nih avângin, Kaina’n Abela a thah khân Jehova’n a hrem a ni. Nova hun laia Tuilêt hnuah pawh Jehova’n thisen hi nunna a ni tih a târ lang leh a. Nova leh a  chhûngte hnênah: “Thil nung che thei tinrêngte chu in tân ei tûr an ni ang a; thlai hring ka pêk che u ang khân engkim ka pe vek a che u,” tia sawiin sa ei phalna a pe a; mahse, ei lo tûra khap pakhat a nei a, chu chu: “Sa a nunna (a thisen) chawpin in ei tûr a ni lo,” tih hi a ni.—Genesis 1:29; 9:3, 4.

11. Thisen chungchângah eng thupêk nge Pathianin Israel mite hnênah a pêk?

¹¹ Jehova’n Nova hnêna thisen ei lo tûra thu a pêkna kum 800 a liam hnuah, a mite hnênah heti hian thupêk a chhuah leh a ni: “Tin, Israela thlahte zînga mi emaw, ram dang mi an zînga khawsain emaw ram vâka, sa emaw, sava emaw, ei theih chi a rawn hawn chuan a thisen chu a tichhuak ang a, vaivutin a vûr tûr a ni,” tiin. Chu bâkah, heti hian a sawi zawm a ni: “Eng sa thisen mah in ei tûr a ni lo,” tiin. (Leviticus 17:13, 14) Jehova chuan thisen chu thil thianghlim anga thlîr tûrin a mite chu a la duh reng tihna a ni. Sa an ei thei a; mahse, a thisen erawh an ei thei lo. Sa an talh pawhin a thisen chu leiah an leihbaw tûr a ni.

12. Engtin nge Kristiante’n thisen an thlîr?

¹² Isua thih hnu kum eng emaw zâtah, tirhkohte leh Jerusalema Kristian kohhran upate chu Israel mite hnêna a pêk eng Dânte nge Kristiante’n an zui zêl ang tih chungchâng ngaihtuah tûrin an inhmu khâwm a. (Tirhkohte 15:28, 29 chhiar rawh; 21:25) Chutah, Jehova chuan thisen chu a tân a la hlu reng a, thil thianghlim anga an thlîr a la ngai reng tih hre thiam tûrin a ṭanpui a ni. Kristian hmasate chuan thisen an eiin, an in loh mai bâkah, thisen ṭha taka tihchhuah loh sa pawh an ei lo bawk. An ei chuan, milem biakna leh nungchang bawlhhlawhna ang chi thil sual takte ti ang an ni ang. Chumi hun aṭangin, Kristian dikte  chuan thisen ei emaw, in emaw chu an duh lo a ni. Tûn laiah eng nge ni zêl? Jehova chuan thisen chu thil thianghlim anga thlîr tûrin min la duh reng a ni.

13. Engvângin nge Kristiante’n thisen thun kan duh loh?

¹³ Hei hi Kristiante’n thisen thun pawh an duh tûr a ni lo tihna a ni em? Ni e. Jehova chuan thisen ei lo, leh in lo tûrin thu min pe a. Entîr nân, doctor-in zû in khap ta che se la, i thisen zâmah i thun tho ang em? Thun lo vang! Chutiang chiah chu a ni, thisen ei lo leh in lo tûra thupêk chu thun lo tûra tih nên a inang reng a ni.—Endnote 28-na en rawh.

14. Dam duh mah ila, eng nge kan tih loh?

¹⁴ A nih leh, doctor chuan, ‘Thisen i thun duh loh chuan i thi ang,’ min ti ta se, engtin nge ni ang? Chutiang hunah chuan, thisen chungchânga Pathian dân kan zawm dâwn leh dâwn loh chungchângah mahniin thu tlûkna kan siam ṭheuh tûr a ni. Kristian kan nih angin Pathian min pêk nunna hi kan zah hle a; chuvângin, thisen inthun duh lo mah ila, thisen tel lova inenkawlna dangte chu kan zawng zâwk a ni.

15. Tu dang zawng aiin tu thu nge kan âwih ang?

¹⁵ Hrisêlna ṭha neih chu kan tum tlat a; mahse, Pathianin nunna a hlut êm avângin, thisen kan inthun lo. Jehova thu âwih lova dam rei aiin, a thuâwih chu a pawimawh zâwk si a. Isua chuan: “Tu pawh a nun humhim duh apiangin a chân ang a; tu pawh keimah avânga a nun chân apiangin a humhim ang,” a ti. (Matthaia 16:25) Jehova kan hmangaih avângin a thuâwih chu kan duh a ni. Ani chuan kan tâna ṭha ber tûr chu a hria a, a thlîr angin nunna hi thil hlu tak leh thianghlim tak angin kan thlîr ve a ni.—Hebrai 11:6.

16. Engvângin nge Pathian chhiahhlawhte’n a thu an âwih?

¹⁶ Pathian chhiahhlawh rinawmte chuan thisen  chungchânga a thupêk chu zawm an tum tlat a. Thisen an ei a, an in loh bâkah, damdawi lama inenkawl nân pawh an hmang lo vang. * Mahse, an nunna chhanhim nân inenkawlna dangte chu an pawm ang. Nunna leh thisen Siamtu chuan an tâna ṭha ber tûr a hria tih chu an ring tlat a ni. Min Siamtu chuan kan tâna ṭha ber tûr a hria tih chu i ring ve em?

17. Israel mite tâna Jehova’n thisen hman a phalna awmchhun chu eng nge ni?

¹⁷ Jehova’n Israelte tâna Mosia hnêna a pêk Dânah chuan: “Tisa nunna chu thisenah chuan a awm si a; in nunna atâna inremna siamna tûra maichâm chunga ka pêk che u a ni; nunna atâna inremna siamna chu thisen ngei chu a ni si a,” a ti a. (Leviticus 17:11) Israel mite’n thil an tihsual hunah rana inthawi a, puithiam chu inthawina ran thisen ṭhenkhat biak in maichâm chunga thehtîrin Jehova ngaihdamna an dîl thei a. Hei hi Jehova’n Israel mite tâna thisen hman a phal dân awmchhun chu a ni.

18. Isua inthawina chuan eng nge min neihtîr thei?

¹⁸ Isua leia a lo kal khân, sualte ngaihdam nâna rana inthawina dân chu a nunna, a nih loh leh a thisen pêkna hmangin a rawn thlâk a. (Matthaia 20:28; Hebrai 10:1) Isua nunna chu a hlut êm avângin, Jehova chuan vân nunna chang tûra a kaihthawh hnuah mi zawng zawng tân chatuana nun theihna hun remchâng a pe thei ta a ni.—Johana 3:16; Hebrai 9:11, 12; 1 Petera 1:18, 19.

19. ‘Mi zawng zawng thisena hul tûrin’ eng nge kan tih ngai?

 ¹⁹ Nunna thilpêk ropui tak avângin Jehova chungah kan lâwm hle! Isua an rin chuan chatuanin an nung thei tih mite hrilhhriat chu kan châk a. Mite kan hmangaih avângin, nunna an neih theih nân theih tâwp chhuahin kan zirtîr a ni. (Ezekiela 3:17-21) Chutianga kan tih chuan, tirhkoh Paula angin: “Mi zawng zawng thisenah ka hul a ni. . . . Pathian rêl zawng zawng azain in hnênah hrilh ka tîm loh kha,” tiin kan sawi ve thei ang. (Tirhkohte 20:26, 27) Ni e, mi dangte hnêna Jehova chanchin leh nunna a ngaihhlut dânte kan hrilh hian, nunna leh thisen kan zahzia kan lantîr tihna a ni.